ChatGPT GPT-4o Features : ఓపెన్‌ ఏఐ సంస్థ తమ ఏఐ మోడల్‌ చాట్జీపీటీలో కొత్త వెర్షన్ను లాంఛ్ చేసింది. జీపీటీ-4ఓ (GPT-4o "o" for "omni") పేరిట దీన్ని తీసుకొచ్చింది. మరికొన్ని వారాల్లో అందరికీ ఉచితంగా ఈ కొత్త వెర్షన్ను అందుబాటులోకి తీసుకురానున్నట్లు వెల్లడించింది. అయితే దీనికి కొన్ని పరిమితులుంటాయని తెలిపింది. పెయిడ్‌ సబ్స్క్రైబర్లకు మాత్రం అవి వర్తించవని పేర్కొంది.
జీపీటీ-4ఓలో అత్యాధునిక వాయిస్‌, టెక్ట్స్‌, విజన్‌ ఫీచర్లు ఉన్నాయి. జీపీటీ-4 టర్బోతో పోలిస్తే కొత్త వెర్షన్ రెండింతలు వేగంగా పనిచేస్తుందని చీఫ్‌ టెక్నాలజీ ఆఫీసర్‌ మీరా మురాటీ తెలిపారు. సబ్‌స్క్రిప్షన్‌ ధర సగానికి తగ్గుతుందని వెల్లడించారు. ఈ కొత్త చాట్జీపీటీ వెర్షన్ దాదాపు 50 భాషలను సపోర్ట్‌ చేస్తుంది. వీటిలో తెలుగు, గుజరాతీ, తమిళం, మరాఠీ, హిందీ, కన్నడ, మలయాళం, బెంగాళీ వంటి భారతీయ భాషలు ఉండడం గమనార్హం.
అచ్చం మనిషిలాగానే!
వాయిస్‌ కమాండ్లకు మనిషి తరహాలోనే కేవలం 232 మిల్లీ సెకన్లలోనే జీపీటీ-4ఓ సమాధానం ఇస్తుందని ఓపెన్‌ ఏఐ వెల్లడించింది. టెక్ట్స్‌, రీజనింగ్‌, కోడింగ్‌ ఇంటెలిజెన్స్లో టర్బో కంటే మెరుగ్గా పనిచేస్తుందని పేర్కొంది. మరోవైపు మ్యాక్‌ ఓఎస్‌ యూజర్లకు డెస్క్‌టాప్‌ యాప్ను విడుదల చేయనున్నట్లు కంపెనీ ప్రకటించింది. మరికొన్ని రోజుల్లో విండోస్‌ యూజర్లకు కూడా దీన్ని అందుబాటులోకి తీసుకొస్తామని ప్రకటించింది.
జీపీటీ-4ఓ ఫీచర్లకు సంబంధించిన సమాచారాన్ని ఓపెన్‌ ఏఐ తమ బ్లాగ్‌ పోస్ట్లో వివరించింది. కొత్త వెర్షన్ పనితీరును తెలియజేస్తూ కొన్ని వీడియోలను కూడా పోస్ట్ చేసింది. దాంట్లో యూజర్లు ఇచ్చే వాయిస్‌ కమాండ్లకు మనిషి తరహాలోనే చాట్జీపీటీ-4ఓ సమాధానం ఇస్తుండడం కనిపిస్తుంది. పైగా ఒక ఫోన్లోని ఏఐ మోడల్‌ మరో ఫోన్లోని జీపీటీ వెర్షన్తో దానికదే సంభాషించడం గమనించొచ్చు. అలాగే యూజర్‌ సెల్ఫీ వీడియోను విశ్లేషించి వారి మానసిక స్థితి ఎలా ఉందో కూడా చెప్పింది.
గూగుల్‌ సైతం జెమినీ కొత్త వెర్షన్ను లాంఛ్ చేయనుంది. మంగళ, బుధవారం జరిగే గూగుల్‌ I/O డెవలపర్ కాన్ఫరెన్స్లో ఈ కొత్త వెర్షన్ ఫీచర్లను ప్రకటించే అవకాశం ఉంది. ఈ తరుణంలోనే ఓపెన్‌ ఏఐ తమ కొత్త వెర్షన్ను తీసుకురావడంపై సర్వత్రా ఆసక్తి నెలకొంది.
రూ.30,000 బడ్జెట్లో మంచి ట్యాబ్ కొనాలా? టాప్-5 ఆప్షన్స్ ఇవే! - Best Tabs Under 30000
