సమగ్ర కుటుంబ సర్వేను బహిష్కరించిన గ్రామస్థులు - అధికారులు షాక్! - కారణం ఏంటంటే?

ఇథనాల్​ ఫ్యాక్టరీని తరలించాలని నిరసన - సమగ్ర కులగణననకు సహకరించబోమన్న గ్రామస్థులు

Cast Cense Survey in Nirmsl Distric : తెలంగాణ ప్రభుత్వం నిర్వహిస్తున్న సమగ్ర కుటుంబ, కుల సర్వేను నిర్మల్ జిల్లాలోని దిలావర్​పూర్, గుండంపెల్లి గ్రామాల్లోని ప్రజలు బహిష్కరించారు. తమ గ్రామాలైన దిలావర్​పూర్-గుండంపెల్లి మధ్య నిర్మిస్తున్న ఇథనాల్ ఫ్యాక్టరీకి వ్యతిరేకంగా వారు గత కొన్ని రోజులుగా ఆందోళనలు చేపడుతున్నారు. అయితే ప్రభుత్వం ప్రతిష్టాత్మకంగా చేపడుతున్న కుల గణన సర్వే ప్రారంభమవడంతో దానిని నిర్వహించేందుకు గ్రామాల్లోని ప్రజల వద్దకు ఎన్యుమరేటర్లు వెళ్లగా, ప్రజలు తిరస్కరించడం తీవ్రమైన అంశంగా మారింది.

ప్రభుత్వం తమ గ్రామాలకు హాని కలిగించే ఇథనాల్ ఫ్యాక్టరీని ఎత్తి వేసేందుకు సహకరించడం లేదని గ్రామస్థులు వాపోయారు. అధికారులకు తాము వివరాలు చెప్పమని, తమ ఊరి నుంచి వెళ్లిపోవాలని పేర్కొంటున్నారు. ఫ్యాక్టరీని తరలించే వరకు సమగ్ర కుల సర్వేకు సహకరించేది లేదని గ్రామస్థులు తీర్మానం చేసి అక్కడి అధికారులకు అందజేశారు. దీంతో అధికారులు చేసేదేమీ లేక వెనుదిరిగి వెళ్లిపోయారు.

ఎన్యుమరేటర్లకు చేదు అనుభవాలు : తెలంగాణ రాష్ట్ర వ్యాప్తంగా సమగ్ర కులగణనను ప్రభుత్వం ప్రతిష్టాత్మకంగా చేపడుతుంది. ఈ నెల (నవంబరు) 06 నుంచి స్టిక్కరింగ్​ను అధికారులు పూర్తి చేశారు. నవంబర్​ 09వ తేదీ నుంచి ఎన్యుమరేటర్లు ఇంటింటికి తిరిగి సమాచారాన్ని సేకరించి నమోదు చేస్తున్నారు. హైదరాబాద్​లోని కొన్ని ప్రాంతాల్లో సర్వేకు వెళుతున్న ప్రభుత్వ ఉపాధ్యాయులకు మాత్రం చేదు అనుభవాలు ఎదురవుతున్నాయి. సెక్యురిటీ సిబ్బంది ఇంటి లోపలికి అనుమతించడం లేదు. మరికొన్ని ప్రాంతాల్లో కుక్కలను వదులుతున్నారని సర్వే అధికారులు ఆవేదన వ్యక్తం చేస్తున్నారు.

తెలంగాణలో మొత్తం 1,17,44,954 కుటుంబాలు ఉన్నాయని, అన్ని ఇళ్లను 87,092 ఎన్యూమరేషన్‌ బ్లాక్‌లుగా విభజించినట్లు ప్రణాళిక శాఖ వివరించింది. హైదరాబాద్‌లో మొత్తం 28,32,490 కుటుంబాలు ఉన్నాయి. వీటిని 19,328 ఎన్యూమరేషన్‌ బ్లాక్‌లుగా విభజించారు. సర్వే పూర్తి చేయడానికి 94,750 మంది గణకులను, వారిపై 9,478 మంది సూపర్‌వైజర్లను, ప్రభుత్వం నియమించింది.

ఇవ్వాల్సిన వివరాలు : ఆధార్ కార్డులో చిరునామా ఉన్న చోటికి, స్వగ్రామానికి వెళ్తేనే కుటుంబ వివరాలు నమోదు చేస్తారనే అపోహ పడవద్దని రాష్ట్ర ప్రణాళిక శాఖ తెలిపింది. సర్వేలో కుటుంబ సభ్యుల వ్యక్తిగత ఆధార్, సెల్​ఫోన్ నంబర్లు, ప్రశ్నపత్రంలో అడిగిన వివరాలన్నీ తెలపాలి. ఆధార్, రేషన్ కార్డు, పట్టాదారు పాసుపుస్తకం, బ్యాంకు పాసు పుస్తకం వంటివి అందుబాటులో ఉంచుకుంటే సర్వే కోసం వచ్చిన గణకులకు త్వరగా సమాచారం ఇవ్వవచ్చని అధికారులు తెలిపారు.