అన్ని రంగాల్లో ఎలా ఎదగాలో చెప్పేందుకు రామోజీరావు జీవితం ఆదర్శం : సినీ నటుడు మురళీ మోహన్​ - Kamma Sangam Condolence to Ramoji

Kamma Sangam Condolence to Ramoji Rao : చేపట్టిన ప్రతి పనిలో దిగ్విజయంగా ఈనాడు గ్రూపు సంస్థల ఛైర్మన్​ రామోజీరావు విజయం సాధించారని సినీ నటుడు మురళీ మోహన్​ అన్నారు. పత్రిక ప్రపంచంలో నూతన ఒరవడిని సృష్టించి ఎంతో మందికి జీవితాన్నిచ్చారన్నారు. హైదరాబాద్​లోని అమీర్​ పేటలో కమ్మ సంఘం ఆధ్వర్యంలో నిర్వహించిన ఈనాడు గ్రూపు సంస్థల ఛైర్మన్​ రామోజీరావు సంస్మరణ సభలో ఆయన మాట్లాడారు.

Kamma Sangam Paid Tributes to Ramoji Group Chairman Ramoji Rao : పత్రిక ప్రపంచంలో నూతన ఒరవడిని సృష్టించి ఎంతో మందికి జీవితాన్నిచ్చిన ఈనాడు గ్రూపు సంస్థల ఛైర్మన్​ రామోజీరావు ఎంతో మందికి ఆదర్శమని సినీ నటుడు మాగంటి మురళీ మోహన్​ అన్నారు. చిన్నప్పటి నుంచే కష్టపడి చదివి విజయం సాధించారని తెలిపారు. ఎన్టీఆర్​ రాజకీయాల్లోకి రావడంలో రామోజీరావు కీలక పాత్ర పోషించారని గుర్తు చేశారు. హైదరాబాద్​లోని అమీర్​ పేటలో కమ్మ సంఘం ఆధ్వర్యంలో నిర్వహించిన ఈనాడు గ్రూపు సంస్థల ఛైర్మన్​ రామోజీరావు సంస్మరణ సభలో ఆయన మాట్లాడారు. ఈ సంస్మరణ సభలో ప్రముఖులు పాల్గొన్నారు.

ఈ సందర్భంగా సినీ నటుడు మురళీ మోహన్​ మాట్లాడుతూ చేపట్టిన ప్రతి పనిని దిగ్విజయంగా రామోజీరావు విజయం సాధించారని తెలిపారు. అన్ని రంగాల్లో ఎలా ఎదగాలో చెప్పేందుకు ఆయన మార్గదర్శిగా నిలిచారన్నారు. భౌతికంగా ఆయన మనతో లేకపోయినా ఆయన జ్ఞాపకాలు మనతో ఎల్లప్పుడూ ఉంటాయని త్రిపురనేని హనుమాన్​ చౌదరి అన్నారు. రామోజీరావుకు ఉన్న ముందు చూపు వల్ల ఆయన అన్ని రంగాల్లో ముందంజలో ఉన్నారని జస్టిస్​ చల్లా కోదండరామ్​ పేర్కొన్నారు.

"ఒక సామాన్యమైన రైతు కుటుంబంలో పుట్టి చిన్నప్పటి నుంచే కష్టపడి చదువుకొని ఈనాడు ప్రపంచంలో ఎక్కడా కూడా ఇంత అద్భుతమైన ఫిల్మ్​సిటీ లేదు అన్నట్లుగా రామోజీ ఫిల్మ్​సిటీని నిర్మించారు. ఈ ఘనత ఆయనదే. ఎన్టీఆర్​తో పాటు రామోజీరావు గారికి కూడా భారతరత్న ఇవ్వాలి." - మురళీ మోహన్​, సినీ నటుడు

తెలుగువారికి గొప్ప వారసత్వ సంపద అందించిన వారు రామోజీ అని ఏపీ మాజీ ఎన్నికల ప్రధాన అధికారి నిమ్మగడ్డ రమేశ్​ కొనియాడారు. పత్రికా రంగానికి ఆయన చేసిన సేవ ఎంతో గొప్పదని కీర్తించారు. సమాజానికి, దేశానికి రామోజీరావు ఎంతో సేవ చేశారని సీబీఐ మాజీ డైరెక్టర్​ జనరల్​ మన్నెం నాగేశ్వరరావు అన్నారు. అలాగే ఆయన ఆశయాలను ముందుకు తీసుకెళ్లడమే ఆయనకిచ్చే అసలైన నివాళి అని చెప్పారు.

"ఆయన ఒక సంస్థ. ఎన్నో విషయాలు చిన్నదాని నుంచి పెద్దదాని దాకా ప్రియా పచ్చళ్ల నుంచి రామోజీ ఫిల్మ్​ సిటీ వరకు అన్నింటా ఆయన విజయం. ఇంటింటా మొట్టమొదటగా వచ్చే పేపర్​ ఏదైనా ఉందంటే అది ఈనాడు. పాఠకుల కోసం జర్నలిజం చాలా అవసరం. సమాజానికి, సాహిత్యానికి, దేశానికి ఎన్నో సేవలు చేశారు. రామోజీరావు గారు అద్భుతమైన వ్యక్తి." - త్రిపురనేని హనుమాన్​ చౌదరి, విశ్రాంత ఇంజినీర్​