తెలంగాణలో కొత్త రేషన్‌కార్డుల జారీకి ఆదేశాలు - కానీ ఆ జిల్లాల్లో మాత్రమే

కొత్త రేషన్‌కార్డుల జారీకి వెంటనే ఏర్పాట్లు చేయాలని సీఎం రేవంత్ రెడ్డి ఆదేశం - ఎమ్మెల్సీ ఎన్నికల కోడ్ అమలులో లేని జిల్లాల్లో వెంటనే కార్డులు జారీ చేయాలని వెల్లడి

CM Revanth Reddy Orders on New Ration Cards Distribution : కొత్త రేషన్‌కార్డుల జారీకి వెంటనే ఏర్పాట్లు చేయాలని అధికారులను సీఎం రేవంత్​ రెడ్డి ఆదేశించారు. అర్హులందరికీ రేషన్‌ కార్డులు ఇవ్వాల్సిందేనని స్పష్టం చేశారు. పౌరసరఫరాల శాఖ, నీటిపారుదలశాఖపై ఉన్నతాధికారులతో సీఎం సమీక్ష సమావేశంలో కీలక ఆదేశాలు జారీ చేశారు.

కొత్త రేషన్​ కార్డుల డిజైన్ల పరిశీలన : అర్హులందరికీ రేషన్‌ కార్డులు ఇవ్వాల్సిందేనని స్పష్టం చేసిన సీఎం రేవంత్‌రెడ్డి మళ్లీ మళ్లీ దరఖాస్తులు చేయకుండా అవగాహన కల్పించాలని సూచనలు చేశారు. ఎమ్మెల్సీ ఎన్నికల కోడ్ అమలులో లేని జిల్లాల్లో వెంటనే కార్డులు జారీ చేయాలని ఆదేశించారు. ఈ సందర్భంగా కొత్త రేషన్​ కార్డులకు సంబంధించి పలు డిజైన్లను సీఎం పరిశీలించారు. ఈ సమావేశంలో పౌరసరఫరాల శాఖ మంత్రి ఉత్తమ్ కుమార్ రెడ్డి, సీఎం సలహాదారు వేం నరేందర్‌రెడ్డి, సీఎస్ శాంతికుమారి హాజరయ్యారు.