Sankrati Festival Train and Bus Ticket Prices : సంక్రాంతి పండుగకు సొంతూళ్లకు వెళ్లేందుకు తెలుగు రాష్ట్రాల ప్రజలు పెద్ద ఎత్తున సిద్ధమవుతున్నారు. అయితే ప్రయాణానికి మాత్రం భారీ ఖర్చు అవ్వడం తప్పడం లేదు. రైళ్లలో ఇప్పటికే రిజర్వేషన్లు అయిపోగా, ఆర్టీసీ బస్సుల్లోనూ దాదాపు టికెట్లు దొరకని పరిస్థితి పరిస్థితి ఏర్పడింది. విమాన టికెట్ల ధరలకు అమాంతం రెక్కలొచ్చాయి. దీంతో పలు ప్రైవేటు బస్సుల యజమానులు అడ్డగోలు దోపిడీకి తెరలేపుతున్నారు. సంక్రాంతికి ఎలాగైనా సొంతూళ్లకు చేరుకోవాలనే నేపథ్యంలో ప్రజలు సిద్ధమవుతుండటంతో ఇదే అదనుగా ఛార్జీలను పెంచేస్తున్నారు.
ప్రైవేటు స్లీపర్‌ ఏసీ బస్సుల్లో హైదరాబాద్ నుంచి విశాఖపట్నానికి గరిష్ఠంగా రూ.7వేలకు పైగా టికెెట్ ఛార్జీలను వసూలు చేస్తున్నారు. హైదరాబాద్ నుంచి ఆదిలాబాద్‌కు రూ.2,300, మంచిర్యాలకు రూ.3,500 తీసుకుంటున్నారు. పండుగకు ముందు మూడురోజులు జనవరి 9 నుంచి 12 వరకు రైళ్లు, బస్సులు, విమాన టికెట్లకు డిమాండ్‌ అధికంగా ఉంది.
‘ప్రైవేటు’లో బాదుడు! : సంక్రాంతి పండుగ దగ్గరకొస్తున్న కొద్దీ ప్రైవేటు బస్సుల్లో టికెట్ల ధరలు భగ్గుమంటున్నాయి. దూరప్రాంతాలకు వెళ్లేవారు సౌకర్యంగా ప్రయాణం చేయడానికి స్లీపర్‌ బస్సులకు ప్రాధాన్యమిస్తారు. దీంతో లోయర్‌ బెర్తులకు, కొన్ని బస్సుల్లో ముందువరుస సీట్లకు కూడా అదనంగా డబ్బులు వసూలు చేస్తున్నారు. టికెట్ ఛార్జీలపై జీఎస్టీ కూడా వసూలు చేస్తున్నారు.
జనవరి 12న హైదరాబాద్ నుంచి వైజాగ్కు ఓ ప్రైవేటు ఏసీ స్లీపర్‌ బస్సులో టికెట్ ధర రూ.6,999, జీఎస్టీ రూ.349.95 కలిపి మొత్తం రూ.7,348.95 వసూలు చేస్తున్నారు. తెలంగాణలో ఖమ్మం, భద్రాద్రి-కొత్తగూడెం, ఆదిలాబాద్, కరీంనగర్‌ జిల్లాలకు బస్సుల డిమాండ్‌ ఎక్కువగానే ఉంది. ఆర్టీసీతో పాటు ప్రైవేటు ఆపరేటర్లూ కూడా అదనపు బస్సులు నడుపుతున్నారు.
హైదరాబాద్ నుంచి ఆదిలాబాద్‌కు జనవరి 13న ఆర్టీసీ స్లీపర్‌ బస్సులో సీటు టికెట్ ధర రూ.810. అదే ప్రైవేట్‌ బస్సులో ఛార్జి రూ.1,200. తేడా సుమారుగా రూ.400గా ఉంది. స్లీపర్‌ బెర్తు టికెట్‌కు ఆర్టీసీ బస్సుల్లో రూ.1,040 అయితే, ప్రైవేటు బస్సులో ధర రూ.2,300. ఏకంగా డబుల్గా ఉంది. మంచిర్యాలకు ఆర్టీసీ బస్సులో బెర్తు ధర రూ.860 అయితే ఓ ప్రైవేట్‌ బస్సులో ఏకంగా భారీ స్థాయిలో రూ.3,700గా నిర్ణయించారు.
విమాన ఛార్జీలకూ రెక్కలు! : విమాన టికెట్లు సైతం పండుగ నేపథ్యంలో దాదాపు మూడింతలు అయ్యాయి. దూరప్రాంతాలకు విమానాలలో ప్రయాణ సమయం ఒకట్రెండు గంటలే కావడంతో 11, 12 తేదీల్లో ఎక్కువమంది వెళుతున్నారు. జనవరి 11వ తేదిన హైదరాబాద్-విశాఖపట్నం టికెట్ ధరలు రూ.10,019 నుంచి రూ.13,536 వరకు ఉన్నాయి. కానీ సాధారణ రోజుల్లో ఈ టికెట్ కేవలం రూ.3,900 గా మాత్రమే ఉంటుంది.
హైదరాబాద్ నుంచి విజయవాడ వెళ్లాలంటే విమాన టికెట్ ధర సాధారణంగా రూ.2,600కే దొరుకుతుంది. సంక్రాంతి సమయంలో కనీస ధర రూ.6,981 నుంచి గరిష్ఠంగా రూ.16వేలకు పైగా ఉంది. హైదరాబాద్ నుంచి రాజమండ్రి విమాన టికెట్లు జనవరి 10,12 తేదీల్లో కనిష్ఠంగా రూ.7,135 గరిష్ఠంగా రూ.15వేలకు పైగా ఉన్నాయి.
ఛార్జీల నియంత్రణపై చర్యలేవీ! : ప్రైవేటు బస్సు ఆపరేటర్లు అడ్డగోలుగా ఛార్జీలు పెంచుతున్నా, వాటిని నియంత్రించడంలో రాష్ట్ర రవాణాశాఖ కేవలం ప్రేక్షకపాత్ర పోషిస్తోంది. ఛార్జీల దోపిడీ వెబ్‌సైట్లు, యాప్‌లలో కనిపిస్తున్నా కట్టడికి ఉన్నతాధికారులు చర్యలు తీసుకోవడానికి ప్రయత్నాలు చేయడం లేదు.
‘బెంగళూరు-హైదరాబాద్’ రూ.10 వేలు! : బెంగళూరులో తెలంగాణకు చెందిన ఐటీ ఉద్యోగులు ఎక్కువ సంఖ్యలో ఉంటున్నారు. వారు సంక్రాంతికి వచ్చేందుకు సిద్ధమవుతుండటంతో అటు నుంచి కూడా ఛార్జీల బాదుడు ఎక్కువగా ఉంది. బెంగళూరు నుంచి హైదరాబాద్‌కు ఓ ప్రైవేటు బస్సులో ఈ నెల జనవరి 12న ప్రయాణించాలనుకుంటే గరిష్ఠంగా రూ.9,999 వసూలు చేస్తున్నారు.
సంక్రాంతికి సొంతూరు వెళ్తున్నారా.. అయితే కచ్చితంగా ఇది మీకోసమే..
పండుగ ప్రయాణం వామ్మో మరీ ఇంత ఖరీదా? - రద్దీని 'క్యాష్' చేసుకుంటున్న ప్రైవేటు ట్రావెల్స్
