BRS MLCs Protest in Legislative Council : తెలంగాణ బడ్జెట్ సమావేశాలు కొనసాగుతున్నాయి. గవర్నర్ ప్రసంగానికి ధన్యావాద తీర్మానంపై శాసనమండలిలో వాడీవేడి చర్చ జరుగుతోంది. ఈ క్రమంలోనే ఇటీవల మండలి సభ్యులపై సీఎం రేవంత్రెడ్డి చేసిన అనుచిత వ్యాఖ్యలకు నిరసనగా బీఆర్ఎస్ ఎమ్మెల్సీలు ఆందోళ చేపట్టారు. ముఖ్యమంత్రికి వ్యతిరేకంగా నినాదాలు చేశారు. రేవంత్రెడ్డి వెంటనే కౌన్సిల్ సభ్యులకు క్షమాపణలు చెప్పాలని అప్పటి వరకు మండలిని నిర్వహించొద్దని వారు అన్నారు. దీంతో గందరగోళం నెలకొంది.
బీఆర్ఎస్ ఎమ్మెల్సీల నిరసనపై కాంగ్రెస్ ఎమ్మెల్సీ జీవన్రెడ్డి స్పందించారు. కౌన్సిల్ను గులాబీ పార్టీ సభ్యులు అగౌరవపరుస్తున్నారని అన్నారు. ఆ పార్టీ ఎమ్మెల్సీలు చేసిన ఫిర్యాదును ప్రివిలేజ్ కమిటీకి పంపారని, పెద్దల సభలో ఓపిక ఉండాలని సూచించారు. మరోవైపు వారికి ఈ విషయంలో నిరసన చేపట్టే హక్కు లేదని మంత్రి జూపల్లి కృష్ణారావు వ్యాఖ్యానించారు. అయినా భారత్ రాష్ట్ర సమితి సభ్యులు కౌన్సిల్ పోడియాన్ని చుట్టుముట్టడంతో శాసనమండలి ఛైర్మన్ గుత్తా సుఖేందర్ రెడ్డి 10 నిమిషాల పాటు సభను వాయిదా వేశారు.
ప్రజాకాంక్షలు నెరవేరేలా రాష్ట్ర ప్రభుత్వం పాలన సాగిస్తోంది : గవర్నర్ తమిళిసై
Telangana Budget Sessions 2024 : వాయిదా అనంతరం శాసనమండలి తిరిగి ప్రారంభమైంది. ఈ క్రమంలోనే సీఎం రేవంత్రెడ్డి (CM Revanth Reddy) మండలి సభ్యులను అవమాన పరిచారని బీఆర్ఎస్ ఎమ్మెల్సీ భానుప్రసాద్ ఆరోపించారు. వెంటనే ముఖ్యమంత్రి క్షమాపణలు చెప్పాలని డిమాండ్ చేశారు. సభ గౌరవ మర్యాదలను కాపాడాల్సిన రేవంత్రెడ్డి, ఇలాంటివి మాట్లాడకూడదని ఆయన అన్నారు. మరోసారి గులాబీపార్టీ ఎమ్మెల్సీలు కౌన్సిల్ పోడియాన్ని చుట్టుముట్టి అందోళన చేపట్టారు. సీఎంపై వచ్చిన ఫిర్యాదును అసెంబ్లీ సెక్రటరీకి పంపినట్లు కౌన్సిల్ ఛైర్మన్ గుత్తా సుఖేందర్రెడ్డి వారికి వివరించారు. అయినా వారు నిరసన ఆపకపోవడంతో మండలిని మరోసారి వాయిదా వేశారు.
అంతకుముందు ఆటో డ్రైవర్ల విషయంలో ప్రభుత్వ వైఖరికి నిరసనగా హైదరాబాద్లో భారత్ రాష్ట్ర సమితి వినూత్నంగా ఆందోళన కార్యక్రమాన్ని నిర్వహించింది. హైదర్‌గూడ ఎమ్మెల్యే క్వార్టర్స్ నుంచి బడ్జెట్ సమావేశాలకు బీఆర్ఎస్ ఎమ్మెల్యేలు, ఎమ్మెల్సీలు ఆటోల్లో చేరుకున్నారు. అయితే వారిని అసెంబ్లీ గేట్ వద్ద పోలీసులు అడ్డుకోవడంతో కాసేపు గొడవ జరిగింది.
గవర్నర్ ప్రసంగం పేలవంగా ఉంది - ప్రభుత్వం తన విజన్ను ఆవిష్కరించలేదు : హరీశ్రావు
