Children Internet Usage Survey: ప్రస్తుతం స్మార్ట్ఫోన్ల వినియోగం అంతకంతకూ పెరిపోతోంది. సోషల్ మీడియాకు అతుక్కుపోయి చిన్నారులు సైతం బానిసలుగా మారుతున్నారు. దీంతోపాటు గేమింగ్స్, ఓటీటీ ప్లాట్ఫారమ్స్లో ఎక్కువ కాలం గడుపుతున్నారు. దీంతో పిల్లల ప్రవర్తనలో మార్పులు వస్తున్నాయని, వారిలో కోపం, అసహనం, బద్ధకం పెరిగిపోతున్నాయని తల్లిదండ్రులు ఆందోళన వ్యక్తం చేస్తున్నారు. లోకల్‌సర్కిల్స్‌ సంస్థ నిర్వహించిన ఆన్లైన్ సర్వేలో ఈ విషయాలు వెల్లడయ్యాయి.
దేశంలోని 368 పట్టణ జిల్లాలకు చెందిన 9-17 ఏళ్ల పిల్లల తల్లిదండ్రులు 70,000 మంది నుంచి అభిప్రాయాలు సేకరించి ఈ నివేదిక రూపొందించినట్లు ఆ సంస్థ తెలిపింది. సోషల్ మీడియా, వీడియోలు, ఓటీటీ యాప్స్, ఆన్లైన్ గేమ్స్‌ కోసం రోజుకు సగటున 3 గంటల నుంచి అంతకంటే ఎక్కువ సమయాన్నే తమ పిల్లలు వెచ్చిస్తున్నారని 47% మంది తల్లిదండ్రులు తెలిపారు. మరికొంతమంది పిల్లలు రోజులో 6 గంటలకు మించి సమయం వెచ్చిస్తున్నారని 10% మంది తల్లిదండ్రులు వెల్లడించారు. తమ పిల్లలు సోషల్ మీడియాకు ఎడిక్ట్ అయిపోయారని 66% మంది పట్టణ తల్లిదండ్రులు విశ్వసిస్తున్నారు.
వీటి వినియోగం వల్ల పిల్లల్లో కోపం, అసహనం, బద్ధకానికి దారితీస్తున్నాయని 58% మంది పేరెంట్స్ భావిస్తున్నారు. మొబైల్‌తో అధికంగా గడపడం వల్ల పిల్లల్లో దూకుడు పెరిగిందని 58% మంది తల్లిదండ్రులు తెలిపారు. అసహనంగా ఉంటున్నారని 49% మంది, బద్ధకస్థులుగా మారారాని 49% మంది, నైరాశ్యానికి దారితీస్తున్నాయని 42% మంది, అధిక కోపం కనిపిస్తోందని 30% మంది వెల్లడించారు. అయితే వీటి వల్ల తమ పిల్లలు సంతోషంగా ఉంటున్నారని 19% మంది, సామాజికంగా చురుగ్గా ఉంటున్నారని 4% మంది తల్లిదండ్రులు అంటున్నారు.
'పేరెంట్స్ అనుమతి ఉండేలా చూడాలి': 18 ఏళ్ల లోపు వయసున్న పిల్లలు సామాజిక మాధ్యమాలను వినియోగించాలంటే తల్లిదండ్రుల అనుమతి ఉండేలా కొత్త డేటా భద్రతా చట్టాన్ని రూపొందించాలని 66% మంది పేరెంట్స్ అభిప్రాయపడ్డారు. ఆధార్‌ ధ్రువీకరణ ద్వారా మాత్రమే సోషల్ మీడియాలో పిల్లలకు అనుమతి ఇవ్వాలని 33% మంది తల్లిదండ్రులు సూచిస్తున్నారు.
ఐటెల్ నుంచి కొత్త స్మార్ట్ఫోన్లు- తక్కువ ధరలో ఊహకందని ఫీచర్లతో లాంచ్!
వాహన ప్రియులకు గుడ్న్యూస్- ఓలా ఎలక్ట్రిక్ నుంచి 20 కొత్త ప్రొడక్ట్స్!
