'గొర్రెల పంపిణీ'పై ఈడీకి వివరాలు ఇవ్వండి - జిల్లా కలెక్టర్లకు రాష్ట్ర పంశు సంవర్ధక శాఖ లేఖ - SHEEP Distribution SCAM UPDATE

TS Govt Letters To All Collector in Sheep Scam : ఈడీ అడిగిన సమాచారన్ని అందించాలని రాష్ట్ర పశు సంవర్ధక శాఖ అన్ని జిల్లాల కలెక్టర్లకు లేఖలు రాసింది. ప్రస్తుతం ఈడీ కోరిన సమాచారం అందుబాటులో లేకపోవడంతో ఆయా జిల్లాల కలెక్టర్ల నుంచి సేకరించి సమగ్ర నివేదిక పంపించాలని నిర్ణయించింది.

TS Govt Letters To All Collector To Provide Information To ED : గొర్రెల పంపిణీ పథకం అక్రమాలపై మనీ లాండరింగ్ నిరోధక చట్టం కింద కేంద్ర ఎన్​ఫోర్స్​మెంట్ డైరెక్టరేట్ విచారణ చేపట్టగా, అడిగిన సమాచారాన్ని ఇవ్వాలని రాష్ట్ర పశు సంవర్ధక శాఖ నిర్ణయించింది. సర్కార్ ఆదేశాల మేరకు ఈడీ కోరిన సమాచారం వెంటనే అందించాలని రాష్ట్ర గొర్రెలు, మేకల అభివృద్ధి సహకార సమాఖ్య అన్ని జిల్లాల కలెక్టర్లకు శుక్రవారం లేఖ రాసింది. పశు సంవర్ధక శాఖ ముఖ్య కార్యదర్శి, ఇన్​ఛార్జీ సంచాలకుడు సబ్యసాచి ఘోష్​ను సచివాలయంలో శుక్రవారం సమాఖ్య ఇన్​ఛార్జీ ఎండీ సుబ్బరాయుడు కలిశారు.

ED Focused on Sheep Scam in Telangana : ఈడీ కోరిన వివరాలు రాష్ట్ర కార్యాలయంలో అందుబాటులో లేవని, జిల్లా పాలనాధికారి వద్ద ఉన్నాయని ముఖ్య కార్యదర్శికి ఎండీ చెప్పారు. దీంతో అక్కడి నుంచి సమాచారం సేకరించి ఈడీకి ఇవ్వాలని నిర్ణయించారు. దీంతో ముఖ్య కార్యదర్శి ఆదేశాల మేరకు సుబ్బరాయుడు అన్ని జిల్లాల కలెక్టర్లకు లేఖలు రాశారు. 2017 నుంచి 2024 వరకు పథకానికి సంబంధించి పూర్తి సమాచారం ఇవ్వాలని పేర్కొన్నారు. ఈ పథకంలో జరిగిన అవినీతిపై అంతర్గత నివేదికలతో కూడిన సమాచారాన్ని కూడా పంపించాలని ఆదేశించారు.

సమగ్ర నివేదికపై కసరత్తు : జిల్లాల నుంచి సమాచారం వచ్చాక సమాఖ్య ఎండీ కార్యాలయంలో వాటిని క్రోడీకరించి రాష్ట్ర ప్రభుత్వానికి, ఈడీకి సమగ్ర నివేదిక అందించనున్నారు. శుక్రవారం ఈడీ అధికారులు విచారణ కోసం ఎండీ కార్యాలయానికి వస్తారన్న సమాచారంలో అక్కడ హడావిడి వాతావరణ పరిస్థితి ఏర్పడింది. మీడియా ప్రతినిధులు పెద్దఎత్తున అక్కడికి చేరుకున్నారు. కానీ ఆ కార్యాలయానికి ఈడీ అధికారులు ఎవరూ రాలేదు.

Sheep Distribution Scam in Telangana : ఓ వైపు గొర్రెల కొనుగోళ్ల పేరిట దాదాపు రూ.700 కోట్ల కుంభకోణం జరిగిందన్న ఆరోపణలపై ఇప్పటికే ఏసీబీ విచారణ చేస్తోంది. మరోవైపు ఇప్పుడు ఈడీ రంగంలోకి దిగింది. భారీగా డబ్బు చేతులు మారినట్లు అభియోగాలు వెల్లువెత్తడం, ఇతర రాష్ట్రాల్లోనూ లింకులు ఉండటంతో ఇందులో మనీ లాండరింగ్‌ కోణంపై ఎన్‌ఫోర్స్‌మెంట్ డైరెక్టరేట్ దర్యాప్తు చేయనుంది. జిల్లాల వారీగా లబ్ధిదారుల పేర్లు, వారి అడ్రస్‌లు, ఫోన్‌ నంబర్లు, బ్యాంకు ఖాతాల వివరాలు తదితర సమాచారం ఇవ్వాలని ఈడీ కోరింది.