Young Woman Died in Tiger Attack in Asifabad : ఉమ్మడి ఆదిలాబాద్‌ జిల్లాలో పెద్ద పులుల సంచారం భయాందోళనలకు గురిచేస్తోంది. తాజాగా ఈ ఉదయం కుమురం భీం జిల్లా కాగజ్నగర్ మండలం గన్నారంలో పెద్దపులి దాడిలో ఓ వివాహిత మృతి చెందటం సంచలనం రేకెత్తించింది. పులుల సంచారం పెరిగినా, అటవీ శాఖ యంత్రాంగం అంటీముట్టనట్లు వ్యవహరిస్తోందంటూ స్థానికులను ఆందోళనకు దిగారు.
కుమురం భీం జిల్లా కాగజ్నగర్ మండలం గన్నారం గ్రామానికి చెందిన మోర్లే లక్ష్మీ పులిదాడిలో ప్రాణాలు కోల్పోయింది. ఉదయం వ్యవసాయ కూలీలతో కలిసి చేనుకు వెళ్లిన లక్ష్మి, పత్తి తీస్తుండగా వెనక నుంచి పెద్దపులి దాడి చేసింది. భయాందోళనలకు గురైన కూలీలంతా అరుపులు, కేకలు వేయటంతో పులి సమీప అటవీ ప్రాంతానికి పారిపోయింది. తీవ్రగాయాలైన లక్ష్మిని, సహచర కూలీలు, స్థానికులు హుటాహుటిన కాగజ్నగర్ తీసుకువెళ్లి చికిత్స అందించారు. ప్రాణాలతో కొట్టుమిట్టాడిన ఆ మహిళ చివరకు తుది శ్వాస విడిచింది. లక్ష్మి మృతదేహాన్ని తీసుకుని, గ్రామస్థులు కాగజ్నగర్ అటవీ కార్యాలయం ముందు ధర్నాకు దిగారు. న్యాయం చేయాలంటూ డిమాండ్‌ చేశారు. రెండు నెలలుగా పులుల సంచారం ఉందని తెలిసినా, అటవీ అధికారులు పట్టించుకోలేదంటూ ఆరోపించారు.
మహిళ కుటుంబానికి రూ.10 లక్షల పరిహారం : పులి దాడి ఘటనపై స్పందించిన అటవీశాఖ, మృతి చెందిన మహిళ కుటుంబానికి రూ.10 లక్షల పరిహారం ఇచ్చేందుకు అంగీకారం తెలిపింది. బాధితులతో ఆసిఫాబాద్ డీఎఫ్‌వో శాంతారాం, కాగజ్నగర్ ఆర్డీవో లోకేశ్ చర్చించారు. అంత్యక్రియలకు తక్షణ సాయంగా రూ.20 వేలు ఇచ్చేందుకు అంగీకారం తెలిపారు. మృతురాలి భర్తకు అటవీ శాఖలో వాచర్ ఉద్యోగం ఇచ్చేందుకు సుముఖత వ్యక్తం చేశారు. బాధిత కుటుంబానికి 5 ఎకరాలు ఇవ్వాలని సిఫారసు చేస్తామని అధికారులు హామీ ఇచ్చారు. దీంతో గ్రామస్థులు శాంతించి మహిళ మృతదేహాన్ని పోస్టుమార్టం నిమిత్తం కాగజ్నగర్ ఆసుపత్రికి తరలించారు.
రెండు నెలలుగా పులుల సంచారం ఉందని తెలిసినా : నాలుగేళ్ల కిందట దహేగాం మండలంలోని దిగడలో విఘ్నేశ్, పెంచికల్‌పేట్‌ మండలం కొండపల్లి అటవీప్రాంతంలో నిర్మల అనే యువతి పెద్దపులి దాడిలో మృతి చెందటం అప్పట్లో రాష్ట్రవ్యాప్తంగా సంచలనం సృష్టించింది. ఇకముందు ఎలాంటి ఘటనలు జరగవని అటవీ శాఖ యంత్రాంగం ప్రకటించినా, క్షేత్రస్థాయిలో ఎలాంటి చర్యలు చేపట్టలేదు. పైగా మహారాష్ట్రలోని తాడోబా, తిప్పేశ్వర్‌ అటవీ ప్రాంతాల నుంచి వస్తున్న పెద్ద పులులకు కనీసం స్థావరాలు ఏర్పాటు చేయాలనే దానిపై కూడా అటవీశాఖ దృష్టి పెట్టడం లేదు. దాంతో అటవీ, మైదాన ప్రాంతాల్లో పులుల సంచారం పెరగటం, ఆవులు, మేకలు, గొర్రెలు, చివరికి మనుషుల ప్రాణాలు పోవటానికి కారణమవుతోంది.
ఉమ్మడి ఆదిలాబాద్‌ జిల్లాలోని ఆదిలాబాద్‌, నిర్మల్‌ జిల్లాలకు కలిపి ఓ అటవీ సంరక్షణాధికారి ఆసిఫాబాద్, మంచిర్యాల జిల్లాకు కలిపి మరో అధికారి, కవ్వాల్‌ అభయారణ్యానికి ప్రత్యేకంగా ఫీల్డ్‌ డైరెక్టర్‌ వ్యవస్థ ఉన్నప్పటికీ పులుల సంచారంపై సరైన నిఘా ఉండటం లేదని స్థానికులు ఆరోపిస్తున్నారు. ప్రభుత్వం ప్రత్యేకంగా దృష్టిసారిస్తే తప్పితే, పులుల భయం పోయేలా లేదని ఆవేదన వ్యక్తంచేస్తున్నారు.
ఆ పెద్దపులి మళ్లీ వచ్చేసింది! - బయటకు వెళ్లాలంటే భయపడుతున్న గ్రామస్థులు
'నిను వీడని నీడను నేనే' - వారికి కంటిమీద కునుకు లేకుండా చేస్తున్న చిరుత
