Special Story on Digital Arrest in Cyber Crime : సైబర్ క్రైమ్ బారిన పడ్డవారి గురించి తెలిసిన వారు ఎవరైనా ముక్కూముఖం తెలియన వాడు ఫోన్ చేస్తే భయపడి ఉన్నదంతా ఊడ్చి ఇచ్చేస్తారా? అనే సందేహం వస్తుంది. కొందరైతే అలా జరిగి ఉండదులే అని కొట్టిపారేస్తారు. అక్కడ వాస్తవం ఏమిటంటే సైబర్ నేరగాళ్లు బాధితుడికి కాల్ చేసి, వారు చెప్పింది వినేది తప్ప మరో పరిస్థితి కల్పించరు. బెదిరిస్తారు, కేసులంటారు, జైలు ఇలా నానారకాలుగా ఇబ్బందులకు గురిచేస్తారు. బయటే పోలీసులు ఉన్నారు, మీరు కాల్ కట్ చేస్తే వారు వచ్చి అరెస్టు చేస్తారంటూ భయపెడతారు. దీంతో బాధితుడు ఏమీ చేయలేక నేరగాళ్ల వలలో పడతారు. దీన్నే 'డిజిటల్ అరెస్టు' అంటారు.
- హైదరాబాద్ అడిక్మెట్కు చెందిన వృద్ధురాలికి గత నెలలో ముంబయి పోలీసుల పేరిట ఓ వ్యక్తి కాల్ చేశాడు. సినీ నటి శిల్పాశెట్టి దంపతులకు సంబంధించిన మనీలాండరింగ్ సొమ్ము మీ బ్యాంకు ఖాతాలో జమయిందని, ఎఫ్ఐఆర్ కూడా నమోదైందని బెదిరించాడు. తనని ‘డిజిటల్ అరెస్టు’ చేశామని బెదిరించాడు. అనంతరం బాధితురాలి బ్యాంకు ఖాతా, ఎఫ్‌డీలు, పీపీఎఫ్‌ ఖాతాల్లోని రూ.5.9 కోట్ల సొమ్మును వేరే అకౌంట్కు బదిలీ చేయించుకున్నాడు.
- హైదరాబాద్ శివారు ప్రాంతం రామచంద్రాపురం భెల్‌ టౌన్‌షిప్‌ సమీపంలో నివసించే వృద్ధుడికి(80) మే నెల 19న వాట్సప్‌ వీడియోకాల్‌ వచ్చింది. మనీలాండరింగ్కు పాల్పడ్డారని, కేసు నమోదైందని బెదిరింపులకు దిగాడు. మే నెల 20 నుంచి జూన్ 20వరకు పలు విడతలుగా రూ.4.98కోట్ల సోమ్మును కాజేశారు.
- నాచారంలోని ట్రాన్స్‌కో విశ్రాంత సీఈ(75)కి జూన్ 13న ముంబయి టెలికాం శాఖ పేరిట ఫోన్ చేశారు. మీ పేరిట తీసుకున్న సిమ్‌ను వినియోగించి ఓ వ్యక్తి మనీలాండరింగ్కు పాల్పడ్డాడు, ఈ కేసులో మీరే నిందితులు అని బెదిరించి రూ.4.82 కోట్లు బదిలీ చేయించుకున్నాడు.
యాక్షన్ ఇలా మొదలు : బాధితులను ఎలా నమ్మిస్తారంటే ముందుగా గుర్తు తెలియని వ్యక్తి పోలీస్ వేషధారణలో స్కైప్ లేదా వీడియో కాల్ చేస్తారు. తనను తాను పోలీస్ ఉన్నతాధికారిగా పరిచయం చేసుకుంటాడు. మనీలాండరింగ్ కేసుకు సంబంధించి మీ బ్యాంకు ఖాతాలో సొమ్ము జమయిందని చెప్తారు. ఎఫ్ఐఆర్ నమోదైందని చెబుతూ సదరు కాపీని వాట్సాప్కు పంపిస్తారు.
అందులో బాధితుడి సంబంధించి బ్యాంకు ఖాతా నంబరు, అందులో నగదు జమైనట్టు నకిలీ వివరాలు ఉంటాయి. దీంతో బాధితుడు కంగుతింటాడు. దేశ భద్రతకు సంబంధించి తీవ్ర నేరంగ కావడంతో తప్పుక అరెస్టు అవుతారని, ఈ కేసులో బెయిల్ కూడా దొరకదని, నెలల తరబడి జైల్లో ఉండాల్సి ఉంటుందని అవతలి వ్యక్తి భయపెటతాడు. దీంతో బాధితుడు ఏమీ చేయలేక చెప్పింది చేస్తాడు.
ఒకవేళ తనకు ఆ నేరంతో ఎలాంటి సంబంధం లేదని బాధితుడు మొరపెట్టుకుంటున్న అవతలి వ్యక్తి మాత్రం తన పంథాను మార్చుకోకుండా బెదిరిస్తూనే ఉంటాడు. ముంబయి క్రైమ్ బ్రాంచ్కు ఫోన్కాల్ బదిలీ చేస్తున్నామని చెబుతాడు, మరోవ్యక్తి కాల్లో కనెక్ట్ అవుతాడు. తాను కూడా సైబర్ క్రైమ్ ఎస్పీ లేదా ఉన్నతాధికారిగా పరిచయం చేసుకుంటాడు.
బాత్రూమ్కి వెళ్లినా డోర్ తెరిచే వెళ్లాలంటూ : మీరు డిజిటల్ అరెస్టు అయ్యారని, విచారణకు సహకరించారని, కేసులో వారికి ఎలాంటి సంబంధం లేదని తేలితే వదిలేస్తామని చెబుతారు. విచారణ పూర్తయ్యేవరకు వీడియో కాల్ ఆఫ్‌ చేయొద్దని, మరెవరితోనూ మాట్లాడొద్దని, మలమూత్ర విసర్జనకు వెళ్లినా తలుపు తెరిచే ఉంచాలంటూ ఇలా వివిధ షరతులు విధిస్తాడు. మీ ఇంటిబయట మా పోలీసుల నిఘా ఉందని, వీడియో కాల్ ఆపిన క్షణంలో బయట ఉన్న పోలీసులు అరెస్టు చేసి ముంబయికి తీసుకొస్తారని హెచ్చరిస్తారు.
ఆర్బీఐ ఖాతాలోకి డబ్బులు అంటూ : నేరం చేయలేదని నిరూపించుకోవాలంటే ఆర్బీఐ ఏర్పాటు చేసిన ఖాతాలోకి మీ సొమ్మునంతా బదిలీ చేయాలని చెబుతారు. నేరంలో మీరు ప్రమేయం లేదని తేలితే డబ్బు తిరిగి బదిలీ చేస్తామని నమ్మబలుకుతారు. అప్పటికే నేరస్థుల మాయా వలయంలో చిక్కుకున్న బాధితుడు, ఇటు బెదిరిపులకు భయపడి, కేసు కావొద్దనే ఆలోచనలోకి తీసుకువెళ్తారు. దీంతో మూడో కంటికి తెలియకుండా తన ఖాతాలోని సొమ్మును వాళ్లు సూచించిన ఖాతాలోకి జమచేసేందుకు సిద్ధపడతాడు.
బ్యాంకుకు వెళ్లి మరీ తన ఖాతాలోని నగదు, ఎఫ్‌డీలు, షేర్లు ఇలా మొత్తం సొమ్మును నేరస్థులు సూచించిన ఖాతాకు ట్రాన్స్ఫర్ చేస్తారు. నిమిషాలు గంటలు రోజుల తరబడి ఇలా నేరస్థులు చెప్పినట్టల్లా తలూపుతూ యావదాస్తి సమర్పించుకున్న వాళ్లూ చాలామంది ఉన్నారని పోలీసులు చెబుతున్నారు. బాధితులు ఇంత జరుగుతున్నా ఈ విషయాన్ని ఎవరితో పంచుకోవడం లేదు. చివరకు కుటుంబ సభ్యులకు, స్నేహితులకు చెప్పడం లేదు. అలా వారు ఎవ్వరికి చెప్పకుండా కట్టడి చేయడనే సైబర్ నేరస్థుల వ్యూహమని ఈ తరహా కేసులు దర్యాప్తు చేస్తున్న పోలీస్ అధికారి తెలిపారు.
డిజిటల్ అరెస్టులు ఉండవు : ఈ తరహా నేరాలు పెరగడంతో ఇండియన్‌ సైబర్ క్రైమ్ కో-ఆర్డినేషన్‌ సెంటర్‌(ఐ4సీ), తెలంగాణ సైబర్ సెక్యూరిటీ బ్యూరో(టీజీసీఎస్‌బీ) అప్రమత్తమయ్యాయి. ప్రజలు సైబర్ నేరాలపట్ల అప్రమత్తంగా ఉండాలని హెచ్చరిస్తున్నాయి. ఎలాంటి నేరంలోనైనా డిజిటల్ అరెస్టులు ఉండవని తెలిపాయి. అలా ఎవరైనా బెదిరించారంటే మోసం చేస్తున్నట్లేనని గుర్తుంచుకోవాలని సూచించాయి. ఎట్టి పరిస్థితుల్లోనూ నగదును ఇతరుల ఖాతాల్లోకి బదిలీ చేయొద్దని పేర్కొన్నాయి. దర్యాప్తు అధికారులమంటూ ఎవరు ఫోన్ చేసినా 1930కి ఫోన్ చేసి సమాచారం అందించాలని’తెలిపాయి.
'మీ అబ్బాయి ఓ అమ్మాయికి యాక్సిడెంట్ చేశాడు - రూ.3 లక్షలు ఇవ్వకపోతే కాల్చేస్తాం'
