ఈడీ పని ప్రారంభించింది - ఫార్ములా ఈ-రేసు అంశంలో కేటీఆర్​పై కేసు నమోదు

ఫార్ములా ఈ కారు రేసు అంశంపై కేసు నమోదు చేసిన ఈడీ - ఏసీబీ ఎఫ్ఐఆర్ ఆధారంగా ఈసీఐఆర్ నమోదు చేసిన ఈడీ -మనీలాండరింగ్ నిరోధక చట్టం ప్రకారం కేసు నమోదు

Ed Involved in KTR Formula E Car Race Case : బీఆర్ఎస్ కార్యనిర్వాహక అధ్యక్షుడు కేటీఆర్‌ ఫార్ములా ఈ-కారు కేసులో కీలక పరిణామం చోటుచేసుకుంది. ఈ కేసులో ఈడీ రంగంలోకి దిగింది. ఇప్పటికే ఏసీబీ కేసు నమోదు చేసిన నేపథ్యంలో ఇందులో మనీ లాండరింగ్ వ్యవహారం కూడా దాగి ఉండటంతో కేసు నమోదు చేసింది. ఉదయం ఏసీబీ నుంచి సమాచారం తెప్పించుకున్న ఈడీ అధికారులు ఎఫ్​ఐఆర్ ఆధారంగా కేసు నమోదు చేశారు. మనీలాండరింగ్ నిరోధక చట్టం ప్రకారం కేసు రిజిస్టర్ చేసినట్లు తెలిపారు.

విదేశీ సంస్థకు నగదు చెల్లింపులు ఎలా జరిగాయి : ఫార్ములా-ఈ రేసు వ్యవహారంపై ఇప్పటికే ఏసీబీ విచారణ ప్రారంభించింది. ఇవాళ ఈ కేసుపై హైకోర్టులో కేటీఆర్ క్వాష్ పిటిషన్ దాఖలు చేశారు. ఇరువర్గాల వాదనలు విన్న ధర్మాసనం కేటీఆర్​ను ఈనెల 30 వరకు అరెస్ట్ చేయవద్దని, అయితే దర్యాప్తు చేసుకోవచ్చని సూచించింది. దీంతో త్వరలోనే ఏసీబీ ఈ కేసులో ఏ1గా ఉన్న కేటీఆర్, ఏ2గా ఉన్న ఐఏఎస్‌ అధికారి అర్వింద్‌ కుమార్‌ , ఏ3 హెచ్‌ఎండీఏ చీఫ్‌ ఇంజినీర్‌ బీఎల్‌ఎన్‌ రెడ్డిలకు నోటీసులు జారీ చేయనుంది.

హెచ్‌ఎండీఏ, రాష్ట్ర ఆర్థికశాఖ, ఆర్బీఐ అనుమంతి లేకుండానే నేరుగా విదేశీ సంస్థకు రూ.55 కోట్ల చెల్లింపులు జరిగాయి. వీటిలోనూ రూ.46 కోట్ల వరకు డైరెక్ట్​గా డాలర్ల రూపంలో చెల్లించడం ఉల్లంఘనే అనేది కేసులో ప్రధాన అభియోగం. విదేశీ సంస్థకు నగదు చెల్లింపులు ఎలా జరిగాయనే కోణంలో ఏసీబీ దర్యాప్తు చేస్తోంది. తాజాగా ఇందులోకి ఈడీ కూడా చేరింది. మరోవైపు ఫార్ములా ఈ-కారు ఒప్పందంలో ఎలాంటి అవకతవకలు జరగలేదని బీఆర్​ఎస్ చెబుతోంది. రేవంత్ రెడ్డి ప్రభుత్వం కక్ష సాధించు చర్యల్లో భాగంగానే కేటీఆర్ పేరును చేర్చారని వారు ఆరోపిస్తున్నారు. దీనిని తాము న్యాయపరంగానే ఎదుర్కొంటామని చెబుతున్నారు. ఇవాళ ఈ అంశంపై అసెంబ్లీ పూర్తిస్థాయి చర్చకు బీఆర్​ఎస్ పట్టు పట్టింది.