జూన్​4న ఉదయం 8 గంటలకు ఓట్ల లెక్కింపు ప్రారంభం : సీఈవో వికాస్​రాజ్ - CEO Vikas Raj on Press Meet

TG CEO Vikas Raj on Election Vote Counting Arrangements : జూన్​ 4న ఉదయం 8 గంటలకు ఓట్ల లెక్కింపు, మొదటగా పోస్టల్​ బ్యాలెట్ల లెక్కింపు ఉంటుందని సీఈవో వికాస్​రాజ్​ వెల్లడించారు. కౌంటింగ్​ కేంద్రంలోకి ఎలక్ట్రానిక్​ పరికరాలు తీసుకెళ్లేందుకు అనుమతి లేదని సీఈవో వికాస్​రాజ్​ అన్నారు. ఎన్నికల లెక్కింపు దగ్గర 4 అంచెల భద్రత ఉంటుందని తెలిపారు. హైదరాబాద్​లోని బీఆర్కే భవన్​లో జరిగిన మీడియా సమావేశంలో ఆయన మాట్లాడారు.

Telangana Chief Electoral Officer Vikas Raj Press Meet : జూన్​ 4న ఉదయం 8 గంటలకు ఓట్ల లెక్కింపు ప్రారంభమవుతుందని సీఈవో వికాస్​రాజ్​ తెలిపారు. మొదటగా 8 గంటలకు పోస్టల్​ బ్యాలెట్లు లెక్కింపు ప్రారంభమవుతుందన్నారు. ఉదయం 8.30 గంటలకు ఈవీఎంల ఓట్ల లెక్కింపు ప్రారంభంకానుందని వివరించారు. హైదరాబాద్​లోని బీఆర్కే భవన్​లో జరిగిన మీడియా సమావేశంలో ఆయన మాట్లాడారు.

కౌంటింగ్​ కేంద్రం వద్ద 4 అంచెల భద్రత ఉంటుందని సీఈవో వికాస్​రాజ్ తెలిపారు. కౌంటింగ్​ కేంద్రంలోకి ఎలక్ట్రానిక్​ పరికరాలు తీసుకెళ్లేందుకు అనుమతి లేదని స్పష్టం చేశారు. కౌంటింగ్​ ఏజెంట్ల వద్ద, సిబ్బంది వద్ద కూడా సెల్​ఫోన్లు ఉండవని చెప్పారు. కౌంటింగ్​ కేంద్రంలో ప్రతి మూల కవర్​ చేసేలా సీసీ కెమెరాల నిఘా ఉంటుందని తెలిపారు. స్ట్రాంగ్​ రూమ్​ నుంచి లెక్కింపు కేంద్రం వరకు, బారికేడ్లు, పటిష్ఠ భద్రత ఉంటుందన్నారు.

రాష్ట్రంలో ఇప్పటివరకు 2.17 లక్షల పోస్టల్​ బ్యాలెక్టు వచ్చాయని సీఈవో వికాస్​రాజ్​ వివరించారు. పోస్టల్​ బ్యాలెట్ల లెక్కింపు కోసం 276 టేబుళ్లు ప్రత్యేకంగా ఉంటాయన్నారు. మూడు అసెంబ్లీ సెగ్మెంట్లలో అత్యధికంగా 24 రౌండ్లలో లెక్కింపు ఉంటుందన్నారు. మూడు అసెంబ్లీ సెగ్మెంట్లలో అత్యల్పంగా 13 రౌండ్ల లెక్కింపు ఉంటుందని సీఈవో వికాస్​ రాజ్​ పేర్కొన్నారు. ఓట్ల లెక్కింపులో దాదాపు 10 వేల మంది సిబ్బంది పాల్గొంటారన్నారు. సెగ్మెంట్ల వారీగా ఓట్ల లెక్కింపు సిబ్బందిని ర్యాండమ్​గా కేటాయిస్తామని అన్నారు. లెక్కింపు రోజు ఉదయం 5 గంటలకు మరోసారి ర్యాండమ్​గా సిబ్బందిని కేటాయిస్తామని సీఈవో వికాస్​రాజ్​ అన్నారు. 2400కు పైగా మైక్రో అబ్జర్వర్లు ఉంటారని సీఈవో వికాస్​రాజ్​ స్పష్టం చేశారు.

"12 కంపెనీల కేంద్ర బలగాలు స్ట్రాంగ్​ రూంల వద్ద భద్రత నిర్వహిస్తున్నారు. వీళ్లు కౌంటింగ్​ టైం వరకు ఉంటారు. గతంలో లాగా ఈసారి కూడా అవుటర్​ మోస్ట్​ సెక్యూరిటీ ఉంటుంది. కౌంటింగ్​ జరిగే ప్రాంతం నుంచి 100 మీటర్ల ప్రాంతం వరకు ట్రాఫిక్​ను నియంత్రణ చేస్తుంటారు. ఈ తతంగం అంతా స్టేట్​ పోలీసులు చూసుకుంటారు. ఎవరైనా లోపలికి వెళ్లాలంటే ఐడీ కార్డులు చెక్​ చేస్తారు. కౌంటింగ్​ గేటు వద్ద స్టేట్​ అండ్​ పోలీసులు ఉంటారు. కౌంటింగ్​ లోపల 12 కంపెనీల కేంద్ర బలగాలు ఉంటాయి. ఇలా బందోబస్తు ఏర్పాటు చేయడం జరిగింది." - వికాస్​రాజ్, సీఈవో

హైదరాబాద్​లో 1200 మంది సిబ్బంది ఎన్నికల విధుల్లో : హైదరాబాద్, సికింద్రాబాద్​ పార్లమెంటు, సికింద్రాబాద్​ కంటోన్మెంట్​ ఉపఎన్నికల కౌంటింగ్​ ఏర్పాట్లు పూర్తి చేశామని జీహెచ్​ఎంసీ కమిషనర్​ రోనాల్డ్​రాస్​ తెలిపారు. హైదరాబాద్​ జిల్లాలో 13 ప్రాంతాల్లో 16 హాల్స్​లో కౌంటింగ్​ చేస్తామని, మూడు చోట్ల పోస్టల్​ బ్యాలెట్ ఓట్ల లెక్కింపు చేస్తామని తెలిపారు. నిజాం కాలేజీలో పార్లమెంటు ఓట్ల లెక్కింపు ఏర్పాట్లను కమిషనర్​ రోనాల్డ్​ రాస్​ పరిశీలించారు. అసెంబ్లీ సెగ్మెంట్ల వారిగా ఓట్ల లెక్కింపు ఉంటుందన్నారు. ప్రతి కౌంటింగ్​ హాల్స్​ 14 టేబుల్స్​ ఏర్పాటు చేసినట్లు చెప్పారు.

జూబ్లీహిల్స్​లో 20 టేబుల్స్​ ఉంటాయని, యాకత్​పురలో అత్యధికంగా 24 రౌండ్స్​లో ఓట్ల లెక్కింపు ఉంటుందన్నారు. అలాగే చార్మినార్​ నియోజకవర్గంలో 15 రౌండ్లు, సికింద్రాబాద్​ కంటోన్మెంట్​ ఉప ఎన్నికల ఓట్ల లెక్కింపులో 17 రౌండ్లు ఉంటాయని చెప్పారు. మొత్తం 1200 మంది సిబ్బంది ఎన్నికల విధుల్లో ఉండనున్నారు. ప్రతి రౌండ్​కు 30 నిమిషాల సమయం పడుతుందని అన్నారు.