పది పాసైతే చాలు ఐటీబీపీలో కానిస్టేబుల్‌ కొలువులు - చివరి తేదీ ఎప్పుడంటే ?

పదో తరగతితో ఐటీబీపీలో 545 కానిస్టేబుల్‌ (డ్రైవర్‌) కొలువులు - దరఖాస్తుకు పురుషులకు మాత్రమే అవకాశం - నోటిఫికేషన్​ పూర్తి వివరాలు మీ కోసం

ITBP Constable Driver Recruitment 2024 : టెన్త్​ అర్హతతో ఏమైనా ప్రభుత్వ రంగ ఉద్యోగం కోసం ఎదురుచూస్తున్నారా ? అయితే ఇది మీకోసమే. తాజాగా ఇండో-టిబెటన్‌ బోర్డర్‌ పోలీస్‌ ఫోర్స్‌ (ఐటీబీపీ) 545 కానిస్టేబుల్‌ (డ్రైవర్‌) గ్రూప్‌ సి నాన్‌ గెజిటెడ్‌ (నాన్‌ మినిస్టీరియల్‌) పోస్టులు భర్తీ చేసింది. ఈ మేరకు పోస్టులకు సంబంధించిన ప్రకటనను విడదల చేసింది. దీనికి కేవలం పురుషులు మాత్రమే దరఖాస్తు చేయాలి. తాత్కాలిక ప్రాతిపదికన ఉద్యోగంలోకి తీసుకున్నప్పటికీ శాశ్వత విధుల్లోకి మార్చవచ్చు. అన్‌రిజర్వుడ్‌ కేటగిరీలో 209 పోస్టులు, ఎస్సీ 77, ఎస్టీ 40, ఓబీసీ 164, ఈడబ్ల్యూఎస్‌లకు 55 పోస్టులు కేటాయించారు.

ఉద్యోగానికి అర్హతలు : పదోతరగతి లేదా మెట్రిక్యులేషన్‌ పాసై ఉండాలి. దానితో పాటు హెవీ వెహికల్​ డ్రైవింగ్​ లైసెన్స్​ కూడా తప్పనిసరిగా ఉండాలి. ఉద్యోగ అనుభవం ఉంటే సర్టిఫికెట్​కు జతచేయాలి.

వయసు : 21 నుంచి 27 సంవత్సరాల మధ్య ఉండాలి. ఎస్సీ, ఎస్టీలకు ఐదేళ్లు సడలింపు ఉంటుంది. ఓబీసీలకు మూడేళ్లు, మాజీ సైనికోద్యోగులకు మూడు నుంచి ఎనిమిదేళ్ల వయసు సడలింపు ఉంటుంది

దరఖాస్తు ఫీజు : అన్‌రిజర్వుడ్, ఓబీసీ, ఈడబ్ల్యూఎస్‌లకు దరఖాస్తు రుసుము రూ.100. ఎస్సీ, ఎస్టీ, మాజీ సైనికోద్యోగులకు ఎలాంటి ఫీజు లేదు.

ఇలా ఎంపిక చేస్తారు

• మొదట స్టేజ్​లో ఫిజికల్‌ ఎఫిషియన్సీ టెస్ట్‌ (పీఈటీ) ఫిజికల్‌ స్టాండర్డ్‌ టెస్ట్‌ (పీఎస్‌టీ) ఉంటుంది. రెండో దశలో రాత పరీక్ష, మూడో దశలో సర్టిఫికేషన్​ వెరిఫికేషన్​, ప్రాక్టికల్‌/ స్కిల్‌ టెస్ట్, వైద్య పరీక్షలు ఉంటాయి.
• మొదటి దశ ఎఫిషియన్సీ టెస్ట్‌ (పీఈటీ)లో అభ్యర్థులు ఏడున్నర నిమిషాల్లో 1.6 కి.మీ. పరుగును పూర్తిచేయాలి. 11 అడుగుల లాంగ్‌జంప్​నకు, మూడున్నర అడుగుల హైజంప్​నకు మూడు అవకాశాలు ఇస్తారు. దీంట్లో అర్హత సాధిస్తే తర్వాత ఫిజికల్‌ స్టాండర్డ్‌ టెస్ట్‌ (పీఎస్‌టీ)కు ఎంపిక చేస్తారు.
• ఫిజికల్‌ స్టాండర్డ్‌ టెస్ట్‌ (పీఎస్‌టీ)లో అభ్యర్థుల ఎత్తు 170 సెం.మీ, ఛాతీ 80-85 సెం.మీ ఉండాలి. ఎస్టీ అభ్యర్థుల ఎత్తు 162.5 సెం.మీ, ఛాతీ 76-81 సెం.మీ ఉండాలి. సరిగ్గా వయసుకు, ఎత్తుకు తగిన బరువు ఉండాలి. దీంట్లో అర్హత సాధించిన వాళ్లను తదుపరి రాత పరీక్షకు ఎంపిక చేస్తారు.

రాత పరీక్ష

• ఓఎంఆర్‌ లేదా కంప్యూటర్‌ బేస్ట్‌ విధానంలో రాత పరీక్ష ఉంటుంది. మల్టీఫుల్​ ఛాయిస్​ ప్రశ్నలు 100 మార్కులకు ఉంటాయి.
• ఈ రాత పరీక్షలో జనరల్, ఈడబ్ల్యూఎస్, మాజీ సైనికోద్యోగులు 35 శాతం మార్కులు సాధించాలి. ఎస్సీ, ఎస్టీ, ఓబీసీ (ఎన్‌సీఎల్‌) అభ్యర్థులు 33 శాతం అర్హత మార్కులు సాధించాలి.
• రాత పరీక్షలో అర్హదత సాధించినవారి ధ్రువపత్రాలను పరిశీలించి ప్రాక్టీకల్​ టెస్ట్​కు ఎంపిక చేస్తారు. దీన్ని 50 మార్కులకు నిర్వహిస్తారు. ఇందులో హెవీ మోటార్‌ వెహికల్‌ డ్రైవింగ్‌ పరిజ్ఞానానికి సంబంధించిన ప్రశ్నలు ఇస్తారు.
• చివరిగా దీంట్లో అర్హత సాధించినవారికి వైద్య పరీక్షలు నిర్వహించి కేటగిరీల వారిగా తుది ఎంపిక చేస్తారు.

సన్నద్ధత : పదోతరగతి స్థాయిలోనే ప్రశ్నపత్రం ఉంటుంది. అందుకు తగ్గట్లుగా పదో తరగతి సబ్జెక్టుల్లోని ముఖ్యాంశాలపై పట్టు సాధించాలి. మోటార్‌ మెకానిజం, ఎలక్ట్రికల్‌ సిగ్నలింగ్, సేఫ్టీ, ప్రికాషన్స్, గేర్స్‌ ఛేంజింగ్, రోడ్‌ సైన్స్ మొదలైన అంశాలపైన పరిజ్ఞానం పెంచుకోవాలి. దీంతో స్కిల్‌ టెస్టులో ఎక్కువ మార్కులు సాధించే అవకాశం ఉంటుంది.

దరఖాస్తుకు చివరి తేదీ : 06.11.2024

వెబ్‌సైట్‌: https://recruitment.itbpolice.nic.in