అబ్కారీ పోలీసులమంటూ అక్రమ వసూళ్లు - కోదాడలో ఇద్దరి అరెస్ట్ - Two Fake Abkari Cops Arrested

Two Fake Excise Cops Arrested : ద్విచక్రవాహనంపై వెళ్తున్న ఓ వ్యక్తిపై ఇద్దరు వ్యక్తులు తాము అబ్కారీ పోలీసులమని చెప్పి బెదిరింపులకు పాల్పడి నగదు కాజేశారు. ఈ ఘటన సూర్యాపేట జిల్లా కోదాడ మండలం దొరకుంటలో చోటుచేసుకుంది. వారి ప్రవర్తనపై బాధితుడికి అనుమానం కలగడంతో పోలీసులను ఆశ్రయించాడు. దీంతో రంగంలోకి దిగిన పోలీసులు వారిద్దరినీ అరెస్ట్ చేసి విచారించగా ఇద్దరు నకిలీ పోలీసులను తేలింది.

Two Fake Excise Cops Arrested : ఓ ఇద్దరు వ్యక్తులు నకిలీ పోలీసుల అవతారమెత్తారు. రహదారిపై వెళ్తున్న వ్యక్తులనే లక్ష్యంగా చేసుకుని తాము పోలీసులమని చెప్పి బెదిరింపులకు పాల్పడి ఓ వ్యక్తి వద్దనుంచి డబ్బులను దోచేశారు. బాధితుడు ఇచ్చిన సమాచారంపై రంగంలోకి దిగిన పోలీసులు నిందితులను పట్టుకుని నకీలీ అబ్కారీ పోలీసులుగా తేల్చారు. వారిద్దరినీ న్యాయస్థానంలో హాజరు పరిచారు.

ఇదీ జరిగింది : బాధితుడు, పోలీసులు తెలిపిన కథనం ప్రకారం ఇద్దరు వ్యక్తులు అబ్కారీ శాఖ పోలీసులమంటూ రహదారిపై వెళ్తున్న వ్యక్తిపై బెదిరింపులకు పాల్పడి నగదు కాజేసిన ఘటన సూర్యాపేట జిల్లా కోదాడ మండలం దోరకుంటలో చోటుచేసుకుంది. ఏపీలోని జగ్గయ్యపేట మండలం గండ్రాయికి చెందిన ఇస్మాయిల్ వ్యక్తిగత పనుల కోసం ద్విచక్రవాహనంపై కోదాడకు వచ్చి తిరుగు ప్రయాణం అయ్యాడు. దొరకుంట వద్దకు రాగానే ద్విచక్రవాహనంపై వెళ్తున్న ఇస్మాయిల్​ను నడిగూడెం మండలం రత్నవరానికి చెందిన బెల్లంకొండ వినయ్, కోదాడకు చెందిన మతిన్​లు అడ్డగించారు.

తాము ఆబ్కారీ శాఖ పోలీసులమని, తనిఖీ చేయాలని బెదిరింపులకు పాల్పడ్డారు. కొద్దిసేపు హడావిడి చేసి గంజాయి తాగినట్లు బాధితుడిపై అభియోగం మోపారు. అతని నుంచి రూ. 4500 నగదు, సెల్​ఫోన్​ లాగేసుకుని పరారయ్యారు. వీరి ప్రవర్తన పట్ల అనుమానంతో బాధితుడు పోలీసులను ఆశ్రయించారు. పోలీసులు ఇద్దరిని అదుపులోకి తీసుకుని విచారించి నకిలీ పోలీసులుగా తేల్చారు. నిందితులను రిమాండ్​కు తరలించినట్లు ఎస్సై అనిల్ రెడ్డి పేర్కొన్నారు. ఇద్దరికి గతంలో గంజాయి కేసులో ప్రమేయం ఉన్నట్లు సమాచారం.

Fake RPF SI Arrested in Narketpally : కొద్ది రోజుల క్రితం నార్కట్​పల్లిలో ఇలాంటి ఘటనే జరిగింది. ఓ యువతి ఎలాగైనా తన గ్రామంలో పేరు తెచ్చుకోవాలని పోలీస్​ ఆఫీసర్​గా ప్రజల్లో చలామణి కావాలని నిశ్చయించుకుంది. ఇందుకోసం ఆర్పీఎఫ్​ పోలీసులు ధరించే యూనిఫామ్​ కొనుగోలు చేసి, నకిలీ ఐడీ కార్డును తయారుచేసుకుని రైల్వే పోలీసుల అవతారమెత్తింది. తనకు రైల్వేలో ఎస్సైగా ఉద్యోగం వచ్చిందని తల్లి దండ్రులను, గ్రామస్థులను నమ్మించి ఏడాది కాలంపాటు శంకర్​పల్లి రైల్వే స్టేషన్​కు విధుల నిమిత్తం వెళ్లి వస్తున్నట్లు నటించింది. ఎక్కడికి వెళ్లినా యూనిఫాంలోనే వెళ్తూ ప్రముఖులతో ఫొటోలు దిగూతూ సామాజిక మాధ్యమాల్లో పోస్టు చేసేది. చివరకు పోలీసులకు అడ్డంగా బుక్కైంది.