రాష్ట్ర బడ్జెట్‌ 2024 - విద్యా, ఇంధన రంగాలకు కేటాయింపుల పూర్తి వివరాలివే - telangana state 2024 budget

Telangana State 2024 Budget Highlights : రాష్ట్ర ప్రభుత్వం ప్రవేశపెట్టిన పూర్తి స్థాయి 2024 బడ్జెట్‌లో విద్య, ఇంధనశాఖ రంగాలపై ప్రత్యేక దృష్టిసారించింది. గతేడాది కంటే ఈసారీ పెద్దఎత్తున నిధులను కేటాయించింది. ఇందులో విద్యారంగానికి రూ. 21,292 కోట్లు కేటాయించగా, ఇంధనశాఖకు రూ.16,410 కోట్ల రూపాయలను కేటాయించింది.

Telangana State 2024 Budget : రాష్ట్రంలో నిరంతర విద్యుత్ సరఫరా అందించేందుకు ప్రభుత్వం ఇంధనశాఖకు బడ్జెట్‌లో పెద్దపీట వేసింది. ఈ నేపథ్యంలో విద్యుత్‌ శాఖకు భారీగా నిధులు కేటాయించింది. గతేడాది బడ్జెట్‌లో 12,727 కోట్ల రూపాయలు కేటాయించగా, భవిష్యత్ అవసరాలను దృష్టిలో ఉంచుకుని ఈసారీ 16,410 కోట్ల రూపాయలను కేటాయించింది. గృహజ్యోతి పథకం కింద 200ల యూనిట్ల వరకు ఉచిత విద్యుత్‌ను అందజేస్తున్న నేపథ్యంలో ఆ రాయితీని కూడా బడ్జెట్‌లో కేటాయింపులు చేశారు.

గృహజ్యోతి పథకానికి నిధులు.. ఈ పథకానికి ప్రత్యేకంగా 2,418 కోట్ల రూపాయలను కేటాయించింది. గృహజ్యోతి పథకం కింద అర్హులైన లబ్దిదారులకు డిస్కంలు గత మార్చి ఒకటో తేది నుంచి జీరో బిల్లులు జారీ చేస్తున్నాయి. ఈ బిల్లుల చెల్లింపుల కింద డిస్కంలకు 2,418 కోట్ల రూపాయలను విడుదల చేసేందుకు వీలుగా బడ్జెట్ కేటాయింపులు చేశారు. ఈ పథకం కింద జూలై 15 నాటికి 45,81,676 ఇళ్లకు జీరో బిల్లులు జారీ అయినట్లు బడ్జెట్ సందర్భంగా ప్రభుత్వం తెలిపింది.

పెరుగుతున్న విద్యుత్ డిమాండ్‌ను దృష్టిలో పెట్టుకుని ట్రాన్స్ మిషన్ నష్టాలు తగ్గించాలని దృష్టిసారించినట్లు ప్రభుత్వం స్పష్టం చేసింది. నెట్‌వర్క్‌ను బలోపేతం చేయడానికి ప్రస్తుత ఆర్థిక సంవత్సరంలో సబ్ స్టేషన్ల నిర్మాణం, హైఓల్టేజీ పవర్ ట్రాన్స్ ఫార్మర్ల సామర్థ్యం పెంపునకు 3,017 కోట్లతో ప్రణాళికలు రూపొందించినట్లు ప్రభుత్వం తెలిపింది. కొత్తగా పవర్ పంప్డ్ స్టోరేజ్ ప్లాంట్ల ఏర్పాటుకు చర్యలు తీసుకుంటున్నారు. ప్రజలకు చార్జింగ్ సౌకర్యాలను సులభంగా అందుబాటులోనికి తీసుకురావడానికి టీ.జీ.ఈ.వీ మొబైల్ యాప్ ను అందుబాటులోకి తీసుకురావాలని చూస్తుంది.

విద్యారంగంపై స్పెషన్‌ ఫోకస్‌.. రాష్ట్రంలో విద్యారంగం పటిష్ఠతకు రూ. 21,292 కోట్ల బడ్జెట్‌ కేటాయిస్తున్నట్లు ప్రభుత్వం తెలిపింది. ఇందులో జనరల్ ఎడ్యుకేషన్‌ కోసం రూ. 3వేల 619కోట్ల 11లక్షలు, డైరెక్టర్ ఆఫ్ స్కూల్ ఎడ్యుకేషన్‌కి 925 కోట్ల 73 లక్షలు, ప్రభుత్వ పరీక్షల నిర్వహణకు రూ. 7 కోట్ల 50 లక్షలు, సమగ్ర శిక్షా అభియాన్‌కి రూ, 1952కోట్లు కేటాయిస్తున్నట్లు స్పష్టం చేసింది. విశ్వవిద్యాలయాల్లో మౌలిక వసతుల కల్పనకు 500 కోట్లు కేటాయించినట్లు తెలిపింది.

ఇందులో రూ. వంద కోట్లు ఉస్మానియా విశ్వవిద్యాలయానికి, మరో వంద కోట్లు మహిళా విశ్వవిద్యాలయాల్లో మౌలిక వసతుల కల్పనకు, మిగతా నిధులు కాకతీయ సహా ఇతర వర్శిటీలకు ఇవ్వనున్నట్లు స్పష్టం చేసింది. యువతకు నైపుణ్య శిక్షణకు టాటా టెక్నాలజీతో ఒప్పందం చేసుకుని, ఇందులో భాగంగా ఆరు కొత్త కోర్సులను ప్రవేశపెడుతున్నట్లు తెలిపారు. ఈ ప్రాజెక్టుకు బడ్జెట్‌లో 300 కోట్లు కేటాయించినట్లు ప్రభుత్వం తెలిపింది.