మీడియా ప్రతినిధులపై దాడి - సీనియర్​ నటుడు మోహన్​బాబుపై కేసు నమోదు

ముదురుతున్న మంచు కుటుంబ వివాదం - మోహన్‌బాబుపై కేసు నమోదు

Manchu Mohan Babu Family Issue : సీనియర్​ నటుడు మోహన్‌బాబుపై కేసు నమోదైంది. మంగళవారం మీడియా ప్రతినిధులపై మోహన్​బాబు దాడి చేసిన నేపథ్యంలో పహాడీ షరీఫ్‌ పోలీసులు ఆయనపై బీఎన్‌ఎస్‌ 118 సెక్షన్‌ కింద కేసు నమోదు చేశారు. కుటుంబ వివాదం నేపథ్యంలో మంగళవారం జల్‌పల్లిలోని మోహన్‌బాబు నివాసానికి మీడియా ప్రతినిధులు వెళ్లారు. మోహన్‌బాబుతో పాటు వచ్చిన బౌన్సర్లు, సహాయకులు గేటు లోపల ఉన్న మీడియా ప్రతినిధులను బయటకు తోసేయడంతో పాటు కర్రలతో దాడి చేశారు. కొద్దిసేపటి వరకు అక్కడ ఘర్షణ వాతావరణం నెలకొంది. ఈ క్రమంలో ఓ ఛానల్‌ ప్రతినిధి చేతిలో నుంచి మోహన్‌బాబు మైకు లాక్కుని ముఖంపై కొట్టారు.

బౌన్సర్లు నెట్టేయడంతో మరో ఛానల్‌ కెమెరామెన్‌ కూడా కింద పడ్డాడు. దీంతో దాడిని నిరసిస్తూ మంగళవారం రాత్రి మీడియా ప్రతినిధులు ధర్నా చేశారు. మోహన్‌బాబుపై కేసు నమోదు చేయాలంటూ డిమాండ్‌ చేశారు. ఈ నేపథ్యంలో మోహన్‌బాబుపై పహాడిషరీఫ్​ పోలీస్​ స్టేషన్​లో కేసు నమోదైంది. ఘటన అనంతరం మోహన్‌బాబు అస్వస్థతకు గురయ్యారు. దీంతో ఆయనను గచ్చిబౌలిలోని ఓ ఆసుపత్రికి తరలించారు. ఈ నేపథ్యంలో మంగళవారం రాత్రి నుంచి మోహన్‌బాబు గచ్చిబౌలిలోని ఆస్పత్రిలో చికిత్స పొందుతున్నారు. మరోవైపు గత రెండ్రోజుల నుంచి మంచు కుటుంబంలో జరుగుతున్న వివాదాలు రెండు తెలుగు రాష్ట్రాల్లో చర్చనీయాంశంగా మారింది.

వ్యక్తిగతంగా విచారణకు హాజరవ్వాలని సీపీ ఆదేశాలు : మంగళవారం రాత్రి హైదరాబాద్‌ శివారు జల్‌పల్లిలోని మోహన్‌బాబు నివాసంలోకి జరిగిన ఘటనపై రాచకొండ పోలీస్‌ కమిషనర్‌ సుధీర్‌బాబు ఆగ్రహం వ్యక్తం చేశారు. మంచు మోహన్‌బాబు, విష్ణు, మనోజ్‌లు ముగ్గురూ బుధవారం ఉదయం 10.30 గంటలకు తన ముందు వ్యక్తిగతంగా విచారణకు హాజరవ్వాలని రాచకొండ సీపీ ఆదేశించారు. ఈ మేరకు ముగ్గురికి వేర్వేరుగా నోటీసులు జారీ చేశారు. ఇప్పటికే మోహన్​బాబు పేరు మీద ఉన్న రెండు లైసెన్డ్‌ తుపాకీలను స్వాధీనం చేసుకోవాలని పోలీసు ఉన్నతాధికారులు ఆదేశించారు.

అదనపు డీజీపీకి మంచు మనోజ్ ఫిర్యాదు : మంచు కుటుంబ వివాదం నేపథ్యంలో విదేశాల్లో ఉన్న మంచు విష్ణు మంగళవారం ఉదయం నగరానికి వచ్చారు. ఈ క్రమంలో వారి కుటుంబంలోని వివాదానికి తెరదించేందుకు మోహన్‌బాబు, విష్ణు, మరికొందరు సన్నిహితుల సమక్షంలో మనోజ్‌తో చర్చలు జరిపారు. కానీ మంచు మనోజ్​ ఆయన భార్య మౌనిక మధ్యలోనే బయటకు వచ్చేశారు. ఈ క్రమంలో మీడియాతో మాట్లాడిన మంచు మనోజ్​ తాను ఆస్తి కోసం పోరాడటం లేదని, ఆత్మగౌరవం కోసం పోరాడుతున్నానని తెలిపారు. తన తరఫు కానిస్టేబుళ్లు బెదరగొట్టి ఇంటి నుంచి బయటకు పంపించారని ఆరోపించారు. అనంతరం తనకు ప్రాణహాని ఉందని, భద్రత కల్పించాలంటూ మంగళవారం సాయంత్రం టెలిజెన్స్‌ డీజీ శివధర్‌రెడ్డి, శాంతిభద్రతల అదనపు డీజీ మహేశ్‌ భగవత్​కు ఫిర్యాదు చేశారు.