భూ వివాదం - తహసీల్దార్​ కార్యాలయంలోనే చితక్కొట్టుకున్న ఇరువర్గాలు

తహసీల్దార్ కార్యాలయ ఆవరణలో ఉద్రిక్తత - ఓ భూ వివాదంలో పరస్పరం దాడులు చేసుకున్న ఇరువర్గాలు

Hanumakonda MRO Office Conflict : హనుమకొండ జిల్లా ఎల్కతుర్తి తహసీల్దార్ కార్యాలయ ఆవరణ ఎదుట తీవ్ర ఉద్రిక్తత పరిస్థితి తలెత్తింది. ఓ భూ వివాదంలో తహసీల్దార్ కార్యాలయ ఆవరణలోనే ఇరు వర్గాలు పరస్పరం తీవ్రమైన దాడులు చేసుకున్నాయి. దీంతో ఈ ఘర్షణలో మొత్తం 8 మందికి గాయాలు కాగా అందులో ఇద్దరు తీవ్రంగా గాయపడ్డారు. ఈ దాడుల సమాచారం అందుకున్న పోలీసులు తహసీల్దార్ కార్యాలయానికి వచ్చేలోపే ఇరువర్గాల వారు తీవ్రంగా దాడి చేసుకుని గాయపడ్డారు. తీవ్రంగా గాయపడ్డ వారిలో మారుపాక ఆనందం అనే వృద్ధుడి తల పగిలి తీవ్ర రక్తస్రావం అయ్యింది.

భూవివాదంలో తలెత్తిన వివాదం: పరిస్థితి విషమంగా ఉండడంతో 108 వాహనంలో వరంగల్​ ఎంజీఎం ఆసుపత్రికి తరలించారు. తహసీల్దార్ కార్యాలయంలో అందరూ చూస్తుండగానే ఇరువర్గాలు చితక్కొట్టుకోవడంతో కార్యాలయ సిబ్బంది, అక్కడికి వివిధ పనుల కోసం వచ్చిన ప్రజలు తీవ్ర భయాందోళనకు గురయ్యారు. వివాదం నడుస్తున్న భూమిని రిజిస్ట్రేషన్ చేసుకోవడానికి ఓ వర్గం రాగా, విషయం తెలుసుకున్న మరో వర్గం వారు వచ్చి అడ్డుకోవడంతో గొడవ చెలరేగి పరస్పరం దాడులు చేసుకున్నట్లు సమాచారం. ఈ ఘటనపై కేసు నమోదు చేసి దర్యాప్తు చేస్తున్నట్లు పోలీసులు వెల్లడించారు.