Medaram Sammakka Saralamma Jathara 2024 : మేడారం జాతరలో అపూర్వఘట్టం ఆవిష్కృతమైంది. మేడారం గద్దె మీదికి సమ్మక్క చేరుకున్నారు. చిలకలగుట్ట నుంచి వనం వీడి జనం మధ్యలోకి వచ్చారు. ఆమె రాకతో సమ్మక నామస్మరణతో మేడారం పరిసరాలు మార్మోగాయి. గాల్లోకి కాల్పులు జరిపి ఎస్పీ శబరీష్‌ అధికారికంగా స్వాగతం పలికారు. సమ్మక్కకు స్వాగతం పలుకుతూ దారి పొడువునా ముగ్గులు వేశారు.
రెండేళ్లకోమారు జరిగే ఆదివాసీ జన జాతరలో అశేష జనవాహినితో కొత్త శోభను సంతరించుకుంది. ఇప్పటికే సారలమ్మ, పగిడిద్దరాజు, గోవిందరాజులు భక్తులకు అభయమిస్తున్నారు. మరోవైపు చిలకలగుట్ట నుంచి సంప్రదాయ నృత్యాలు, అధికార లాంఛనాలతో సమ్మక్క తల్లిని ఊరేగింపుగా తీసుకువచ్చారు. భక్తులు జంపన్న వాగులో పుణ్యస్నానాలాచరిస్తూ ఎత్తుబంగారాలు, ఒడిబియ్యం సమర్పిస్తున్నారు.
మేడారం జాతరకు వస్తున్న భక్తుల రద్దీకి అనుగుణంగా అధికారులు ఏర్పాట్లు చేస్తున్నారు. దేవాదాయ, రెవెన్యూ, పంచాయతీరాజ్‌, పోలీసు శాఖ అధికారులు సమన్వయంతో పని చేస్తున్నారు. వైద్య బృందాలు, పారిశుద్ధ్య సిబ్బంది నిరంతరం శ్రమిస్తున్నారు. మరోవైపు జాతరకు వచ్చేందుకు ఇప్పటికే ఆర్టీసీ(RTC) మహిళలకు ఉచిత ప్రయాణంతో పాటు భారీగా బస్సులను అందుబాటులోకి తెచ్చింది.
మేడారం జాతరను జాతీయ పండుగగా గుర్తించాలని పదేళ్లుగా కోరుతున్నాం: సీతక్క
మరోవైపు జాతరలో భక్తుల రద్దీ పెరగడంతో జేబు దొంగలు రెచ్చిపోతున్నారు. గద్దెలు, జన సమూహాలను ఎంచుకుని చేతివాటం ప్రదర్శిస్తున్నారు. ఏమాత్రం ఆదమరిచినా బంగారు ఆభరణాలు, డబ్బులు, చరవాణులను దొంగిలిస్తున్నారు. హెల్ప్‌డెస్క్‌లు, తప్పిపోయిన శిబిరాల వద్దకు బాధితులు పరుగులు తీసినా ఫలితం లేకుండా పోతోంది. కనీసం సీసీ కెమెరాల్లో చూసి వెతికేందుకు కూడా ప్రయత్నం చేయడం లేదని బాధితులు వాపోతున్నారు.
'మేడారానికి వచ్చే భక్తులకు ఇబ్బందులు కాకుండా చాలా బాగా ఏర్పాట్లు చేశారు. దర్శనానికి అయితే కొంచెం సమయం పడుతుంది కానీ దర్శనం మంచిగా జరుగుతుంది. గత పదిహేను సంవత్సరాల నుంచి ప్రతి జాతరకు వస్తున్నాం. గత జాతరలో క్యూ లైన్ సౌకర్యం లేదు. ఇప్పుడు క్యూ లైన్లతో పాటు ఇతర సౌకర్యాలు ఉన్నాయి. ఇంకా బడ్జెట్కు అనుగుణంగా మెరుగైన వసతులు కల్పించాలని కోరుకుంటున్నాం' -భక్తులు
మేడారం మహాజాతరలో కోలాహలంగా తొలి ఘట్టం - నేడు సమ్మక్క ఆగమనం
సమ్మక్క సారలమ్మ జాతరలో గిరిజన మ్యూజియం - వారి జీవన విధానాన్ని విశ్వవ్యాప్తం చేసేందుకు కృషి
