GHMC BRS Corporators Joining in Congress : గ్రేటర్ హైదరాబాద్‌లో అధికార, విపక్ష పార్టీల లెక్కలు మారుతున్నాయి. అసెంబ్లీ ఎన్నికల్లో రాజధానిలో ఊహించని ఫలితాన్ని చవిచూసిన కాంగ్రెస్ పార్టీ, వచ్చే పార్లమెంట్ ఎన్నికల్లో సత్తా చాటుకోవాలని భావిస్తోంది. ఈ మేరకు గ్రేటర్ హైదరాబాద్ మున్సిపల్ కార్పొరేషన్పై గట్టిగానే గురిపెట్టింది. ఎమ్మెల్యేలు, మంత్రుల స్థాయిలో మంతనాలు సాగిస్తూ బీఆర్ఎస్ను బలహీనపర్చేందుకు పావులు కదుపుతోంది.
2020లో గ్రేటర్లోని 150 డివిజన్లకు జరిగిన ఎన్నికల్లో బీఆర్ఎస్ - 55, బీజేపీ - 48, ఎంఐఎం - 44 డివిజన్లలో గెలుపొందాయి. కానీ కాంగ్రెస్ మాత్రం ఏఎస్ రావు నగర్, ఉప్పల్, లింగోజిగూడ ఈ 3 చోట్ల మాత్రమే గెలిచింది. అందులో ఏఎస్ రావు నగర్ కార్పొరేటర్ బీఆర్ఎస్లోకి వెళ్లడంతో కాంగ్రెస్ కార్పొరేటర్ల సంఖ్య 2కు పడిపోయింది.
56 స్థానాల్లో గెలిచిన బీఆర్ఎస్, ఎంఐఎం మద్దతుతో మేయర్ పీఠాన్ని కైవసం చేసుకుంది. బల్దియా ఎన్నికల్లో కాంగ్రెస్ ఘోర పరాభవానికి అప్పటి పీసీసీ అధ్యక్షుడు ఉత్తమ్ కుమార్ రెడ్డి తన పదవికి రాజీనామా చేశారు. బల్దియాపై పూర్తి పట్టు కోల్పోయిన కాంగ్రెస్ ఇటీవల అసెంబ్లీ ఎన్నికల్లోనూ గ్రేటర్లో ఆశించిన విజయాన్ని దక్కించుకోలేకపోయింది. హైదరాబాద్, రంగారెడ్డి, మేడ్చల్ జిల్లాలో 29 స్థానాలకు మూడింట మాత్రమే కాంగ్రెస్ అభ్యర్థులు గెలిచారు. ఖైరతాబాద్ బీఆర్ఎస్ కార్పొరేటర్ విజయారెడ్డి, మాదాపూర్ కార్పొరేటర్ జగదీశ్వర్ గౌడ్లు బీఆర్ఎస్ నుంచి ఎమ్మెల్యేల టికెట్లు ఆశించి భంగపడ్డారు. దాంతో కాంగ్రెస్లో చేరి టికెట్ దక్కించుకున్నా గెలవలేకపోయారు.
కాంగ్రెస్లోకి కొనసాగుతున్న వలసలు - బీఆర్ఎస్కు తీగల కృష్ణారెడ్డి రాజీనామా
ఈ పరిణామాలతో లోక్సభ ఎన్నికల్లోపు గ్రేటర్లో పార్టీని బలోపేతం చేసుకోకపోతే 4 ఎంపీ స్థానాలపై ప్రభావం పడుతుందని కాంగ్రెస్ సీనియర్లు అంచనా వేశారు. అందుకే ముందస్తుగా బీఆర్ఎస్, బీజేపీ కార్పొరేటర్లను తమ పార్టీలోకి ఆహ్వానిస్తూ తలుపులు తెరిచారు. అసెంబ్లీ ఎన్నికలకు ముందు ఖైరతాబాద్, మాదాపూర్, హఫీజ్ పేట, రహ్మత్ నగర్ డివిజన్ కార్పొరేటర్ల చేరికతో బల్దియాలో కాంగ్రెస్కు 6 సీట్లు (Congress Joinings) పెరిగాయి. కాంగ్రెస్ అధికారంలోకి వచ్చాక వివిధ స్థాయిల్లో ఉన్న అగ్రనేతల సంప్రదింపులు, బీఆర్ఎస్ అధిష్ఠానంపై అసంతృప్తితో మాజీ మేయర్ బొంతు రామ్మోహన్తో పాటు ఆయన సతీమణి, చర్లపల్లి డివిజన్ కార్పొరేటర్ శ్రీదేవి హస్తం గూటికి చేరారు.
అలాగే బోరబండ బీఆర్ఎస్ కార్పొరేటర్, మాజీ డిప్యూటీ మేయర్ బాబా ఫసీయుద్దీన్ కూడా కాంగ్రెస్ కండువా కప్పుకున్నారు. పది రోజుల వ్యవధిలోనే జీహెచ్ఎంసీ డిప్యూటీ మేయర్, తార్నాక కార్పొరేటర్ మోతె శ్రీలతతో పాటు (Corporator Mothe Srilatha) బీఆర్ఎస్ కార్మిక విభాగం అధ్యక్షుడు శోభన్ రెడ్డి బీఆర్ఎస్కు రాజీనామా చేసి కాంగ్రెస్లో చేరారు. దీంతో గ్రేటర్లో బీఆర్ఎస్ తేనెతుట్టె మరోసారి కదిలినట్టైంది. ఆరుగురు కార్పొరేటర్లు కాస్తా ఇప్పుడు తొమ్మిది మందయ్యారు.
కాంగ్రెస్లో చేరిన జీహెచ్ఎంసీ డిప్యూటీ మేయర్ మోతే శ్రీలత దంపతులు
తెలంగాణ ఉద్యమంలో ఉండి పార్టీ కోసం పని చేసిన వాళ్లకు తగిన గుర్తింపు లేకపోవడం వల్లే తన భర్తతో కలిసి పార్టీ మారుతున్నట్లు డిప్యూటీ మేయర్ శ్రీలత తెలిపారు. బీఆర్ఎస్లో అవమానాలు ఎదుర్కొంటూ ఇబ్బందులకు గురవుతున్న నాయకులు స్వేచ్ఛగా తమ పార్టీలో చేరవచ్చని హైదరాబాద్ జిల్లా ఇంఛార్జి మంత్రి పొన్నం ప్రభాకర్ ప్రకటించారు.
గ్రేటర్లోని బీఆర్ఎస్, బీజేపీ నుంచి మరికొంత మంది కార్పొరేటర్లు కూడా కాంగ్రెస్ వైపు చూస్తున్నట్లు తెలుస్తోంది. తమ నియోజకవర్గ ఎమ్మెల్యే కాంగ్రెస్లో చేరితే తామంతా అదే పార్టీలోకి వెళ్తామనే ఆలోచనలో ఉన్నారని సమాచారం. సమీప భవిష్యత్లో గ్రేటర్లోని కొందరు ఎమ్మెల్యేలు పార్టీ మారితే, బీఆర్ఎస్ నుంచి పెద్ద ఎత్తున కార్పొరేటర్లు కాంగ్రెస్లో చేరే అవకాశాలు కనిపిస్తున్నాయి. అంతేకాకుండా ఇటీవల చేరిన మాజీ మేయర్ బొంతు రామ్మోహన్, మాజీ డిప్యూటీ మేయర్ బాబా ఫసీయుద్దీన్తోనూ కొంతమంది కార్పొరేటర్లు నిత్యం సంప్రదింపులు జరుపుతున్నట్లు సమాచారం. వారి చేరికల బాధ్యతలను ముఖ్యమంత్రి రేవంత్ రెడ్డి బొంతు రామ్మోహన్కు అప్పగించినట్లు బల్దియాలో జోరుగా చర్చించుకుంటున్నారు.
కారు జస్ట్ సర్వీసింగ్కు వెళ్లింది - త్వరలో జెట్ స్పీడ్లో దూసుకొస్తుంది : కేటీఆర్
ఇటీవల మేయర్ గద్వాల్ విజయలక్ష్మి (Mayor Gadwala Vijayalakshmi) కూడా సీఎంను కలవడంపై పార్టీ మారతారనే ప్రచారం జరిగింది. కానీ ఆ ప్రచారాన్ని మేయర్ ఖండిస్తూ తాను బీఆర్ఎస్లోనే కొనసాగుతానని స్పష్టం చేశారు. అలాగే పలు డివిజన్లలో జనంపై పట్టుకోసం బీఆర్ఎస్ నేతలపై కూడా కాంగ్రెస్ కన్నేసింది. అసెంబ్లీ ఎన్నికల్లో నగరంలో అత్యధిక స్థానాలు గెలుచుకొని గ్రేటర్లో పరువు నిలబెట్టుకున్న బీఆర్ఎస్ ఎమ్మెల్యేలు, కార్పొరేటర్లు చేజారకుండా విశ్వ ప్రయత్నాలు చేస్తోంది.
KTR Meet With BRS Corporators : నగర కార్పొరేటర్లతో బీఆర్ఎస్ వర్కింగ్ ప్రెసిడెంట్ కేటీఆర్ తెలంగాణ భవన్లో సమావేశమై దిశానిర్దేశం చేశారు. అయినా కూడా కార్పొరేటర్లు ఒక్కొక్కరుగా కాంగ్రెస్ గూటికి చేరుతుండటంతో రాజధానిలో బీఆర్ఎస్ బలం తగ్గుముఖం పడుతోంది. 56 మంది కార్పొరేటర్లకు గానూ 47 మంది కార్పొరేటర్లు మిగిలారు. వారిలో కనీసం పాతిక మందిని తమవైపు తిప్పుకోవాలని కాంగ్రెస్ వ్యూహం రచించింది. ఈ నెల 27న చేవెళ్లలో జరిగే సభలో కనీసం 10 మంది కార్పొరేటర్లు ప్రియాంక గాంధీ, ముఖ్యమంత్రి రేవంత్ రెడ్డి సమక్షంలో తమ పార్టీలో చేరుతున్నట్లు కాంగ్రెస్ నేతలు చెబుతున్నారు.
కాంగ్రెస్లో చేరనున్న జీహెచ్ఎంసీ ఉప మేయర్ శ్రీలతా రెడ్డి దంపతులు
