పోలీస్ బందోబస్తు మధ్య చేపల విక్రయం - అంత స్పెషల్ ఏంటంటే? - KG Fish Rs100 in Khammam

KG Fish Rs.100 in Khammam Enkoor : పోలీసుల బందోబస్తుతో చేపలు విక్రయించడాన్ని మీరు ఎప్పుడైనా చూశారా? అంతేముండదు, ఎక్కడైన చేపలు అమ్మడానికి పోలీసులు కాపలా కాస్తారా ఏంటి అనుకుంటున్నారా? అయినా అవి ఎక్కడికి పోయినా దొరుకుతాయి, మార్కెట్లలో అయితే పుష్కలంగా లభిస్తాయి వాటికి అమ్మడానికి పోలీసులు బందోబస్తు ఏం ఉండదు ఉట్టి మాటలే అని అంటే మాత్రం మీరు తప్పుగా మాట్లాడినట్టే అవుతుంది. ఎందుకంటే ఖమ్మంకు చెందిన ఓ యజమాని చేపలు విక్రయించేందుకు పోలీసులు కాపలా కాశారు. కాదు కాయాల్సిన పరిస్థితి వచ్చింది ఇంతకి ఏమైంది అంటే.

People Lined Up for Fish in Khammam : ఖమ్మం జిల్లా ఏన్కూరు మండలం తూతక లింగన్నపేటలో చేపల కోసం జనం తొక్కిసలాడారు. ఆ గ్రామంలోని చెరువు వద్ద కిలో అతి తక్కువ ధరకే విక్రయించడంతో వివిధ మండలాల నుంచి జనం పెద్ద ఎత్తున పోటెత్తారు. రద్దీ పెరిగి ఉద్రిక్తతంగా మారడంతో పోలీసులు రంగంలోకి దిగాల్సి వచ్చింది. వారి కాపలా మధ్య చేపల విక్రయం జరిగింది.

ఖమ్మం జిల్లా ఏన్కూరు మండలం తూతక లింగన్నపేటకు చెందిన ఒక వ్యక్తికి చేపల చెరువు ఉంది. అందులో ఉన్న చేపలను విక్రయానికి పెట్టాడు. అది కూడా కిలో కేవలం రూ. 100కే. అతను చెరువు దగ్గరే చేపలను అమ్మడం మొదలు పెట్టాడు. కిలో చేపలు కేవలం రూ.100కే అన్న విషయం ఊరూరా పాకింది. ఎలాగో వాతావరణం చల్లబడుతుంది అలాగే మాంచి చేపల పులుసు, ఫ్రై చేసుకోవచ్చు అనుకున్నారో ఏమో అంతే వివిధ మండలాల నుంచి పెద్దఎత్తున ప్రజలు పోటెత్తారు.