Clashes over Competition in Liquor Chain Stores : రెండు మద్యం గొలుసు దుకాణాల మధ్య ఉన్న పోటీతత్వం ఇరువర్గాల మధ్య తీవ్ర ఘర్షణకు దారితీసింది. ఈ ఘటన సూర్యాపేట మండలం గాంధీనగర్ పెద్దమ్మతల్లి దేవాలయం సమీపంలో జరిగింది. అసలు దుకాణంలో మద్యం విక్రయించడమే పెద్ద నేరమైతే, రెండు దుకాణాల మధ్య పోటీ వస్తోందని గొడవ పడి ఒకరిపై మరొకరు దాడి చేసుకున్నారు. సూర్యాపేట మండలం గాంధీనగర్లో జక్కలి అంజమ్మ, బాలెంల నాగమ్మ కుటుంబాలు పక్కపక్కనే కిరాణ దుకాణాలు నిర్వహిస్తూ అందులో మద్యం విక్రయిస్తున్నారు.
అయితే ఈ రెండు దుకాణాల మధ్య పోటీ ఉండటంతో జక్కలి అంజమ్మ, బాలెంల నాగమ్మ మధ్య వ్యాపార విషయంలో తరచూ గొడవలు జరుగుతున్నాయి. ఈ నేపథ్యంలో ఈ నెల 1న ఇదే విషయంపై ఇరువర్గాల కుటుంబ సభ్యులు ఘర్షణ పడ్డారు. బాలెంల నాగమ్మతో పాటు మరో పది మంది జక్కలి అంజమ్మ దుకాణంపై వెళ్లి గొడవకు దిగారు. ఆపై జక్కలి అంజమ్మతో పాటు ఆమె భర్త రమేశ్, కుమారుడు విగ్నేశ్ మరో ముగ్గురిపై దాడికి పాల్పడ్డారు. ఈ దృశ్యాలు సీసీటీవీ కెమెరాలో రికార్డు కాగా ప్రస్తుతం సోషల్ మీడియాలో వైరలవుతోంది.
ఇరువర్గాలపై పోలీసు కేసులు : దాడికి పాల్పడిన వారిలో నోముల శివ అనే యువకుడిపై జక్కలి అంజమ్మ వర్గీయులు కూడా ప్రతిదాడికి పాల్పడ్డారు. ఆ సమయంలో అక్కడున్న ఓ వ్యక్తి ఘర్షణ దృశ్యాలను తన మొబైల్ ఫోన్లో చిత్రీకరించగా అవి కూడా సామాజిక మాధ్యమాల్లో చక్కర్లు కొడుతున్నాయి. ఈ విషయం తెలసుకున్న స్థానిక పోలీసులు ఇరువర్గాలపై కేసులు నమోదు చేశారు.
యథేచ్చగా మద్యం విక్రయాలు : గొలుసు దుకాణంలో జరుగుతున్న ఈ అక్రమ వ్యాపారాలను ఆబ్కారీ, పోలీసులు అడ్డుకుంటున్నా ఎక్కడో ఓ చోట ఈ దందా కొనసాగుతోంది. వైన్స్ షాప్నకు పోటీగా పట్టణాల్లో, పల్లెల్లో రాత్రింబవళ్లు అనే తేడాలేకుండా యథేచ్చగా మద్యం విక్రయిస్తున్నారు. రాష్ట్ర ప్రభుత్వాలు, అధికారులు హెచ్చరించినా ఎక్కడో ఓ చోట మద్యం గొలుసు దుకాణాలు పుట్టగొడుగుల్లా పుట్టుకొస్తున్నాయి. కొన్ని ప్రాంతాల్లో అయితే ఊరికో రేషన్ షాపులా బెల్ట్ షాపు అందుబాటులో ఉంటోంది.
Liquor: బెల్ట్ షాపుల్లో విచ్చలవిడిగా మద్యం విక్రయాలు
వైరల్ వీడియో : నడిరోడ్డుపై ఏరులై పారిన మద్యం - బాటిళ్ల కోసం ఆశగా ఎదురుచూసిన జనం
