Pawan Kalyan Mother Anjana Devi Interview : జనసేన అధ్యక్షులు, ఏపీ ఉప ముఖ్యమంత్రి పవన్కల్యాణ్ తల్లి అంజనాదేవి తాజాగా ఓ ఇంటర్వ్యూలో పాల్గొన్నారు. ఈ సందర్భంగా ఆమె పవన్కల్యాణ్ గురించి కొన్ని ఆసక్తికర విషయాలు చెప్పారు. చిన్నతనంలో పవన్ ఎలా ఉండేవారు.. రాజకీయపరమైన అంశాలపై అంజనాదేవి తన అభిప్రాయాలను చెప్పుకొచ్చారు. ఇంతకీ.. ఇంటర్ప్యూలో పవన్ కల్యాణ్ గురించి పవన్ మాతృమూర్తి ఎలాంటి విషయాలు పంచుకున్నారో ఆమె మాటల్లోనే తెలుసుకుందాం.
సినీ కళామతల్లికి ముగ్గురు స్టార్స్‌ని ఇచ్చారు. ఇప్పుడు పవన్ కల్యాణ్ ఏపీకి డిప్యూటీ సీఎంగా బాధ్యతలు స్వీకరించి 100 రోజులు పూర్తయ్యింది. మీరు దీన్ని ఎలా ఫీలవుతున్నారు?
"పవన్ ఎంత కష్టపడ్డాడో ఇప్పుడు అంత సుఖం వచ్చింది. ప్రజలకు సేవ చేసే అవకాశం వచ్చింది. ఇప్పుడు ఇంకా బాధ్యత పెరిగిందని" అన్నారు అంజనాదేవి.
జనసేన స్థాపించి 10 ఏళ్లు గడిచింది. సినీ కెరీర్‌ను పక్కన పెట్టి రాత్రింబవళ్లూ ప్రజల్లో ఉంటూ కష్టపడుతుంటే మీకు ఏమనిపించింది!
"అలా తిరుగుతుంటే ఒక మాతృమూర్తిగా బాధ కలిగింది. అయితే.. ఇంట్లో అయినా అలాగే ఉంటాడు. ఎక్కడైనా పడుకుంటాడు. షూటింగులు చేసి వచ్చి సోఫాలోనే నిద్రించేవాడు. ఎంత కష్టపడినా ‘ఇంత కష్టపడ్డాను’ అని ఏ రోజూ చెప్పేవాడు కాదు. చిన్నప్పటి నుంచీ ఏమీ అడిగేవాడు కాదు. ఎక్కువ మాట్లాడేవాడు కాదు. తినడానికి రమ్మని పిలిచినా త్వరగా వచ్చే వాడు. అది కావాలి.. ఇది కావాలి’ అని అడిగేవాడు కాదు. నేను చేసిన వంటల్లో పలావు చాలా ఇష్టంగా తినేవాడు" అని పవన్ మాతృమూర్తి చెప్పుకొచ్చారు.
తిరుమలలో యోగ నారసింహస్వామి టెంపుల్లోనే పవన్‌కు అన్నప్రాసన చేశారట!
"ఒకసారి మేము తిరుమల శ్రీవారిని దర్శించుకోవడానికి వెళ్లాం. అప్పటికి కచ్చితంగా మా అబ్బాయికి ఆరో నెల వచ్చింది. అప్పుడు నాకు మనసులో అక్కడే అన్నప్రాసన చేద్దామని అనిపించింది. అయితే.. ఆ రోజుల్లో వెంకట్రావు(పవన్ తండ్రి) గారు పోలీసు అవడం వల్ల ఎప్పుడూ ఆయన దగ్గర చిన్న కత్తి ఉండేది. ఈ క్రమంలో అన్నప్రాసన చేసే టైమ్లో పవన్ కల్యాణ్ ముందు.. ఆ కత్తి, పెన్ను, పుస్తకాలు, దేవుడి ప్రసాదం ఉంచితే ఆయన ముందు "కత్తి" పట్టుకున్నాడు. తర్వాత పెన్ను పట్టుకున్నాడు. కత్తి పట్టుకున్నాడు కదా పిల్లాడు కోపిష్టి అవుతాడు లేదంటే పది మందికీ ఏదో చేస్తాడని అప్పుడే అనుకున్నానని" అన్నారు అంజనాదేవి.
పవన్పై ఆయన తండ్రి వెంకట్రావు ప్రభావం ఉండేదా?
చిన్నప్పటి నుంచి కల్యాణ్ వాళ్ల తండ్రితోనే ఎక్కువగా ఉండేవాడు. ఎక్కువగా మాట్లాడడు. మితభాషి. అందుకే వాళ్ల నాన్నకి పవన్ అంటే చాలా ఇష్టమన్నారు.
పవన్ కల్యాణ్ చిన్నప్పటి నుంచి పుస్తకాలు ఎక్కువ చదివేవారా?
"స్కూల్‌లో ఎక్కువ చదవలేదు. టెన్త్ క్లాస్కి వచ్చేసరికి వాళ్ల అన్నయ్య క్లాస్‌మేట్‌కి లైబ్రరీ ఉంటే.. అక్కడికి వెళ్లి ఎక్కువ చదువుకునేవాడు. ‘ఎక్కడికి వెళ్తున్నావు’ అని అడిగితే ‘చదువుకోవడానికి అనేవాడు’ అంతే. అలా బుక్స్ చదివే అలవాటు అలవర్చుకున్నాడు. నేటికీ చాలా బుక్స్ ఇంట్లో పెట్టుకుని చదువుతూనే ఉంటాడు. ఇంట్లో చూస్తే ఇన్ని పుస్తకాలు ఉన్నాయి. అవన్నీ చదివే ఇన్ని ఆలోచనలు వచ్చాయేమో అనుకునేదాన్ని" అని చెప్పుకొచ్చారు పవన్ తల్లి.
పవన్ కల్యాణ్‌కి ఇంట్లో ఎవరితో ఎక్కువ అనుబంధం ఉండేది? చిరంజీవితోనా? మిగిలినవాళ్లతోనా?
"చిన్నప్పుడు వాళ్ల అన్నయ్యే బాగా దగ్గర తీసేవాడు. తమ్ముడిని చాలా బాగా చూసుకునేవాడు. రెండో కొడుకుకి ప్రేమ ఉన్నా మామూలుగానే ఉండేవాడు. ఎక్కువ చేరదీసింది మాత్రం పెద్ద కొడుకే. మేము నెల్లూరులో ఉండేవాళ్లం. మాకు ఎక్కువగా ట్రాన్స్‌ఫర్లు అయ్యేవి. చదువులు సరిగా ఉండవని పవన్ని మద్రాసు తీసుకువెళ్లిపోయాడు" అని అంజనాదేవి తెలిపారు.
మీరు చిన్నప్పుడు పవన్‌కల్యాణ్‌కి పెట్టిన పేరు ఇదేనా?
పవన్కి చిన్నప్పుడు శ్రీ కళ్యాణ్‌ కుమార్‌ అని పెట్టాం. అది.. వేంకటేశ్వరస్వామి పేరు.
సినిమాల్లో స్టార్ డమ్ వచ్చింది. పార్టీలు, రాజకీయాల వైపు వెళ్తున్నప్పుడు మీరు ఎలా భావించారు?
"పార్టీలు మనకెందుకు? సినిమాలు చేసుకుంటే మంచిగా ఉండు కదా అనిపించింది. అది, ఇదీ రెండూ చేస్తానమ్మా అని చెప్పాడు. ఈ విషయంలో నేను ఎప్పుడూ వాదించేదాన్ని కాదు. వాళ్ల ఇష్టానికి వదిలేసేదాన్ని. వాళ్లు పెద్దవాళ్లు అయిపోయారు కదా. వారి ఆలోచనలు వారికుంటాయి. పది సంవత్సరాలుగా కుటుంబాన్ని వదిలేసి కష్టపడ్డారు. ఇప్పుడు ఉప ముఖ్యమంత్రిగా.. మార్క్ చూపిస్తున్నారు" అని పవన్ మాతృమూర్తి అంజనాదేవి తాజాగా ఇచ్చిన ఓ ఇంటర్వ్యూలో చెప్పుకొచ్చారు.
ఇవీ చదవండి :
ప్రకాశ్రాజ్ అలా కామెంట్‌ చేయాల్సిన అవసరం లేదు : పవన్ కల్యాణ్
పవన్ ఫ్యాన్స్కు పవర్ఫుల్ అప్డేట్ - 'హరిహర వీరమల్లు' రిలీజ్ ఎప్పుడంటే?
