CM Revanth Reddy Goal is a Drug Free Telangana : డ్రగ్స్ రహిత సమాజమే లక్ష్యంగా కృషి చేస్తున్న తెలంగాణ ప్రభుత్వానికి యువత సహకరించాలని మెగాస్టార్ చిరంజీవి పిలుపునిచ్చారు. డ్రగ్స్ రహిత తెలంగాణపై తన వంతు బాధ్యతగా చిరంజీవి ఇటీవల ఓ ప్రత్యేక వీడియో విడుదల చేశారు. ఈ వీడియోపై సీఎం రేవంత్ రెడ్డి తాజాగా స్పందించారు. డ్రగ్స్పై పోరాడుతున్న చిరంజీవిని మనస్ఫూర్తిగా అభినందిస్తున్నానని అన్నారు. సమాజాన్ని కాపాడుకోవాల్సిన బాధ్యత సినీ పరిశ్రమపై ఉందని పేర్కొన్నారు. హైదరాబాద్లోని బంజారాహిల్స్లో ఉన్న కమాండ్ కంట్రోల్ సెంటర్లో పోలీసుల ప్రత్యేక వాహనాలను సీఎం రేవంత్ రెడ్డి ప్రారంభించారు.
ఈ సందర్భంగా సీఎం రేవంత్ రెడ్డి మాట్లాడుతూ డ్రగ్స్, సైబర్ క్రైమ్పై సినీ పరిశ్రమ యువతకు అవగాహన కల్పించట్లేదని పేర్కొన్నారు. టికెట్ ధరల పెంపు, సినిమా చిత్రీకరణ అనుమతుల కోసం వచ్చే వారికి ముందస్తు షరతులు విధిస్తున్నట్లు స్పష్టం చేశారు. సినిమాలో నటించే వారితో డ్రగ్స్, సైబర్ నేరాలపై అవగాహన వీడియో చిత్రీకరించాలని సూచించారు. ఇలా రెండు నిమిషాల పాటు వీడియో చిత్రీకరించి ఇవ్వాలన్నారు. ఈ విధంగా సినిమా హాల్లో సైబర్ నేరాలు, డ్రగ్స్పై అవగాహన వీడియోలు ఫ్రీగా ప్రదర్శించాలని సీఎం రేవంత్ రెడ్డి చెప్పారు. ఈ విషయంపై త్వరలోనే సినీ పరిశ్రమ పెద్దలతో సమావేశం ఏర్పాటు చేస్తామన్నారు. ప్రభుత్వ విధానాలను సినీ పెద్దలకు వివరిస్తామని పేర్కొన్నారు. టీవీలో కూడా డ్రగ్స్, సైబర్ నేరాలపై అవగాహన చిత్రాలు ప్రదర్శించాలని సీఎం రేవంత్ రెడ్డి సూచించారు.
అధికారుల్లో నైపుణ్యంతో పాటు ఆత్మస్థైర్యాన్ని నింపడం తమ బాధ్యత అని సీఎం రేవంత్ రెడ్డి అన్నారు. పోలీసులకు కావాల్సిన అన్ని వసతులను కల్పించడం ప్రభుత్వ బాధ్యతనని వివరించారు. చదువుకున్న వారు కూడా సైబర్ నేరగాళ్ల ఉచ్చులో పడుతున్నారని ఆవేదన చెందారు. సైబర్ నేరాళ ఫిర్యాదుకు 1930 టోల్ ఫ్రీ నంబరు ఏర్పాటు చేశామని అన్నారు. నేరగాళ్ల నుంచి సైబర్ క్రైమ్ పోలీసులు రూ.31 కోట్లు రాబట్టారని తెలిపారు. కొత్త నేర న్యాయ చట్టాలపై కూడా పోలీసులకు శిక్షణ ఇవ్వాల్సి ఉందని వెల్లడించారు.
గంజాయికి బానిస అవుతున్న విద్యార్థులు : హత్య, అత్యాచారం కన్నా ఈ కాలంలో సైబర్ నేరాలే పెద్దవని సీఎం రేవంత్ రెడ్డి అన్నారు. హత్య చేస్తే ఒకరో, ఇద్దరో చనిపోతారని, సైబర్ మోసంలో చాలా మంది బాధితులు అని పేర్కొన్నారు. మధ్యతరగతి, పేదలే సైబర్ నేరాలకు గురవుతున్నారని ఆందోళన చెందారు. విద్యార్థులు ఎక్కువగా గంజాయికి బానిసలు అవుతున్నారని ఆవేదన వ్యక్తం చేశారు. సమర్థత ప్రదర్శించి అధికారులకు పదోన్నతులు ఇచ్చే బాధ్యత తమ ప్రభుత్వానిదన్నారు. మనం ఎదుర్కొంటున్న పెద్ద సమస్య డ్రగ్స్, సైబర్ నేరాలు అని చెప్పారు. డ్రగ్స్ నేరగాళ్లు తెలంగాణ నేలపై అడుగు పెట్టాలంటే భయపడాలని ఈ సందర్భంగా సీఎం రేవంత్ రెడ్డి సమావేశంలో తెలిపారు.
మార్పు మన ప్రభుత్వ బాధ్యత : అంతకు ముందు కమాండ్ కంట్రోల్ సెంటర్కు వెళ్లిన సీఎం రేవంత్ రెడ్డి, నార్కోటిక్ బ్యూరో ఫొటో ఎగ్జిబిషన్ను తిలకరించారు. వాల్బోర్డుపై మార్పు మన ప్రభుత్వ బాధ్యత అని సీఎం రేవంత్ రెడ్డి రాశారు. పోలీసుల ప్రత్యేక వాహనాలను సీఎం రేవంత్ రెడ్డి ప్రారంభించారు. టీజీ న్యాబ్, సైబర్ సెక్యూరిటీ బ్యూరో వాహనాలను ప్రారంభించారు. యాంటీ నార్కోటిక్ బ్యూరో కోసం 27 కార్లు, 40 ద్విచక్ర వాహనాలను ప్రారంభించారు. అలాగే సైబర్ సెక్యూరిటీ బ్యూరో కోసం 14 కార్లు, 30 ద్విచక్ర వాహనాలకు పచ్చజెండా ఊపి ప్రారంభించారు.
మాదకద్రవ్యాలపై ఉక్కుపాదం మోపేలా - టీఎస్‌ న్యాబ్ బలోపేతానికి అధికారుల ప్రణాళిక
