Loan App Recovery Agents Arrest : ఈఎంఐ(EMI) డబ్బులు కట్టలేదని ఓ యువతి న్యూడ్ ఫొటోలను కుటుంబ సభ్యులకు షేర్ చేసిన ఇద్దరు రికవరీ ఏజెంట్లను పోలీసులు అరెస్టు చేశారు. ఈ ఘటన ఆంధ్రప్రదేశ్లోని తిరుపతి జిల్లా సూళ్లూరుపేటలో జరిగింది. అంతకుముందు యువతి బంధువులు, కుటుంబ సభ్యులకు ఫోన్ చేసి లోన్ డబ్బులు చెల్లించలేదని దుర్భాషలాడారని పోలీసులు తెలిపారు. యువతి ఇచ్చిన ఫిర్యాదుతో కేసు నమోదు చేసుకున్న పోలీసులు, ఇద్దరు ఏజెంట్లను అరెస్టు చేశారు. ఈ కేసుకు సంబంధించిన వివరాలను తిరుపతి జిల్లా ఎస్పీ సుబ్బారాయుడు మీడియాకు వెల్లడించారు.
తిరుపతి జిల్లా సూళ్లూరుపేటకు చెందిన యువతి హైదరాబాద్ నగరంలో సాఫ్ట్వేర్ ఇంజినీర్గా వర్క్ చేస్తోంది. ఆరు నెలల కిందట ఆమె ఫినబుల్ అనే లోన్ యాప్లో ఈఎంఐ పద్ధతిలో లోన్ తీసుకుంది. సమయానికి ఆమె ఈఎంఐ చెల్లించలేదు. దీంతో డబ్బులు చెల్లించకపోతే యువతి ఫొటోలను అసభ్యకరంగా మార్చి సామాజిక మాధ్యమాల్లో పోస్టు చేస్తామని రికవరీ ఏజెంట్లు ఆమెను బెదిరించారు. అంతే కాకుండా బాధితురాలి తల్లిదండ్రులు, బంధువులను కూడా ఫోన్ చేసి డబ్బులు కట్టలేదని నోటికి వచ్చినట్లు దూషించారు.
అయినా సరే అంతటితో ఆగకుండా రికవరీ ఏజెంట్లు ఆమె సోదరుడికి కొన్ని న్యూడ్ ఫొటోలను కూడా పంపించారు. వారి వేధింపులు తాళలేక యువతి పోలీసులను ఆశ్రయించిందని జిల్లా ఎస్పీ తెలిపారు. వెంటనే స్పందించిన పోలీసులు ఇద్దరి నిందితులను అరెస్టు చేశారు. ఈ క్రమంలో జిల్లా ఎస్పీ సుబ్బారాయుడు లోన్ తీసుకునే వారికి కొన్ని జాగ్రత్తలు చెప్పారు. నాన్ బ్యాంకింగ్ పైనాన్స్ కంపెనీల వద్ద రుణాలు తీసుకునే సమయంలో జాగ్రత్తగా ఉండాలని హెచ్చరించారు. ఫినబుల్ లోన్ యాప్పై సైబర్ క్రైమ్ కేసు నమోదు చేసినట్లు తెలిపారు.
"సూళ్లూరుపేటకు చెందిన యువతి హైదరాబాద్ నగరంలో సాఫ్ట్వేర్ ఇంజినీర్. ఆరు నెలల కిందట ఆమె ఫినబుల్ అనే లోన్ యాప్లో ఈఎంఐ పద్ధతిలో లోన్ తీసుకుంది. ఐదు ఈఎంఐలు కట్టిన తర్వాత ఆరో ఈఎంఐ సరైన సమయానికి కట్టలేదు. అప్పటి నుంచి లోన్ రికవరీ ఏజెంట్ల వేధింపులు మొదలయ్యాయి. యువతి న్యూడ్ ఫొటోలు సామాజిక మాధ్యమాల్లో పెడతామని బెదిరింపు. పోలీసులకు ఫిర్యాదు చేసిన యువతి. ఇద్దరు నిందితులు అరెస్ట్. లోన్ యాప్లపై అప్రమత్తంగా ఉండాలి." - సుబ్బారాయుడు, తిరుపతి జిల్లా ఎస్పీ
లోన్ యాప్లతో జాగ్రత్త : ఈ మధ్యకాలంలో లోన్ యాప్ల బాధితులు ఎక్కువైపోయారు. లోన్ యాప్ల ఎంతో మంది ప్రాణాలు కోల్పోయారు. మరెంతో మంది తమకు జరిగిన అవమానాలను బయటకు చెప్పలేక గుట్టుచప్పుడు కాకుండా ఉంటున్నారు. ఇలా నాన్ బ్యాంకింగ్ ఫైనాన్స్ కంపెనీల వద్ద నుంచి రుణాలు తీసుకున్నప్పుడు జాగ్రత్తలు పాటించడమే నయం. ఇంకా చెప్పాలంటే లోన్ యాప్లో రుణాలు తీసుకోకపోవడమే ఉత్తమం. ఎందుకంటే వారు మన దగ్గర నుంచి వ్యక్తిగత సమాచారాన్ని స్వీకరించి, లోన్ కట్టకపోతే వేధింపులకు దిగుతారు. చివరికి అవి ప్రాణాలు కోల్పోయే స్థాయివరకు వెళుతున్నాయి.
ఫేక్ లోన్ యాప్లను ఇలా గుర్తించండి! - ఆ వలలో పడిపోతే అంతే!
డిజిటల్ లోన్ తీసుకుంటున్నారా? ఇచ్చేవాళ్లు ఫేక్ బ్యాచ్ అయితే డేంజర్! ఇలా చెక్ చేయండి
