ఫొటోస్​ను గుర్తించే కొత్త ఫీచర్​- ఇకపై ఫేక్ చిత్రాలను గుర్తుపట్టడం ఈజీ- అదెలాగంటే?

గూగుల్ ఫొటోస్​లో సరికొత్త ఫీచర్- ఇకపై ఫేక్ ఫొటోస్​ను గుర్తుపట్టేయండిలా..!

Google Photos Introduces AI Info: ప్రస్తుతం ప్రపంచ వ్యాప్తంగా ఆర్టిఫిషియల్‌ ఇంటెలిజెన్స్‌ (AI) వినియోగం భారీగా పెరుగుతోంది. ఇది దాదాపు అన్ని రంగాలకూ వ్యాపిస్తుంది. ప్రపంచం ఏఐ వెంట పరుగులు పెడుతున్న నేపథ్యంలో అన్ని కంపెనీలూ ఏఐ టూల్స్​ను వినియోగిస్తున్నాయి. ఇలా ఏఐ టూల్స్‌ వినియోగం పెరుగుతున్న తరుణంలో సులువుగా ఏఐ సాయంతో ఫొటోలు, వీడియోలు రూపొందిస్తున్నారు.

దీంతో అసలు నిజమైన ఫొటో ఏదో? ఏఐ సాయంతో రూపొందించనవి ఏవో తెలుసుకోవడం కష్టంగా మారుతోంది. ఈ సమస్యకు చెక్‌ పెట్టేందుకు గూగుల్‌ ఫొటోస్‌ సిద్ధమైంది. ఇందుకోసం గూగుల్ ఫొటోస్​లో ఏఐ ఇన్ఫో పేరుతో ఓ సరికొత్త ఫీచర్​ను తీసుకొచ్చింది. ఈ ఫీచర్ ఏఐ సాయంతో క్రియేట్ చేసిన ఫొటోస్​ను సులభంగా గుర్తించేందుకు ఉపయోగపడుతుంది.

ఈ 'ఏఐ ఇన్ఫో' సదుపాయాన్ని తీసుకొచ్చినట్లు గూగుల్‌ తన బ్లాగ్​ పోస్ట్​లో పంచుకుంది. దీని సాయంతో ఏఐ ఫొటోలను ఈజీగా గుర్తించొచ్చని తెలిపింది. అంటే ఇకపై ఏఐ టూల్స్‌ ఉపయోగించి ఎడిట్‌ చేసే ఫొటోస్​ను ఇట్టే కనిపెట్టేయొచ్చు. అయితే గూగుల్‌ తీసుకొచ్చిన ఏఐ టూల్స్‌ సాయంతో ఫొటోస్ ఎడిట్‌ చేస్తే మాత్రమే గుర్తించగలరని పేర్కొంది.

ఇది ఎలా పనిచేస్తుందంటే?:

• గూగుల్‌ ఫొటోస్‌ యాప్‌లో ఫొటోస్​ను ఎంచుకొని కిందకు స్క్రోల్‌ చేయగానే 'Details' సెక్షన్‌ కన్పిస్తుంది.
• అందులో ఏఐ సాయంతో రూపొందించిన ఫొటో అయితే 'Edited with Google AI' అని చూపిస్తుంది.
• ప్రముఖ ఫొటో ఎడిటింగ్ యాప్స్ అన్నీ ఏఐ ఆధారిత టూల్స్‌ను అందిస్తున్నాయి.
• యూజర్లకు మరింత మెరుగైన ఎడిటింగ్‌ ఆప్షన్స్‌ను అందుబాటులోకి తీసుకొస్తున్నాయి.
• దీంతో గూగుల్‌ ఫొటోస్‌ కూడా ఇటీవలే మ్యాజిక్‌ ఎడిటర్‌, మ్యాజిక్‌ ఎరేజర్‌ సహా ఇతర ఏఐ టూల్స్‌ను తమ వినియోగదారులందరికీ అందుబాటులోకి తీసుకొచ్చింది.

ఇదిలా ఉండగా ఇటీవలే గూగుల్ తన కొత్త చీఫ్ టెక్నాలజిస్ట్‌గా ప్రభాకర్ రాఘవన్‌ను నియమించింది. ఈ మేరకు గూగుల్ సీఈవో సుందర్ పిచాయ్ ప్రకటించారు. ఈ సందర్భంగా ఎవరీ ప్రభాకర్ రాఘవన్‌? గూగుల్ ఆయన్నే ఎందుకు కొత్త చీఫ్ టెక్నాలజిస్ట్​గా నియమించుకుంది? వంటి మరిన్ని వివరాల కోసం ఇక్కడ క్లిక్ చేయండి.