ఆ జాగ్రత్తలు తీసుకోండి : 'చైనా కొత్త వైరస్'​ పట్ల వైద్యారోగ్య శాఖ సూచనలివే

రాష్ట్రంలో హెచ్​ఎంపీవీ కేసులు లేవని ప్రజారోగ్య సంచాలకుడు డా.రవీందర్ నాయక్ స్పష్టం - ప్రజలు అప్రమత్తంగా ఉండాలని సూచన

No HMPV Cases in Telangana : తెలంగాణలో హెచ్​ఎంపీవీ కేసులు లేవని ప్రజారోగ్య సంచాలకుడు డాక్టర్​ రవీందర్ ​నాయక్​ శనివారం ఒక ప్రకటనలో స్పష్టం చేశారు. చైనాలో హ్యూమన్​ మెటానిమో వైరస్​ (హెచ్​ఎంపీవీ) కేసులు గణనీయంగా పెరుగుతున్నాయని వార్తలు వస్తున్న నేపథ్యంలో రాష్ట్ర వైద్యారోగ్య శాఖ అప్రమత్తమైంది. ఈ క్రమంలో రాష్ట్రంలో హెచ్​ఎంపీవీ కేసులపై మాట్లాడిన ఆయన, ఈ వైరస్​ చలికాలంలో జలుబు, సాధారణ ఫ్లూ లక్షణాలు కలగజేస్తుందని ఇప్పటికే కేంద్ర ప్రభుత్వం వెల్లడించిందని అన్నారు. ఈ వైరస్​పై భయాందోళనలు అక్కర్లేదన్నారు. కేంద్ర ప్రభుత్వంతో సమన్వయం చేసుకుంటూ, ఎప్పటికప్పుడు పరిస్థితిని సమీక్షిస్తున్ననట్లు తెలిపారు.

జలుబు, ఫ్లూ లక్షణాలు కలిగి ఉన్నవారు తగిన జాగ్రత్తలు పాటించాలని సూచించారు. తుమ్ములు, దగ్గు వచ్చినప్పుడు చేతి రుమాలు లేదా టిష్యూ పేపర్​ను అడ్డు పెట్టుకోవాలని, చేతులను తరచూ శుభ్రం చేసుకోవాలని చెప్పారు. జబ్బు చేసిన వారి దగ్గరకు వెళ్లడం, కళ్లు, ముక్కును తరచూ తాకడం, కరచాలనం చేయడం, బహిరంగ ప్రదేశాల్లో ఉమ్మి వేయడం, వైద్యులను సంప్రదించకుండా మందులు వాడటం లాంటివి చేయకూడదని రవీందర్​ నాయక్​ తెలిపారు.