ఆ ఒక్క ఫోన్ కాల్​తోనే జంట హత్యలు! - రోడ్డున పడ్డ ముగ్గురు పిల్లలు

పుప్పాలగూడలో జంట హత్యల కలకలం - వివాహేతర సంబంధమే కారణం! - ప్రాథమిక దర్యాప్తులో తేల్చిన పోలీసులు

Man and Woman Killed in Extramarital Relationship Puppalaguda : పుప్పాలగూడలో జంట హత్యలు కలకలం సృష్టించాయి. వివాహేతర బంధమే ప్రాణాలు తీసిందని పోలీసులు ప్రాథమిక దర్యాప్తులో తేల్చారు. కొద్దిరోజుల ముందు వీరిద్దరూ అదృశ్యమైనట్టు వేర్వేలు ఠాణాల్లో కేసులు నమోదయ్యాయి. దీంతో హత్యకు గురైంది అంకిత్​ సాకేత్​, బిందు దివాకర్​గా నిర్ధారించారు. ముగ్గురు అనుమానితులను అదుపులోకి తీసుకుని ప్రశ్నిస్తున్నట్లు సమాచారం. పోలీసులు, స్థానికులు తెలిపిన వివరాల మేరకు,

ఛత్తీస్​గఢ్​కు చెందిన బిందు, దివాకర్​ దంపతులు ఉపాధి కోసం తెలంగాణకు వచ్చారు. మొదట్లో ఈ దంపతులు శంకర్​పల్లిలో నివాసం ఉండేవారు. అక్కడ దివాకర్ ప్లంబర్​గా పని చేసేవాడు. వీరికి ముగ్గురు పిల్లలు. అక్కడ నివసించే సమయంలో హౌస్ ​కీపింగ్ పని చేసే సాకేత్​తో బిందుకు పరిచయం ఏర్పడింది. అది కాస్త వివాహేతర బంధానికి దారితీసింది. ఈ విషయం తెలుసుకున్న దివాకర్, తన కుటుంబాన్ని వనస్థలిపురంలోని చింతల్​కుంటకు మార్చాడు.

స్థానికుల సమాచారంతో : కాగా కొన్ని రోజుల క్రితం బిందు, సాకేత్ ఇళ్ల నుంచి బయటకెళ్లారు. భార్య కనిపించడం లేదంటూ ఈ నెల 8న దివాకర్ వసన్థలిపురం పోలీస్​స్టేషన్​లో ఫిర్యాదు చేశారు. 11న సాకేత్​ మాయమయ్యాడని తన సోదరుడి ఫిర్యాదుతో గచ్చిబౌలి పోలీస్ స్టేషన్​లో కేసు నమోదైంది. ఈ నెల 14న పుప్పాలగూడ అనంత పద్మనాభస్వామి గుట్టల్లో రెండు మృతదేహాలున్నట్లు స్థానికులు గుర్తించి పోలీసులకు సమాచారం ఇచ్చారు. రాజేంద్రనగర్​ డీసీపీ శ్రీనివాస్, నార్సింగి ఏసీపీ రమణ గౌడ్, ఇన్​స్పెక్టర్ హరికృష్ణారెడ్డి ఘటనాస్థలికి చేరుకున్నారు.

సాకేత్‌ , బిందు (ETV Bharat)

క్వారీ గుంత వద్ద సాకేత్ మృతదేహం లభించగా, అతని ఒంటిపై కత్తిపోట్లు, ముఖంపై గ్రానైట్ ​రాయితో కొట్టినట్లు ఆనవాళ్లు గుర్తించారు. కొద్ది దూరంలో బిందు మృతదేహం కనిపించగా, ఆమె తలపై రాయితో కొట్టిన గాయాలున్నాయి. ఈ నెల 11న వీరిద్దరూ హత్యకు గురై ఉండొచ్చని, హత్యా ప్రదేశంలో నలుగురుకి మంచి ఉండొచ్చని పోలీసులు భావిస్తున్నారు.

హత్యకు ముందు ఇదీ జరిగింది! : వివిధ కోణాల్లో పోలీసులు దర్యాప్తు చేస్తున్నారు. సాకేత్ బిందుతో వ్యభిచారం చేయిస్తున్నట్లు సమాచారం. ఈ నెల 8న వనస్థలిపురం వెళ్లిన సాకేత్ బైకుపై బిందుని తీసుకుని నానక్​రామ్​గూడ వెళ్లాడు. అక్కడ మిత్రుడి గదిలో 3 రోజులు ఉన్నారు. 11న ఫోన్ ​కాల్​ రావడంతో సాకేత్, బిందు అనంతపద్మనాభస్వామి గుట్టల వద్దకు చేరుకుని అక్కడున్న 4-5 గురితో కలిసి మద్యం సేవించారు.

ఈ క్రమంలో వారందరికి సాకేత్​తో గొడవ జరిగింది. సాకేత్​ను కత్తితో పొడవటం గమనించిన బిందు పారిపోయేందుకు ప్రయత్నించి హత్యకు గురై ఉండొచ్చని పోలీసులు అనుమానిస్తున్నారు. బిందుతో సంబంధం కొనసాగిస్తున్న మరో వ్యక్తి వీరిద్దరిని అక్కడికి రప్పించి హత్య చేశారని మరో కోణంలో వివరాలు సేకరిస్తున్నారు. 5 బృందాలు నిందితుల కోసం గాలిస్తున్నాయి. అయితే ఈ కేసుపైనే ఓ బృందం మధ్యప్రదేశ్ వెళ్లినట్లు సమాచారం.