Men Played Bathukamma at Husnabad : తెలంగాణలో బతుకమ్మ పండుగను ఘనంగా జరుపుకుంటారు. మహిళలంతా సంప్రదాయ చీరలు, ఆభరణాలు ధరించి, టీనేజ్ అమ్మాయిలైతే లంగా ఓణీ/ హాఫ్ - సారీలు ధరించి చూడముచ్చటగా ముస్తాబవుతారు. ఆ తర్వాత వారంతా బతుకమ్మలను ఒకచోట చేర్చి రామ రామ రామ ఉయ్యాలో అంటూ లయబద్ధంగా పాడుతూ స్టెప్లు వేస్తూ బతుకమ్మ ఆడతారు. ఒక రకంగా చెప్పాలంటే బతుకమ్మ అనేది స్త్రీలకు చెందిన పండుగగా చెప్పొచ్చు. కానీ మన రాష్ట్రంలోని ఓ ప్రాంతంలో మాత్రం ఆడవాళ్లే కాదు మగవాళ్లు సైతం బతుకమ్మ ఆడతారు. అదేంటి మహిళామణులు ఆడే బతుకమ్మను మగవాళ్లు ఆడటం ఏంటని ఆశ్చర్యపోతున్నారా? అయితే ఇది చదివేయండి.
సిద్దిపేట జిల్లా హుస్నాబాద్ మండలంలోకి వెళితే రంగురంగుల పూలను తెచ్చి, చక్కగా పేర్చి మగవాళ్లు బతుకమ్మలు ఆడటం కనిపిస్తుంది. ఆడవాళ్లతో పాటే వాళ్లు కూడా తలమీద బతుకమ్మను పెట్టుకుని ఊరేగింపుగా వెళతారు. మహిళలతో కలిసి పాటలు పాడుతూ ఆడతారు. మొదట హుస్నాబాద్ మండలం తోటపల్లిలో ఏటా దసరా నవరాత్రుల్లో ఈ విధంగా మగవారూ సందడి చేసేవారు. దశాబ్దాలుగా ఈ సంప్రదాయాన్ని ఆ గ్రామస్థులు పాటిస్తున్నారు. వారి స్ఫూర్తితో ఇప్పుడు చుట్టుపక్కల మండలాల్లోనూ బతుకమ్మ వేడుకల్లో మగవారే ముందు వరుసలో ఉంటున్నారు. ఈ మగవాళ్ల బతుకమ్మను మీరూ చూడాలనుకుంటే అలా హుస్నాబాద్ వెళ్లి చూసేయండి.
దసరా రోజు జెండా వందనం : తెలంగాణలో దసరా రోజు ఎవరైనా జమ్మి చెట్టు దగ్గర శమీ పూజలు చేస్తారు. కానీ సిద్దిపేట జిల్లా గజ్వేల్ మండలంలోని ప్రజ్ఞాపూర్, రిమ్మన్గూడ, జలిగావ్ లాంటి కొన్ని ఊళ్లలో మాత్రం జాతీయ జెండాకు వందనం చేస్తారు. జమ్మి చెట్టుకు శమీ పూజ కన్నా ముందు ఊరివాళ్లు అందరూ ఈ పద్ధతి పాటిస్తారు. ఎందుకంటే ఇలా స్వాతంత్ర్యం వచ్చిన నాటి నుంచి ఇప్పటి వరకూ ఈ గ్రామాల్లో ఈ పద్ధతి కొనసాగుతోంది. కేవలం స్వాతంత్ర్యం, గణతంత్ర దినోత్సవాల్లోనే కాకుండా దసరా రోజునా ఈ గ్రామాల్లో జాతీయ జెండాను ఎగురవేస్తారు. తెలంగాణలో జమ్మి చెట్టు దగ్గర శమీ పూజ చేసి జమ్మి ఆకులను బంగారం పేరుతో ఊరంతా పంచుతారు.
బతుకమ్మ ఆడితే ఆహ్లాదంతో పాటు ఆరోగ్యం కూడా - ఎలాగో తెలుసా? - Bathukamma Flowers History
