Nagarjuna Sagar Project Gates Open : నాగార్జున సాగర్ జలాశయానికి వరద ఉధృతి రోజురోజుకూ పెరుగుతోంది. ప్రస్తుతం కృష్ణా బేసిన్లోని అన్ని రిజర్వాయర్లు పూర్తిగా నిండి ఉన్నాయి. కర్ణాటకలో కురుస్తున్న వర్షాలకు వస్తున్న వరదను వచ్చింది వచ్చినట్లే దిగువకు వదిలేస్తున్నారు. దీంతో జూరాల, శ్రీశైలం నుంచి రోజు ఇన్ ఫ్లో పెరుగుతోంది. పైనుంచి వస్తున్న ప్రవాహాన్ని అంచనా వేసిన అధికారులు ఇవాళ జలాశయం 12 గేట్లు ఎత్తారు. ఈనెల 16న 4 గేట్లు ఎత్తిన అధికారులు తరువాత 8కి పెంచారు.
ఇవాళ 12 గేట్లను 5 అడుగుల మేర ఎత్తి 97 వేల క్యూసెక్కుల నీటిని దిగువకు విడుదల చేస్తున్నారు. జలాశయం మొత్తం నీటి మట్టం 590 అడుగులు కాగా అంతే మొత్తంలో నీటి నిల్వ ఉంది. నీటి నిల్వ సామర్థ్యం 312.04 టీఎంసీలు. ప్రస్తుతం ఎగువ నుండి లక్షా 38వేల 338 క్యూసెక్కుల ఇన్ఫ్లో వస్తోంది. ఔట్ ఫ్లో పోను మిగతా నీటితో ప్రధాన విద్యుత్ ఉత్పత్తి కేంద్రం నుండి విద్యుత్ ఉత్పత్తి చేస్తున్నారు. అయితే పవర్ ప్లాంట్లోని రెండో టర్బైన్ యూనిట్లో 20 నెలలుగా విద్యుత్ ఉత్పత్తి జరగడం లేదు. మొత్తం 8 యూనిట్లకు గాను ఏడు యూనిట్లే పనిచేస్తున్నాయి.
కృష్ణమ్మను చూసేందుకు పర్యాటకులు : మరోవైపు జలకళను సంతరించుకొని దిగువకు దిగుతున్న కృష్ణమ్మను చూసేందుకు పర్యాటకులు క్యూ కడుతున్నారు. రేపు ఆదివారం కావడంతో వచ్చే వారి సంఖ్య పెరుగుతుందని అధికారులు అంచనావేస్తున్నారు. సాగర్ను చూసేందుకు తెలంగాణ టూరిజం వారి ప్యాకేజీ అందుబాటులో ఉంది.
ప్యాకేజీ వివరాలు : హైదరాబాద్‌ - నాగార్జునసాగర్‌ - హైదరాబాద్‌ పేరుతో తెలంగాణ టూరిజం ప్యాకేజీ నడుపుతోంది. ఒక్క రోజులోనే టూర్ ముగిసేలా దీనిని రూపొందించారు. ఉదయం వెళ్లి మళ్లీ రాత్రి వరకు ఇంటికి చేరుకోవచ్చు. ప్రతీ శని, ఆదివారం రోజుల్లో ఈ టూర్ ఉంటుంది. మరిన్ని వివరాలు తెలంగాణ టూరిజం వారి వెబ్సైట్ https://tourism.telangana.gov.in ను సందర్శించండి. పూర్తి వివరాలు తెలుసుకోండి.
గుడ్న్యూస్ - సాగర్ గేట్లు మళ్లీ ఎత్తారు, వెళ్లి చూసొద్దాం రండి!
