రామయ్య మెచ్చేలా, భక్త కోటి మురిసేలా - భద్రాచలం పుణ్యక్షేత్రం అభివృద్ధిపై రేవంత్​ సర్కార్​ ఫోకస్

CM Revanth Reddy Bhadradri Tour : దక్షిణ అయోధ్యగా భాసిల్లుతున్న భద్రాచలంలో ఈ నెల 11న ముఖ్యమంత్రి రేవంత్‌ రెడ్డి పర్యటించనున్నారు. సీతారామ చంద్రస్వామి వారిని దర్శించుకోనున్నారు. ఇందిరమ్మ ఇళ్ల పథకానికి ఇక్కడి నుంచే శ్రీకారం చుట్టే ఆస్కారముంది. దీంతో పాటు పలు అభివృద్ధి కార్యక్రమాలకు సీఎం శంకుస్థాపన చేయనున్నారు. బహిరంగ సభలో ప్రసంగించనున్నారు.

CM Revanth Reddy Bhadradri Tour : దక్షిణ అయోధ్యగా భాసిల్లుతున్న భద్రాచలంలో ఈ నెల 11న ముఖ్యమంత్రి రేవంత్‌ రెడ్డి పర్యటించనున్నారు. పలు అభివృద్ధి కార్యక్రమాలకు సీఎం శంకుస్థాపన చేయనున్నారు. ఐదు సంవత్సరాల క్రితం రామాలయ అభివృద్ధికి త్రిదండి చిన జీయర్‌స్వామి, ఆర్కిటెక్ట్‌ ఆనంద్‌సాయి, మంత్రి తుమ్మల నాగేశ్వరరావు ప్రణాళిక రూపొందించినా కార్యరూపం దాల్చలేదు. బీఆర్ఎస్ సర్కారు రూ.150 కోట్లు ప్రకటించినా పైసా కేటాయించలేదు.

భద్రాచలం పుణ్యక్షేత్రం అభివృద్ధిపై హైదరాబాద్‌లో డిప్యూటీ సీఎం మల్లు భట్టి విక్రమార్క, మంత్రులు తుమ్మల నాగేశ్వరరావు, పొంగులేటి శ్రీనివాసరెడ్డి, కొండా సురేఖతో కలిసి సీఎం రేవంత్‌రెడ్డి ఉన్నత స్థాయి సమీక్షను బుధవారం నిర్వహించనున్నట్లు తెలిసింది. పాత బృహత్తర ప్రణాళిక అమలు చేస్తారా? లేదంటే ప్రత్యామ్నాయాలను పరిశీలిస్తారా అన్నది తేలాల్సి ఉంది.

మాడవీధులను పొడిగించి ప్రాకారాలు నిర్మించాలని, ఆలయం చుట్టూ 160 అడుగుల మేర కోవెలను విస్తరించాలని భక్తులు విన్నవించుకుంటున్నారు. అడ్డుగా ఉన్న ఇళ్లను తొలగించి న్యాయబద్ధంగా పరిహారం చెల్లించాలని కోరుతున్నారు. మిథిలా మండపానికి ఇబ్బంది కలగకుండా ప్రాంగణాన్ని సువిశాలం చేయాలని తెలుపుతున్నారు. అన్నదాన సత్రం విస్తరణకు సమీపంలోని సర్కారు భూమిని అప్పగించాలని, రోజుకు లక్ష మంది భక్తులు వచ్చినా శీఘ్ర దర్శనమయ్యేలా క్యూలైన్ల రూపకల్పన ఉండాలని కోరారు. వసతి గదులను పెంచి, పార్కింగ్‌ సమస్యలు, రాముడి భూముల్లో ఆక్రమణలను జరుగుతున్నాయని వాటిని తొలగించాలని అధికారులను కోరుతున్నారు. గోశాలను విస్తరించి రామకోటి స్తూపాలు ఏర్పాటు చేయాలన్నారు.

Development Works In Bhadrachalam : పర్యాటక అభివృద్ధిలో భాగంగా కేంద్ర టూరిజం శాఖ భద్రాచలంలో కొన్ని పనులు చేపడుతోంది. రాష్ట్రం తరఫున వీటిని విస్తరించాలి. ఆధ్యాత్మిక కారిడార్‌గా భద్రాచలం పర్ణశాల పుణ్యక్షేత్రాలను రూపుదిద్దాలి. స్వయంగా సీతారాములవారు నివాసమున్న పర్ణశాలకు సరైన గుర్తింపు రావాలంటే అక్కడ మౌలిక వసతులు మెరుగుపడాలి. భద్రాచలం నుంచి పర్ణశాల వరకు గోదావరిలో బోటు షికారుకు ఏర్పాట్లు చేయాలి.

విలీన గ్రామ పంచాయతీలను తిరిగి భద్రాచలంలో కలపాలి. ఇవి కలవకపోతే స్థల సమస్య తీవ్రంగా ఉంటుంది. రామాయణ థీమ్‌పార్కును నిర్మిస్తే ఆలయ ఆధారిత ఉపాధి పెరుగుతుంది. నిరుద్యోగులకు భరోసా లభిస్తుంది. రామాలయం నుంచి నరసింహస్వామి కోవెలకు సులువుగా వెళ్లేందుకు తీగల వంతెన నిర్మించాలి. అనుబంధ ఆలయాలను సందర్శించేందుకు వీలుగా కాలుష్య రహిత వాహనాలు సమకూర్చాలి

గోదావరి వరదలకు వివిధ కాలనీలు మునగటంతో బాధితులకు పునరావాసం కల్పించటం కష్టమవుతోంది. చర్ల నుంచి అల్లూరి సీతారామరాజు జిల్లా ఎటపాక మండలం నెల్లిపాక వరకు గోదావరి కరకట్టలను విస్తరిస్తే సమస్య తీవ్రతను తగ్గించవచ్చు. కనీసం భద్రాచలం పట్టణం చుట్టూ ఉన్న కట్ట సామర్థ్యాన్ని పెంచాలి. బ్యాక్‌ వాటర్‌ సమస్యను తట్టుకునేలా పనులు ఉండాలి. కట్టల నిర్మాణానికి గతంలో రూ.2వేల కోట్లతో ప్రతిపాదనలు తయారైనా పైసా పని కాలేదు.