అమృత్ టెండర్లలో కేటీఆర్​ను తప్పుదోవ పట్టించారు : బీఆర్ఎస్ మాజీ ఎమ్మెల్యే ఉపేందర్ - BRS Upender On Amrut Tender Issue

Kandala Upender On Amrut Tender Issue : అమృత్ టెండర్ల విషయంలో కేటీఆర్​ను పూర్తిగా ఎవరో తప్పుదోవ పట్టించారని బీఆర్ఎస్​ మాజీ ఎమ్మెల్యే కందాల ఉపేందర్​ రెడ్డి అన్నారు. రాజకీయాలకు, వ్యాపారానికి సంబంధం లేదన్న ఆయన, పదేళ్ల బీఆర్ఎస్ హయాంలో లబ్ది పొందిన వారే ఇప్పుడు కూడా ముందు వరుసలో ఉన్నారని తీవ్ర ఆరోపణలు చేశారు. తన అల్లుడు సృజన్ రెడ్డి, రేవంత్ రెడ్డికి సొంత బావమరిది కాదని, ఆయనకు రాజకీయాలతో సంబంధం లేదని వ్యాఖ్యానించారు.

BRS Ex MLA Kandala Upender On Amrut Tender Issue : కేంద్ర ప్రభుత్వ ‘అమృత్‌’ పథకం టెండర్ల విషయంలో బీఆర్ఎస్ కార్యనిర్వాహక అధ్యక్షుడు కేటీఆర్​ను ఎవరో తప్పుదోవ పట్టించారని, ఆ పార్టీకి చెందిన పాలేరు మాజీ ఎమ్మెల్యే కందాల ఉపేందర్​ రెడ్డి వ్యాఖ్యానించారు. ఈ విషయంలో కేటీఆర్​కు అన్ని విషయాలు వివరిస్తానని, వాస్తవాలు చెబుతానని తెలిపారు. హైదరాబాద్​లో తన కార్యాలయంలో ఆయన మీడియాతో మాట్లాడారు. రాజకీయాలకు, వ్యాపారానికి సంబంధం లేదన్న ఆయన, పదేళ్ల బీఆర్ఎస్​ పార్టీ హయాంలో లబ్ది పొందిన వారే ఇప్పుడు కూడా ముందు వరుసలో ఉన్నారని తీవ్రంగా ఆరోపించారు.

తన అల్లుడు సృజన్ రెడ్డి రేవంత్ రెడ్డికి సొంత బావమరిది కాదని, రేవంత్ రెడ్డి చిన్న మామ కుమారుడు సృజన్ రెడ్డి అని ఆయన తెలిపారు. సృజన్ రెడ్డికి రాజకీయాలతో సంబంధం లేదని అన్నారు. వ్యాపారంలో జాయింట్ వెంచర్లు సహజమని, అమృత్ టెండర్లలోనూ అదే జరిగిందని పేర్కొన్నారు. అమృత్ టెండర్ల వ్యవహారంలో సీఎం రేవంత్ రెడ్డికి సంబంధం లేదని అన్నారు. కేటీఆర్​తో మాట్లాడేందుకు ప్రయత్నించానని, ఆయనను కలిసి అన్ని విషయాలు వివరిస్తానని, వాస్తవాలు చెబుతానని ఉపేందర్ రెడ్డి చెప్పారు. అర్హత లేదు కాబట్టే జాయింట్ వెంచర్ కు వెళ్లారని, రాజకీయం చేయడం తగదని సూచించారు.

బీఆర్ఎస్​ పార్టీలోనే కొనసాగుతా : టెండర్లకు, ముఖ్యమంత్రికి ఏం సంబంధమని ప్రశ్నించారు. సీవీసీకి ఫిర్యాదు చేసుకోవచ్చని తెలిపారు. రాజకీయాల్లో ఎన్నో మాట్లాడుతుంటారన్న ఆయన, మంత్రి పొంగులేటిపై కూడా ఎన్నో వచ్చాయని, అయినా తాను ఏమీ మాట్లాడలేదని తెలిపారు. వ్యాపారాలు ఎవరైనా చేసుకోవచ్చు, రాజకీయాలతో సంబంధం లేదని అన్నారు. పదేళ్ల బీఆర్ఎస్ హయాంలో లబ్ది పొందిన వారే ఇప్పుడు కూడా ముందు వరుసలో ఉన్నారని, వ్యాపారానికి తాను రాజకీయాలను ఎప్పుడూ వాడుకోలేదని చెప్పారు.

"నా అల్లుడు సృజన్ రెడ్డి రేవంత్ రెడ్డికి సొంత బావమరిది కాదు, ఆయనకు రాజకీయాలతో సంబంధం లేదు. రేవంత్ రెడ్డి చిన్న మామ కుమారుడు సృజన్ రెడ్డి. అర్హత లేదు కాబట్టే జాయింట్ వెంచర్​కు వెళ్లారు. టెండర్లకు, ముఖ్యమంత్రికి ఏం సంబంధం? రాజకీయాల్లో ఎన్నో మాట్లాడుతుంటారు. మంత్రి పొంగులేటిపై కూడా ఎన్నో వచ్చాయి, అయినా నేను ఏమీ మాట్లాడలేదు. వ్యాపారాలు ఎవరైనా చేసుకోవచ్చు, రాజకీయాలతో సంబంధం లేదు."-కందాల ఉపేందర్​ రెడ్డి, బీఆర్ఎస్​ నేత

తాను బీఆర్ఎస్​లోనే కొనసాగుతానని ఉపేందర్ రెడ్డి తెలిపారు. జాయింట్ వెంచర్​లో తక్కువ కోట్ చేసిన వారికి వచ్చిందని సృజన్ రెడ్డి తండ్రి మనోహర్ రెడ్డి తెలిపారు. పదేళ్లు పురపాలక శాఖ మంత్రిగా ఉండి ఇందులో తప్పు జరిగిందని చెప్పడం సరికాదన్న ఆయన, టెండర్ ద్వారా తీసుకున్న దానికి ఏదో ఆపాదించడం సబబు కాదని అన్నారు. అవసరమైతే సృజన్ రెడ్డి కూడా అన్ని వివరాలు చెబుతారని మనోహర్ రెడ్డి అన్నారు.