దిల్లీలో గణతంత్ర దినోత్సవ వేడుకలు - హైదరాబాద్‌ బాలికకు ప్రత్యేక ఆహ్వానం

Akarshana Sathish Republic Day Delhi 2024 : దిల్లీలో జరిగే గణతంత్ర దినోత్సవ వేడుకల్లో పాల్గొనే అవకాశం హైదరాబాద్‌ అమ్మాయికి దక్కింది. ఈ మేరకు బేగంపేటలోని హైదరాబాద్‌ పబ్లిక్‌ స్కూల్లో చదువుతున్న ఆకర్షణ సతీశ్‌కు ఆహ్వానం అందింది. తమ కూతురికి ఈ అవకాశం రావడం పట్ల బాలిక కుటుంబ సభ్యులు సంతోషం వ్యక్తం చేస్తున్నారు.

Akarshana Sathish Republic Day Delhi 2024 : హైదరాబాద్​కు చెందిన ఆకర్షణ సతీశ్‌ దిల్లీలో జరిగే గణతంత్ర దినోత్సవ వేడుకలకు ఆహ్వానం అందుకుంది. ఈ మేరకు భారత రక్షణ శాఖ ప్రత్యేక ఆహ్వానం పంపింది. బేగంపేటలోని హైదరాబాద్‌ పబ్లిక్‌ స్కూల్లో ఆకర్షణ ఏడో తరగతి చదువుతంది. పేద విద్యార్థులకు అవసరమైన పుస్తకాలను అందించాలనే సదుద్దేశంతో, మూడేళ్లుగా పుస్తకాలు సేకరించి గ్రంథాలయాలు ఏర్పాటు చేస్తోంది. ఇందులో భాగంగానే ఎంఎన్‌జే ఆసుపత్రి సహా జైళ్లు, పోలీస్‌స్టేషన్ల వంటి ప్రాంతాల్లో ఇప్పటి వరకు తొమ్మిది లైబ్రరీలను ఏర్పాటు చేసింది.

రాష్ట్రపతి ద్రౌపది ముర్ముతో ఆకర్షణ సతీశ్‌

Akarshana Sathish Invited to Republic Day Delhi 2024 : ఆకర్షణ సతీశ్‌ (Akarshana Sathish) కృషిని ప్రధాని నరేంద్ర మోదీ స్వయంగా మన్ కీ బాత్​లో ప్రస్తావించారు. ఇటీవల హైదరాబాద్ వచ్చిన రాష్ట్రపతి ద్రౌపది ముర్ము సైతం ఆ అమ్మాయిని ప్రత్యేకంగా అభినందించారు. ఈ నేపథ్యంలోనే ఈ నెల 26వ తేదీన దిల్లీలో జరగనున్న గణతంత్ర దినోత్సవ వేడుకల్లో (Republic Day Delhi 2024) పాల్గొనాలని భారత రక్షణ శాఖ ఆహ్వానించింది. ఈ ఆహ్వానం అందడం పట్ల ఆకర్షణ కుటుంబ సభ్యులు హర్షం వ్యక్తం చేస్తున్నారు.

ఆకర్షణ సతీశ్‌

Republic Day celebrations in Delhi : గణతంత్ర దినోత్సవానికి దేశవ్యాప్తంగా 13,500 మంది ప్రత్యేక అతిథులను కేంద్రం ఆహ్వానించిన విషయం తెలిసిందే. ఇందులో తెలంగాణ నుంచి 151, ఆంధ్రప్రదేశ్‌ నుంచి 203 మంది ఉన్నారు. కేంద్ర ప్రభుత్వంలోని మొత్తం 18 శాఖల నుంచి వివిధ రూపాల్లో లబ్ధి పొందినవారు, ఉత్తమ పనితీరు కనబరిచిన వారిని ఇందుకోసం ఎంపిక చేశారు. వీరిలో ఉత్తమ పనితీరు కనబరిచిన సర్పంచులు, స్వయం సహాయక సంఘాలు, వ్యవసాయ ఉత్పత్తి సంఘాల ప్రతినిధులున్నారు. అలాగే వరుసగా రెండోసారి కూడా ప్రభుత్వ పథకాల ద్వారా లబ్ధిపొందిన వారిని ఆహ్వానించారు.

Telangana Sakatam In Republic Day Delhi : మరోవైపు దిల్లీ కర్తవ్యపథ్‌లో నిర్వహించే గణతంత్ర దినోత్సవ వేడుకల్లో మూడు సంవత్సరాల తర్వాత తెలంగాణ శకటం ప్రదర్శనకు ఎంపికైన విషయం తెలిసిందే. రాబోయే రెండేళ్లు రాష్ట్ర శకటం ప్రదర్శనకు కేంద్ర ప్రభుత్వం అనుమతి ఇచ్చింది. ఇందులో భాగంగానే దిల్లీలో ప్రదర్శించనున్న రాష్ట్ర శకటానికి జయ జయహే తెలంగాణగా రాష్ట్ర సర్కార్‌ నామకరణం చేసింది. తెలంగాణ ఉద్యమ సమయంలో ఈ పల్లవితో ప్రజాకవి అందెశ్రీ రాసిన గీతం విశేష ప్రాచుర్యం లభించింది. శకటంలో చాకలి ఐలమ్మ, కుమురం భీం, రాంజీ గోండు వంటి పోరాట యోధుల విగ్రహాలతో పాటు రాష్ట్ర కళాకారులు జానపదాలను ప్రదర్శించనున్నారు.