మన ప్రేమ విషయం మీ పై ఆఫీసర్లకు చెబుతా : యువతి బెదిరింపులతో ఎస్సై సూసైడ్!

వాజేడు ఎస్సై హరీశ్​ కేసులో వెలుగులోకి కొత్త విషయాలు - యువతిని ప్రేమించిన ఎస్సై - ఆమె గత చరిత్ర తెలియడంతో దూరం పెట్టిన ఎస్సై - ఉన్నతాధికారులకు చెబుతానంటూ యువతి బెదిరింపులు

Vajedu SI Suicide Case Update : ములుగు జిల్లా వాజేడు ఎస్సై రుద్రారపు హరీశ్​ ఆత్మహత్య కేసులో కొత్త అంశాలు వెలుగులోకి వచ్చాయి. తమ శాఖకు చెందిన యువ అధికారి సర్వీస్ రివాల్వర్​తో కాల్చుకొని బలవన్మరణానికి పాల్పడటాన్ని తీవ్రంగా పరిగణించిన పోలీసులు దర్యాప్తులో కీలక విషయాలను తెలుసుకున్నట్లు సమాచారం. 7 నెలల కిందట హరీశ్​ ఫోన్​కు ఓ కాల్​ వచ్చింది. ఆ కాల్​ చేసింది ఓ యువతి. ఫలానా వ్యక్తేనా అంటూ మొదలైన వారి పరిచయంతో ఇన్​స్టాగ్రామ్​లో ఫ్రెండ్​ రిక్వెస్ట్​ పంపించింది. అందుకు హరీశ్​ కూడా అంగీకరించి ఓకే చేశాడు. అప్పటి నుంచి వారిద్దరూ ఇన్​స్టాగ్రామ్​లో చాటింగ్​ చేసుకుంటూ దగ్గరయ్యారు.

ఆమె హైదరాబాద్​లో చదువుకుంటూ వారాంతపు సెలవుల్లో వాజేడుకు వచ్చి రెండు రోజులు అక్కడే ఉండి వెళ్లేది. ఈ క్రమంలోనే వారిద్దరూ పెళ్లి చేసుకోవాలని నిర్ణయించుకున్నారు. ఈ క్రమంలో ఎస్సై ఆమె గురించి ఆరా తీశాడు. దీంతో అతనికి కొన్ని విషయాలు తెలిశాయి. ఈ 26 ఏళ్ల యువతిది సూర్యాపేట జిల్లా చిలుకూరు మండలం. ఊళ్లో ఉన్నప్పుడు ముగ్గురు యువకులతో స్నేహంగా ఉండేది. అందులో ఒకరు పెళ్లికి నిరాకరించడంతో చిలుకూరు పోలీస్​ స్టేషన్​లో ఫిర్యాదు చేసింది. దీంతో కేసు నమోదు అయింది. ఈ విషయాలను తెలుసుకున్న హరీశ్​ ఆమె పెళ్లి ప్రతిపాదనను నిరాకరించాడు. ఇంట్లో వాళ్లు చూసే సంబంధాన్ని చేసుకునేందుకు సిద్ధమయ్యాడు. అదే విషయాన్ని ఆమెకు చెప్పాడు. దీంతో ఆమె మాట్లాడేందుకు ఆదివారం సాయంత్రం వాజేడు ముళ్ల కట్ట సమీపంలోని ఓ రిసార్టుకు వచ్చినట్లు పోలీసుల దర్యాప్తులో తేలింది.

ఈ క్రమంలో వారిద్దరి మధ్య అక్కడ వాగ్వాదం చోటుచేసుకుంది. సెటిల్​మెంట్​ చేసుకోవడానికి ఎస్సై ప్రయత్నించగా, సదరు యువతి అందుకు అంగీకరించకపోవడంతో పాటు విషయాన్ని ఉన్నతాధికారుల దృష్టికి తీసుకువెళతానని చెప్పింది. దీంతో మనస్తాపానికి గురైన ఎస్సై హరీశ్​ తన సర్వీసు రివార్వర్​తో కాల్చుకుని ఆత్మహత్య చేసుకున్నట్లు తేలింది. తమ కుమారుడి మృతికి యువతే కారణమని తల్లిదండ్రులు ఫిర్యాదు చేయడంతో ప్రస్తుతం ఆమెను అదుపులోకి తీసుకొని పోలీసులు విచారిస్తున్నట్లు సమాచారం.

అసలేం జరిగిందంటే : ఈ నెల 2వ తేదీన ఎస్సై హరీశ్​ వాజేడు మండల కేంద్రానికి సమీపంలో ఉన్న ముళ్లకట్ట గోదావరి బ్రిడ్జి దగ్గర ఉన్న రిసార్ట్​లోని గదిలో తన సర్వీస్ రివాల్వర్​తో కాల్చుకుని బలవన్మరణానికి పాల్పడ్డారు. ఈ విషయంపై పోలీసులు కేసు నమోదు చేసి దర్యాప్తు ప్రారంభించారు. అప్పటికే ఎస్సై మృతిపై పోలీసులు అనుమానాలు వ్యక్తం చేశారు. హరీశ్​కు ఈ నెల 6న నిశ్చితార్థం జరగాల్సి ఉండగా, ఇంతలోనే ఆత్మహత్య చేసుకున్నాడు.