దగ్గుతో నిద్ర కూడా పట్టట్లేదా? ఈ స్వీట్ మందు తీసుకుంటే తగ్గే ఛాన్స్!

-దగ్గు సమస్యకు ఆయుర్వేద ఔషధంతో పరిష్కారం -ముఖ్యంగా చిన్న పిల్లలకు ఎంతో ఉపయోగం

Cough Remedies at Home: చలికాలంలో జలుబుతో పాటు దగ్గు సమస్య చాలా మందిని వేధిస్తుంటుంది. రోజు ట్యాబ్లెట్లు తీసుకున్నా సరే.. కొంత మందిలో అంత సులభంగా నయం కాదు. ఇలా దగ్గు సమస్యతో ఇబ్బంది పడుతున్నవారు.. ముఖ్యంగా చిన్న పిల్లలకు ఈ ఔషధం ఎంతో సాయం చేస్తుందని ఆయుర్వేద నిపుణులు డాక్టర్ గాయత్రీ దేవి అంటున్నారు. ఈ నేపథ్యంలోనే ఆయుర్వేద ఔషధాన్ని ఎలా తయారు చేసుకోవాలో ఇప్పుడు తెలుసుకుందాం.

కావాల్సిన పదార్థాలు

• 80 గ్రాముల వంశలోచనం చూర్ణం (వెదురు ఉప్పు)
• 40 గ్రాముల పిప్పళ్ల చూర్ణం
• 20 గ్రాముల యాలకుల చూర్ణం
• 10 గ్రాముల దాల్చిన చెక్క చూర్ణం
• 150 గ్రాముల పటిక బెల్లం చూర్ణం

తయారీ విధానం

• ముందుగా ఓ గిన్నెను తీసుకుని అందులో వెదురు ఉప్పు, పిప్పళ్లు, యాలకుల, దాల్చిన చెక్క, పటిక బెల్లం చూర్ణం తీసుకుని బాగా కలపాలి.
• దీనికి గాలి తగలకుండా ఉండేలా గట్టిగా మూత పెట్టుకుని గాజు సీసాలో భద్రపరుచుకోవాలి.
• దగ్గు వచ్చే పిల్లలకు 3 లేదా 4 పూటలు ఒక చిన్నా చెంచాడు చూర్ణాన్ని ఇవ్వాలని గాయత్రీ దేవి చెబుతున్నారు.
• దీనిని నేరుగా మింగేయకుండా.. నాలుక మీద వేసుకుని చప్పరిస్తూ తీసుకోవాలని సూచిస్తున్నారు. ఒకవేళ చిన్నపిల్లలు ఇలా చేయకపోతే కొంచెం తేనె వేసి కలిపి ఇవ్వాలని చెబుతున్నారు.

వెదురు ఉప్పు: దీనికి కఫ దోషాన్ని తగ్గించే గుణం ఎక్కువగా ఉంటుందని చెబుతున్నారు. ఇంకా కఫాన్ని తగ్గించడంతో పాటు గొంతులో వచ్చే ఇబ్బందులను తొలగిస్తుందని అంటున్నారు.

పిప్పళ్లు: కారంగా ఉండే ఈ పిప్పళ్లు కఫాన్ని తగ్గిస్తాయని చెబుతున్నారు. ఇది శరీరానికి వేడి చేయకుండా మంచి టానిక్​లాగా పనిచేస్తుందని అంటున్నారు.

యాలకులు: దీనికి కఫ దోషాన్ని తగ్గించే గుణం ఎక్కువగా ఉంటుందని చెబుుతున్నారు. ఇంకా గొంతులోని ఎలర్జీలను తగ్గిస్తుందని అంటున్నారు. దీంతో పాటు జీర్ణశక్తిని మెరుగుపరుస్తుందని వివరిస్తున్నారు.

దాల్చిన చెక్క: శరీరంలోని ఇన్​ఫెక్షన్లు తగ్గించడంలో దాల్చిన చెక్క ఎంతగానో ఉపయోగపడుతుందని చెబుతున్నారు. కఫాన్ని తగ్గించడంతో పాటు జీర్ణశక్తిని పెంచుతుందని వివరిస్తున్నారు.

పటిక బెల్లం: ఇది తీయగా ఉన్నా.. గొంతులోని కఫాన్ని తగ్గించే గుణం ఎక్కువగా ఉంటుందని చెబుతున్నారు.

NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.