గరుడ ప్రసాదం కోసం చిలుకూరు ఆలయానికి పోటెత్తిన జనం - పంపిణీ నిలిపివేసిన అర్చకులు - Chilkur Balaji Temple traffic

Heavy Traffic Jam at Chilkur Balaji Temple : భగవంతుడిపై భక్తుల నమ్మకం ఆ బంధానికుండే భావోద్వేగం మాటల్లో చెప్పలేం. తాను ఆరాధించే రూపంలోనే దేవుడున్నాడని భావిస్తూ ఆ నమ్మకంతోనే ఎంతదూరమైనా వెళ్తారు. ఉద్వేగపూరితమైన అంతటి విశ్వాసం సోషల్‌ మీడియా ప్రచార చేష్టలకు చిన్నబోయింది. అంచనాలకు మించి తరలొచ్చిన జనం కిలోమీటర్ల మేర నిలిచిపోయిన వాహనాలతో ఆలయం వద్ద పట్టపగలే జనం చుక్కలు చూశారు. చిలుకూరి బాలాజీ బ్రహ్మోత్సవాల వేళ గరుడ ప్రసాద వితరణ వేళ నెలకొన్న పరిణామాలు లక్షలాదిగా వచ్చిన భక్తులకు నరకం చూపించాయి.

Heavy Traffic Jam at Chilkur Balaji Temple : రంగారెడ్డి జిల్లా చిలుకూరు బాలాజీ ఆలయంలో గరుడ ప్రసాద వితరణ భక్తులు, సామాన్యులను తీవ్ర ఇబ్బందులను గురిచేసింది. బ్రహ్మోత్సవాల్లో భాగంగా ధ్వజారోహణ అనంతరం సంతాన లేమితో బాధపడే మహిళలకు గరుడ ప్రసాదం పంపిణీ చేయడం ఆనవాయితీగా వస్తోంది. ఈ ఏడాది కూడా ఉత్సవాల్లో గరుడ ప్రసాదం పంపిణీ చేయనున్నట్లు ఆలయ ప్రధాన అర్చకులు రంగరాజన్ ప్రకటించడంతో ఆ విషయం సామాజిక మాద్యమాల ద్వారా విస్తృతంగా ప్రచారం జరిగింది. నగర నలుమూలల నుంచే కాకుండా ఇతర జిల్లాల నుంచి పెద్ద సంఖ్యలో మహిళలు, భక్తులు తెల్లవారుజామున 4 గంటల నుంచే చిలుకూరు బాలాజీ ఆలయానికి పోటెత్తారు. దీంతో ఆలయానికి వెళ్లే రహదారులన్నీ వాహనాలతో కిక్కిరిసిపోయాయి.

Chilkur Balaji Brahmotsavam 2024 : ఆలయ కమిటీ అంచనాలకు మించి జనం పోటెత్తడంతో నగరంలోని లంగర్ హౌజ్ నుంచి మొదలు ఓఆర్​ఆర్​, పోలీస్‌అకాడమీ జంక్షన్, అజీజ్ నగర్, చిలుకూరు చౌరస్తా మీదుగా ఆలయం వరకు సుమారు 30 కిలోమీటర్ల మేర వాహనాలు ఎక్కడివి అక్కడే నిలిచిపోయాయి. ఆ మార్గంలో చేవెళ్ల, వికారాబాద్ వెళ్లే సాధారణ వాహనదారులు కూడా ట్రాఫిక్​లో చిక్కుకుపోయారు. విషయం తెలుసుకున్న మొయినాబాద్ పోలీసులు ట్రాఫిక్​ను నియంత్రించే ప్రయత్నం చేశారు. రద్దీ ఎక్కువగా ఉండటంతో ఓ దశలో ట్రాఫిక్ పోలీసులు కూడా చేతులెత్తేశారు. వెంటనే పోలీసు ఉన్నతాధికారులు జోక్యం చేసుకొని అదనపు సిబ్బందితో ఆలయానికి వచ్చే వాహనాలను దారి మళ్లించారు. భక్తులను నడిచి వెళ్లాల్సిందిగా సూచించడంతో సుమారు ఐదారు కిలోమీటర్లు నడుచుకుంటూ వెళ్లి ప్రసాదం కోసం పోటీపడ్డారు.

Chilkur Balaji Brahmotsavam Prasadam : సుమారు ఐదు వేల మంది రావొచ్చని ఆలయ నిర్వాహకులు అంచనా వేశారని, అంతకు మించి ఉదయం పదిన్నర వరకే 60 వేల మందికిపైగా భక్తులు రావడంతో ట్రాఫిక్ సమస్య తలెత్తిందని మొయినాబాద్ పోలీసులు తెలిపారు. మరోవైపు భక్తుల కోసం సరైన సౌకర్యాలు లేవని, తాగునీరు కూడా అందుబాటులో పెట్టలేదని పలువురు భక్తులు ఆవేదన వ్యక్తం చేశారు. ప్రసాదం కోసం వచ్చిన మహిళలు మండుటెండలో ఎదుర్కొన్న కష్టాలు వర్ణనాతీతంగా మారాయి.

"ఉదయం 11 గంటల్లోపే 60వేలకు పైగా భక్తులు వచ్చారు. ఈ సంఖ్య ఇంకా పెరుగుతోంది. సుమారు లక్షకు పైగా భక్తులు వచ్చే అవకాశం ఉంది. ఆలయ సిబ్బంది తెలిపిన మేరకు బందోబస్తు చేశాం. మేము అంచనా వేసిన దానికంటే ఊహించని స్థాయిలో భక్తులు వచ్చారు. అందుల్లో పలు ప్రాంతాల్లో ట్రాఫిక్​ జామ్​ అయింది. ఈ పరిస్థితిన మరింత భద్రతా సిబ్బందిని పెంచి పరిస్థితులను చక్కదిద్దుతున్నాం." - పవన్‌కుమార్‌రెడ్డి, మొయినాబాద్‌ సీఐ

Chilkur Balaji priest React on Traffic : ఆలయ సిబ్బంది ఆశించిన దానికంటే వెయ్యి రెట్లు అధికంగా భక్తులు రావడం వల్లే ఇబ్బందులు తలెత్తాయని ఆలయ ప్రధాన అర్చకులు రంగరాజన్ స్పష్టం చేశారు. అయినప్పటికీ సంతాన భాగ్యం కోసం వచ్చిన చాలా మంది భక్తులకు గరుడ ప్రసాదం అందించామని పేర్కొన్నారు. అయితే భక్తులకు కలిగిన ఇబ్బందుల దృష్ట్యా బ్రహ్మోత్సవాల్లో ప్రస్తుతం ప్రసాదం వితరణ నిలిపివేశామని వెల్లడించారు. శని, ఆదివారాలు కూడా ప్రసాదం పంపిణీ ఉండదని తెలిపారు.