వింటేజ్​ కార్ల ఎగ్జిబిషన్ - మీరు ఇప్పటివరకు చూడని కార్లన్నీ ఇక్కడ చూసేయొచ్చు - ఎంట్రీ కూడా ఫ్రీ

వింటేజ్ కార్లను చూసేందుకు భారీగా తరలివచ్చిన జనాలు - ప్రేక్షకులను విశేషంగా ఆకట్టుకుంటున్న పాత కార్లు, మోటార్ సైకిళ్లు

Vitage Cars Show in Secunderabad : కాలం ముందుకు వెళుతున్న కొద్దీ పాత వాటికి విలువ పెరుగుతూ ఉంటుంది. అది వస్తువులైనా, మనుషుల మధ్య బంధాలైనా. మరీ ముఖ్యంగా ఇప్పట్లో అందుబాటులో లేని వాటికైతే ఆ విలువ అమూల్యం. వందల కిలోమీటర్లు అయినా కాలినడకనే ప్రయాణం సాగించిన కాలంలో వాడిన కార్లు, జీపులు నేటి తరం వాళ్లకి ఎంతో గొప్పగా అనిపిస్తాయి. అలాంటి వింటేజ్ కార్లతో కాఫీ అండ్ కార్స్ అనే సంస్థ సికింద్రాబాద్​లో ప్రదర్శన ఏర్పాటు చేశారు. శతాబ్దం కిందటి కాలం నాటి ఈ వాహనాలను చూసేందుకు సందర్శకులు భారీగా వస్తున్నారు.

వింటేజ్ కార్లు హైదరాబాద్​లో మనకు పెళ్లి ఊరేగింపుల సందర్భంలో అప్పుడప్పుడు రోడ్లపై కనివిందు చేస్తాయి. అయితే అవి కూడా కొన్ని మాత్రమే కొద్ది ప్రాంతాలకు మాత్రమే పరిమితం. వాటి అద్దెలు కూడా చాలా ఎక్కువే ఉంటాయి. అయినప్పటికీ ప్రత్యేకత కోసం వాటిని పెళ్లి బరాతిలో వినియోగిస్తారు. ఇక నిజాం కాలంలో వాడిన కారులైతే బయట ఎక్కడా అందుబాటులో ఉండవు. మ్యూజియంలో మాత్రమే మనం వాటిని చూడగలం. ఇలాంటి అపురూపమైన నాటి కాలపు కార్లను నేటి తరం వాళ్లకు చూపెట్టేందుకు సికింద్రాబాద్​లో కార్స్ అండ్ కాఫీ అనే సంస్థ వ్యవస్థాపకుడు దీపక్ గతేడాది నుంచి దీనిని కొనసాగిస్తున్నారు.

ప్రతి ఆదివారం ఫ్రీ : హైదరాబాద్ హెరిటేజ్​ను ప్రపంచానికి చూపెట్టేందుకు దీనిని ప్రారంభించానని ఆయన తెలిపారు. ఇక్కడ ఏర్పాటు చేసే ప్రదర్శనలో కొన్ని కంపెనీలతో పాటుగా సిటిజన్లు తమ దగ్గర ఉన్న వాహనాలను ఉచితంగానే ప్రదర్శనలో పెడతారని తెలిపారు. ప్రతి ఆదివారం ఈ కార్యక్రమాన్ని నిర్వహిస్తున్నామని కారు, బైక్ ప్రియులకు వింటేజ్ ఫీల్​ను తీసుకు రావటానికే ఈ ఎగ్జిబిషన్​ను ప్రారంభించానని తెలిపారు. ఎంట్రీ కూడా ఫ్రీ ఉండటంతో ప్రజల నుంచి మంచి ఆదరణ ఉందని ఆయన తెలిపారు.

ఆ ఎగ్జిబిషన్​లో 1931లో ఉపయోగించిన కారు నుంచి ప్రస్తుత కాలంలో వాడుతున్న మోడల్ వరకు వందకు పైగా మోడల్​, వింటేజ్ కార్లు, బైక్​లను ప్రదర్శనలో పెట్టారు. ఎంతో చూడముచ్చటగా, ఠీవీగా ఉన్న వీటిని చూసేందుకు నగర నలుమూలల నుంచి ప్రజలు భారీగా తరలివస్తున్నారు. వాటి పక్కన నిలబడి ఫొటోలు దిగుతూ వాటి ప్రత్యేకతలను నిర్వాహకులను అడిగి తెలుసుకుంటున్నారు. మరుగున పడిపోయిన వింటేజ్ కార్లను చూసినప్పుడు, అప్పటి టెక్నాలజీ అర్థమవుతోందని, అలాగే అప్పటి మోడల్స్ చూడటానికి చాలా ఆకర్షణగా ఉన్నాయని, ఇలాంటి కార్యక్రమాలు పిల్లలకు కూడా ఎంతో ఉపయోగకరమని ప్రజలు అంటున్నారు. ఈ ఆదివారం నిర్వహించిన కార్యక్రమంలో 1931లో తయారైన కారుతో పాటుగా ప్రపంచ యుద్ధం సమయంలో ఉపయోగించిన కార్లను కూడా ప్రదర్శనలో పెట్టారు.