Rescue Operations for Budameru Floods : బుడమేరు సృష్టించిన విలయం నుంచి ముంపు ప్రాంతాలు తేరుకోలేదు. అజిత్ సింగ్ నగర్, రాజరాజేశ్వరీపేట, కండ్రిక, వాంబేకాలనీ, చిట్టి నగర్, పాల ఫ్యాక్టరీ, సితార సెంటర్, కబేళా తదితర ప్రాంతాల్లో ముంపు తగ్గక పోవటంతో ఇళ్ల నుంచి బయటకు వచ్చేందుకు ప్రజలు ఇబ్బందులు పడుతున్నారు. ఇళ్లలోకి చేరిన బురదను తొలగించుకునేందుకు స్థానికులు మంచినీటి కోసం ఎదురుచూస్తున్నారు. ముంపు ప్రాంతాల్లో విద్యుత్ సరఫరా పునరుద్ధరణకు యుద్ధ ప్రాతిపదికన ఏపీ సర్కారు చర్యలు చేపట్టింది. పడిపోయిన కరెంటు స్తంభాల స్థానంలో కొత్తవి ఏర్పాటు చేస్తున్నట్లు ఇంధన శాఖ అధికారులు తెలిపారు.
ప్రస్తుతం సింగ్ నగర్, రాజరాజేశ్వరీ పేట, వాంబేకాలనీ, కండ్రిక, పాల ఫ్యాక్టరీ, వైఎస్ఆర్ కాలనీ ప్రాంతాల్లో ఇంకా ట్రాన్స్ఫార్మర్లు నీట మునిగే ఉన్నాయి. ముంపు తగ్గి ట్రాన్స్ఫార్మర్లు బయటపడిన చోట, వాటిని మార్చి తక్షణం విద్యుత్ పునరుద్ధరిస్తున్నారు. ఇందుకోసం ఈపీడీసీఎల్, ఎస్పీడీసీఎల్ నుంచి కూడా సిబ్బందిని రప్పించారు. మరోవైపు ఆంధ్రప్రదేశ్లో విద్యుత్ డిమాండ్కు తగ్గట్టు జెన్కో ప్లాంట్లలో ఉత్పత్తిని పెంచినట్లు అధికారులు తెలిపారు. ముంపు ప్రాంతాల్లో నీటి సరఫరా సమస్యపై ఏపీ ప్రభుత్వం దృష్టి పెట్టింది. కొన్ని చోట్ల ట్యాంకర్ల ద్వారా నీటిని పంపిణీ చేస్తున్నారు.
'విజయవాడలోనే లక్షా 58 వేల సర్వీస్ కనెక్షన్లు డౌన్ అయ్యాయి. ముంపు తగ్గి ట్రాన్స్ఫార్మర్లు బయటపడిన చోట వాటిని పరిశీలిస్తున్నాం. వెంటనే మా సిబ్బంది కనెక్షన్లు ఇచ్చేలా శ్రమిస్తున్నారు. సబ్ స్టేషన్లు అయితే ఇంకా మూడు ఉన్నాయి. వాటిని చెక్ చేయాలి' -కె.విజయానంద్, ఏపీ ఇంధనశాఖ ప్రత్యేక ప్రధాన కార్యదర్శి
బురదను తొలగించేందుకు అగ్నిమాపక శకటాలు : ఏపీలోని వేర్వేరు మున్సిపాలిటీల నుంచి ట్యాంకర్లను తెప్పించారు. వాటి ద్వారా విజయవాడ హెడ్ వాటర్ వర్క్స్ నీటిని సరఫరా చేస్తోంది. ఒక్కో లారీకి 8 వేల లీటర్లను, ట్రాక్టర్ల ద్వారా 4 వేల లీటర్ల నీటిని వీధుల్లోకి పంపిస్తున్నారు. ప్రస్తుతం 200 వరకు ట్యాంకర్లు 500 ట్రిప్పుల్లో నీటిని సరఫరా చేసినట్టు అధికారులు చెబుతున్నారు. వరద బురదను తొలగించేందుకు ఏపీ ప్రభుత్వం 100కు పైగా అగ్నిమాపక శకటాలను విజయవాడకు రప్పించింది. వీటి ద్వారా రహదారులు, వీధులు, ఇళ్లలోనూ బురదను తొలగించే కార్యక్రమాన్ని ప్రారంభించారు.
ప్రస్తుతం విద్యాధరపురం, సితార సెంటర్ సహా 45 డివిజన్లో శుభ్రం చేసే పనుల్ని అగ్నిమాపక శాఖ అధికారులు చేపట్టారు. ముంపు ప్రాంతాల్లో బురదతోపాటు పెద్ద ఎత్తున చెత్త పేరుకుపోవటంతో దాన్ని తొలగించేందుకు ప్రభుత్వం ప్రయత్నిస్తోంది. ఇందుకోసం పొక్లెయినర్లు, టిప్పర్లను రప్పించారు. బుడమేరు డ్రెయిన్తో పాటు ఇతర ప్రాంతాల్లోకి చెత్త, వ్యర్ధాలు పెరిగిపోయాయి. వాటివల్ల అంటు వ్యాధులు వచ్చే అవకాశమున్నందున తొలగించే పనుల్ని మొదలు పెట్టారు. ఇందుకోసం 2 వేల 100 మంది పారిశుద్ధ్య సిబ్బంది, వార్డు సచివాలయాలకు చెందిన సిబ్బందిని విజయవాడకు రప్పించారు.
మళ్లీ పెరుగుతున్న బుడమేరు వరద ప్రవాహం - గండి పూడ్చే పనులు సాగేనా? - Budameru Floating
