ఎస్సీ వర్గీకరణపై ఏకసభ్య కమిషన్ - ఉత్తర్వులు జారీ

స్సీ వర్గీకరణపై సిఫార్సుల కోసం హైకోర్టు విశ్రాంత జడ్జి జస్టిస్ షమీమ్ అక్తర్‌ కమిషన్ - 60 రోజుల్లో నివేదిక సమర్పించాలని కమిషన్‌కు ప్రభుత్వం సూచన

One Man Commission For SC Classification : ఎస్సీ వర్గీకరణపై సిఫార్సులు చేసేందుకు ఏకసభ్య కమిషన్​ను ప్రభుత్వం నియమించింది. హైకోర్టు విశ్రాంత న్యాయమూర్తి జస్టిస్ షమీమ్ అఖ్తర్​ను నియమిస్తూ ఉత్తర్వులు జారీ చేసింది. బాధ్యతలు చేపట్టిన తర్వాత అరవై రోజుల్లో నివేదిక సమర్పించాలని కమిషన్​కు ప్రభుత్వం స్పష్టం చేసింది. ఎస్సీలను, ఉపకులాలను గ్రూపులుగా వర్గీకరించి ఇప్పుడున్న రిజర్వేషన్​ను విభజిస్తూ కమిషన్ ప్రభుత్వానికి సూచించనుంది. ఉపకులాల వారీగా ఎస్సీల వెనకబాటుతనాన్ని అధ్యయనం చేయాలని కమిషన్​కు ప్రభుత్వం తెలిపింది. 60 రోజుల్లో నివేదిక సమర్పించాలని కమిషన్​ను కోరింది.

ఆ అంశాలు కూడా పరిగణనలోకి తీసుకోవాలి : విద్య, ఉద్యోగాల్లో ప్రాతినిధ్యంతో పాటు సామాజిక, ఆర్థిక, రాజకీయ వెనకబాటును కూడా పరిశీలించాలని పేర్కొంది. ఎస్సీ వర్గీకరణపై ఆగస్టు 1న సుప్రీంకోర్టు తీర్పునకు అనుగుణంగా చేపట్టాల్సిన చర్యలను సిఫార్సు చేయాలని కమిషన్​కు ప్రభుత్వం తెలిపింది. కమిషన్​కు అవసరమైన సదుపాయాలు కల్పించాలని ఎస్సీ అభివృద్ధి సంస్థ కమిషనర్​ను ఆదేశించింది. కమిషన్​కు అవసరమైన సమాచారాన్ని అందచేయాలని వివిధ శాఖలకు ప్రభుత్వం స్పష్టం చేసింది.

కమిషన్ నివేదిక వచ్చాకే జాబ్​ నోటిఫికేషన్లు : ఎస్సీ వర్గీకరణపై ఏకసభ్య కమిషన్​ నివేదిక ఇచ్చిన తర్వాత మాత్రమే కొత్త ఉద్యోగ నోటిఫికేషన్లు ఇవ్వాలని సీఎం రేవంత్ రెడ్డి నేతృత్వంలోని ప్రభుత్వం ఇటీవల నిర్ణయించింది. ఈ నేపథ్యంలోనే ఎస్సీ వర్గీకరణపై ఏకసభ్య న్యాయ కమిషన్​ ఏర్పాటు ప్రక్రియను పూర్తి చేశారు. మరోవైపు ఎస్సీ వర్గీకరణపై సుప్రీంకోర్టు తీర్పును అమలు చేసేందుకు అవసరమైన చర్యలు చేపట్టాలని అధికారులకు సీఎం రేవంత్​ రెడ్డి ఇప్పటికే ఆదేశించారు. ఎస్సీ వర్గీకరణ కోసం 2011 జనాభా లెక్కలను ప్రాతిపదికగా తీసుకోవాలని మార్గనిర్దేశం చేశారు. ఉపకులాల వారీగా ఎస్సీల వెనకబాటుతనాన్ని కమిషన్​ సమగ్రంగా అధ్యయనం చేసి సిఫార్సులు చేయనుంది.

ఎస్సీ వర్గీకరణపై సుప్రీం తీర్పు ఏంటంటే? : షెడ్యుల్డ్ కులాల రిజర్వేషన్ల వర్గీకరణకు సంబంధించి కొద్ది రోజుల క్రితం అత్యంత కీలకమైన తీర్పునిచ్చింది సుప్రీంకోర్టు. 2 దశాబ్దాలుగా నలుగుతున్న వ్యాజ్యానికి ఓ ముగింపునిస్తూ వర్గీకరణకు మార్గం సుగమం చేసింది సర్వోన్నత న్యాయస్థానం. సామాజిక స్థితిగతుల ఆధారంగా ఇచ్చిన రిజర్వేషన్ల కోటాలో ఎవరి వాటా ఎంతో నిర్ణయించే అధికారం రాష్ట్రాలకు ఉంటుందని స్పష్టం చేస్తూ తీర్పునిచ్చింది సీజేఐ నేతృత్వంలోని ఏడుగురు సభ్యుల ధర్మాసనం.