POCSO Act on Joni Master : ప్రముఖ డాన్స్ మాస్టర్ జానీ మాస్టర్పై పోక్సో యాక్ట్ కింద కేసు నమోదు అయింది. మైనర్గా ఉన్న సమయంలోనే ముంబయి హోటల్లో తనపై అత్యాచారం చేశారని పోలీసులకు బాధితురాలు ఇచ్చిన ఫిర్యాదు మేరకు పోక్సో యాక్ట్ను ఎఫ్ఐఆర్లో యాడ్ చేశారు. ప్రస్తుతం పరారీలో ఉన్న జానీ మాస్టర్ కోసం పోలీసులు గాలిస్తున్నారు. ఈ గాలింపు చర్యలను పోలీసులు ముమ్మరం చేశారు.
జానీ మాస్టర్ తనపై లైంగిక వేధింపులకు పాల్పడ్డాడంటూ ఇటీవల ఆయన అసిస్టెంట్ పోలీసులకు ఫిర్యాదు చేశారు. ఈ వేధింపులు 2019 నుంచి ఉన్నాయని ఆమె ఫిర్యాదులో పేర్కొంది. '2017లో జానీ మాస్టర్ పరిచయం అయ్యారు. 2019లో అతని బృందంలో సహాయ నృత్య దర్శకురాలిగా చేరి, అదే ఏడాది ముంబయిలో ఓ సినిమా చిత్రీకరణ నిమిత్తం అక్కడికి వెళ్లాను. తనతో పాటు మరో ఇద్దరు సహాయకులం వెళ్లాం. అక్కడ హోటల్లో నాపై జానీ మాస్టర్ అత్యాచారానికి పాల్పడ్డాడు. ఈ విషయం ఎవరికైనా చెబితే మరి డ్యాన్స్ చేయవని బెదిరించాడు. సినిమా పరిశ్రమలో ఎప్పటికీ పని చేయలేవని లొంగదీసుకున్నాడు.
దీన్ని అవకాశంగా తీసుకుని హైదరాబాద్ నుంచి ఇతర నగరాలకు సినిమా చిత్రీకరణకు తీసుకెళ్లినప్పుడు పలుమార్లు అత్యాచారానికి పాల్పడ్డాడు. షూటింగ్ సమయాల్లోనూ వ్యానిటీ వ్యాన్లో అసభ్యంగా ప్రవర్తించేవాడు. ఆయన వేధింపులు భరించలేకే జానీ మాస్టర్ బృందం నుంచి బయటకొచ్చేశాను. అయినా తన పని చేసుకోకుండా అడ్డు పడుతున్నారు. ఇతర ప్రాజెక్టులు రాకుండా చేస్తున్నారు.' అని బాధితురాలు ఫిర్యాదులో పేర్కొన్నారు. ఈ మేరకు బాధితురాలు రాయదుర్గం పోలీస్ స్టేషన్లో ఫిర్యాదు చేశారు. జీరో ఎఫ్ఐఆర్ నమోదు చేసి కేసును నార్సింగికి రాయదుర్గం పోలీసులు బదిలీ చేశారు.
యువతిపై లైంగిక దాడిని తీవ్రంగా ఖండిస్తున్నాం : అసిస్టెంట్ కొరియోగ్రాఫర్గా పనిచేస్తున్న యువతిపై జరిగిన లైంగిక వేధింపుల ఘటనను తీవ్రమైన చర్యగా భావిస్తున్నామని బీజేపీ మహిళా మోర్చా రాష్ట్ర అధ్యక్షురాలు శిల్పారెడ్డి తెలిపారు. ఆ యువతిపై ఐదేళ్లపాటు నరకం చూపించడంతో పాటు వేధింపులు, దాడులకు పాల్పడడాన్ని తీవ్రంగా ఖండిస్తున్నట్లు తెలిపారు. ఇది లవ్ జిహాద్ కేసుగా ఆమె పేర్కొన్నారు. హిందూ అమ్మాయిని ట్రాప్ చేసినట్లుగా స్పష్టంగా ఎఫ్ఐఆర్లో నమోదు చేసినప్పటికీ కేసును నీరుగార్చేందుకు నిందితుడిపై పనికిరాని కేసులు పెట్టడమేంటని ప్రశ్నించారు. ఇంతవరకు నిందితుడిని అరెస్టు చేయకపోవడం దుర్మార్గమని మండిపడ్డారు. ఈ ఘటనకు కొందరు సినీ ఇండస్ట్రీ పెద్దలతో పాటు అధికార పార్టీ నాయకుల అండదండలు ఉన్నట్లు ఆరోపణలు వస్తున్నాయన్నారు.
లైంగిక వేధింపుల ఆరోపణలు - జానీ మాస్టర్కు తెలుగు ఫిలిం ఛాంబర్ షాక్ - JANI MASTER CONTROVERSY
