Kohli IPL Rival Naveen ul Haq : జింబాబ్వేతో జరిగిన టీ20 మ్యాచ్లో అఫ్గానిస్థాన్ బౌలర్ నవీన్ ఉల్ హక్ చెత్త రికార్డును మూటగట్టుకున్నాడు. ఒకే ఓవర్లో ఏకంగా 13 బంతులు వేశాడు. అందులో ఆరు వైడ్లు, ఒక నోబాల్ ఉంది. ఈ ఓవర్ కారణంగా జింబాబ్వేతో జరిగిన తొలి టీ20లో అఫ్గానిస్థాన్ ఓటమి చవిచూసింది.
అసలేం జరిగిందంటే?
హరారే వేదికగా జింబాబ్వే, అఫ్గానిస్థాన్ మధ్య బుధవారం తొలి టీ20 మ్యాచ్ జరిగింది. మొదట బ్యాటింగ్ చేసిన అఫ్గానిస్థాన్ నిర్ణీత 20 ఓవర్లలో 6 వికెట్లకు 144 పరుగులు చేసింది. కరీమ్ జనత్ (54), మహ్మద్ నబీ (44) రాణించారు. జింబాబ్వే బౌలర్లలో నగరవ (3/28), ముజారబాని (1/26), ట్రెవోర్ గ్వాండు (1/35), వెల్లింగ్టన్ మస్కడ్జా (1/18) తలో వికెట్ తీశారు.
ఆఖరి బంతి వరకు తేలని ఫలితం
అనంతరం ఛేదనకు దిగిన జింబాబ్వే సరిగ్గా 20 ఓవర్లలో ఆరు వికెట్లు కోల్పోయి విజయాన్ని సాధించింది. ఓపెనర్ బ్రియాన్ బెన్నెట్ (49), డియోన్ మైయేర్స్ (32) ఛేదనలో కీలక పాత్ర పోషించారు. అయితే జింబాబ్వే ఛేదన అంత సాఫీగా సాగలేదు. చివరి రెండు ఓవర్లలో విజయానికి 21 పరుగులు అవసరం. అయితే 19వ ఓవర్ వేసిన నవీనుల్ హక్ 10 పరుగులిచ్చి ఒక్క వికెట్ పడగొట్టాడు.
దీంతో విజయ సమీకరణం ఆరు బంతుల్లో 11 పరుగులుగా మారింది. ఆఖరి ఓవర్ను అజ్మతుల్లా వేయగా తొలి బంతిని తషింగ ముసేక్వా (16 నాటౌట్; 13 బంతుల్లో, 1 ఫోర్) బౌండరీ బాదాడు. తర్వాతి రెండు బంతులకే రెండేసి చొప్పున డబుల్స్ సాధించాడు. కానీ నాలుగో బంతికి అజ్మతుల్లా పరుగులేమి ఇవ్వలేదు. చివరి రెండు బంతుల్లో మూడు పరుగులు అవసరమవ్వగా, అయిదో బంతికి తషింగ రెండు పరుగులు సాధించాడు. చివరి బంతికి సింగిల్ తీసి జట్టును గెలిపించాడు.
ఆ ఓవరే అఫ్గాన్ ఓటమి కారణం!
అఫ్గాన్ ఓటమికి కారణం నవీన్ ఉల్ హక్ వేసిన 15వ ఓవర్ కారణమైంది. ఏకంగా నవీన్ ఈ ఓవర్లో 13 బంతులు వేయగా, అందులో 6 వైడ్లు, ఒక నో బాల్ ఉంది. దీంతో ఆ ఓవర్లలో ఏకంగా 19 పరుగులు వచ్చాయి. ఆరు ఓవర్లకు 57 పరుగులు చేయాల్సిన విజయ సమీకరణం కాస్త 5 ఓవర్లకు 38 పరుగులు మారిపోయింది. దీంతో జింబాబ్వే ఆఖరి బంతికి విజయాన్ని అందుకుంది.
అయితే ఈ మ్యాచ్ లో నవీన్ ఉల్ హక్ 4 ఓవర్లలో 33 పరుగులిచ్చి 3 వికెట్లు తీయడం గమనార్హం. 15 ఓవర్లో 19 రన్స్ ఇచ్చిన నవీన్, 19 ఓవర్ లో కేవలం 10 పరుగులే ఇచ్చి జింబాబ్వేను కట్టడి చేశాడు. అయినప్పటికీ ఆఖరి ఓవర్లో జింబాబ్వే విజయానికి కావాల్సిన 11 పరుగులు బాది గెలుపొందింది.
కోహ్లీతో నవీన్ గొడవ!
అయితే అఫ్గాన్ బౌలర్ నవీన్ ఉల్ హక్ టీమ్ ఇండియా బ్యాటర్ విరాట్ కోహ్లీతో గొడవ పడడం వల్ల అప్పట్లో వార్తల్లో నిలిచాడు. ఐపీఎల్ 2023 సీజన్లో ఆర్సీబీ బ్యాటర్ విరాట్ కోహ్లీ, అఫ్గానిస్థాన్ బౌలర్ నవీన్ ఉల్ హక్ మధ్య తీవ్ర వాగ్వాదం జరిగింది. దీంతో అతడు కోహ్లీ ఐపీఎల్ ప్రత్యర్థిగా వార్తల్లో నిలిచాడు. కానీ ఆ తర్వాత వీరిద్దరు కలిసి పోయారు.
గబ్బా టెస్ట్ - వర్షం ముప్పు ఎంత శాతం ఉందంటే?
కుంబ్లే, హర్భజన్ కన్నా అతడి బౌలింగ్‌లోనే కీపింగ్‌ చేయడం కష్టం! : ధోనీ
