ఖమ్మంలో అక్రమంగా తరలిస్తున్న 7లక్షల నగదు పట్టివేత - Cash SEIZED IN KHAMMAM

7 Lakhs Of Cash Seized in Khammam : పార్లమెంట్​ ఎన్నికల వేళ పోలీసులు పటిష్ఠ నిఘా ఏర్పాటు చేశారు. ఎక్కడికక్కడ తనిఖీలు చేపడుతూ అక్రమ నగదు రవాణాకు అడ్డుకట్ట వేస్తున్నారు. ఎలాంటి ఆధారాలు లేని డబ్బులు, నిషేధిత వస్తువులను రవాణా చేస్తున్నావారిపై కేసులు బుక్​ చేస్తున్నారు. ఎన్నికల కోడ్​ అమల్లో భాగంగా భద్రాచలంలోని రాష్ట్ర సరిహద్దు ప్రాంతం వద్ద ఏర్పాటు చేసిన చెక్​పోస్ట్​ వద్ద ఎలాంటి ఆధారాలు లేని రూ.7,23,000 నగదును ఎన్నికల అధికారులు పట్టుకున్నారు. 

భద్రాచలం పట్టణంలో రాష్ట్ర సరిహద్దు ప్రాంతంలో మొత్తం నాలుగు చెక్​పోస్టులను ఏర్పాటు చేయగా ఆంధ్రా చెక్​పోస్ట్​ వద్ద తాజాగా నగదు పట్టుబడింది. రోజూ నాలుగు చెక్​పోస్టుల్లో 24 గంటలు తనిఖీలు జరుగుతున్నాయని ఎలాంటి ఆధారాలు లేకుండా నగదు తరలించినా, నిషేధిత వస్తువులు రవాణా చేసినా వాటిని సీజ్​ చేసి కేసులు నమోదు చేయడం చేస్తున్నామని సీఆర్​పీఎఫ్​ చెక్​పోస్ట్ ఎన్నికల అధికారి బాలకృష్ణ తెలిపారు. అవసరాల కోసం తీసుకెళ్తున్న నగదుకు తప్పకుండా ఆధారాలు ఉండాలని సూచించారు.