Farmers Protest Over Dharani Portal Technical Issues : ధరణి పోర్టల్లో సాంకేతిక సమస్యలు, తప్పుల తడకలు సరిదిద్దాలంటూ మహబూబాబాద్ జిల్లా రైతులు సచివాలయం వద్ద ఆందోళన చేశారు. ముఖ్యమంత్రి రేవంత్‌ రెడ్డిని కలిసేందుకు వచ్చిన కేసముద్రం మండలం నారాయణపురం రైతులను పోలీసులు అడ్డుకున్నారు. రెవెన్యూ అధికారుల నిర్లక్ష్యం వల్ల ధరణిలో నమోదు చేసిన తమ వివరాల్లో అన్ని దోషాలు ఏర్పడ్డాయని ఆరోపించారు.
ధరణి పోర్టల్లో సాంకేతిక సమస్యలను అనేక మార్లు సీసీఎల్‌ఏ కమిషనర్ నవీన్‌ మిట్టల్ దృష్టికి తీసుకెళ్లినట్లు రైతులు తెలిపారు. ఆ కార్యాలయం ఎదుట ధర్నాలు చేసినా ఎలాంటి ఫలితం లేదని ఆక్షేపించారు. రెవెన్యూ శాఖ అధికారులు, సిబ్బంది నిర్లక్ష్యం కారణంగా రైతు పేరు : అడవి, తండ్రి పేరు : అడవి అని నమోదు చేయడటం పట్ల తీవ్ర ఆగ్రహం వ్యక్తం చేశారు. ఈ విషయంపై జిల్లా కలెక్టర్, ధరణి కమిటీ సభ్యులు, స్థానిక ఎమ్మెల్యేకి ఫిర్యాదు చేసినా స్పందన శూన్యం అని ధ్వజమెత్తారు.
గ్రామంలో మొత్తం 1900 ఎకరాల భూమి ఉంటే, 700 ఎకరాలకు పట్టాలు ఇచ్చిన రెవెన్యూ శాఖ అధికారులు మిగిలిన 1200 ఎకరాలకు ఇవ్వలేదని రైతులు ఆరోపించారు. అందువల్ల రైతుబంధు పథకం కింద పెట్టుబడి సాయం, రైతు చనిపోతే రైతు బీమా పథకం ఏమీ వర్తించడం లేదని మండిపడ్డారు. ఇంట్లో కూతురు పెళ్లి కట్నం కోసం భూమి అమ్ముదామంటే పట్టాలు లేకపోవడంతో ఏ రైతు కొనుగోలు చేయడానికి ముందుకు రావడం లేదని వాపోయారు.
త్వరలో డిప్యూటీ తహసీల్దార్లకు ధరణి లాగిన్! - DHARANI LOGINS TO DEPUTY TAHSILDARS
తాము సీఎం లేదా మంత్రిని నిందించడానికి రాలేదని కేవలం తమ గోడు విన్నవించుకోవడానికే సచివాలయానికి వచ్చినట్లు తెలిపారు. తమను సచివాలయంలోకి అనుమతించాలంటూ రైతులు లోపకు వెళ్లే ప్రయత్నం చేశారు. పోలీసులు అడ్డుకోవడంతో, ఒక దశలో ఇరు వర్గాల మధ్య వాగ్వాదం చోటుచేసుకుంది. అనుమతి రాగానే లోపలకు పంపుతాం, ఓపిక పట్టండంటూ చెప్పగడంతో ద్వారం వద్ద రైతులు బైఠాయించి తమకు న్యాయం చేయాలంటూ నినాదాలు చేస్తూ నిరసన వ్యక్తం చేశారు. చివరకు రెవెన్యూ శాఖ మంత్రి పొంగులేటి శ్రీనివాసరెడ్డిని కలిసి తమ వెతలు విన్నవించుకుంటామంటూ సచివాలయం వద్ద వేచి చూశారు.
ధరణి పోర్టల్లో సాంకేతిక సమస్యలను వెంటనే పరిష్కరించాలి. మీము ప్రభుత్వాన్ని నిందించడానికి రాలేదు. కేవలం మా సమస్యలు పరిష్కరించాలని కోరుతున్నాం. మాకు న్యాయం చేసే వరకూ ఇక్కడి నుంచి కదలం. ధరణిలో నారాయణపురం మొత్తాన్ని అడవిగా చూపిస్తుంది. అన్నం పెట్టే రైతుకే అన్యాయం జరుగుతుంది. మా భూములకు పట్టాలు ఇవ్వకుండా, అధికారులు మమ్మల్ని తీవ్ర ఇబ్బందులకు గురిచేస్తున్నారు. - నారాయణపురం గ్రామస్థులు
