ICC సర్​ప్రైజింగ్ షెడ్యూల్- టోర్నీలో భారత్ X పాక్​ మ్యాచ్ లేదేంటి? - India vs Pakistan

India vs Pakistan: ఐసీసీ టోర్నమెంట్ అనగానే అందరూ ఇండోపాక్ మ్యాచ్ కోసం ఎదురుచూస్తుంటారు. కానీ, ఐసీసీ తాజాగా రిలీజ్ చేసిన ఓ టోర్నీ షెడ్యూల్​లో మాత్రం భారత్- పాకిస్థాన్ మ్యాచ్ లేదు.

India vs Pakistan: ఐసీసీ టోర్నమెంట్ అనగానే యావత్ క్రికెట్ ప్రపంచం దృష్టి భారత్- పాకిస్థాన్ మ్యాచ్ పైనే ఉంటుంది. ఐసీసీ షెడ్యూల్ విడుదల చేయగానే ఈ దాయాదుల పోరు ఎప్పుడు ఉందా అని వెతుకుతుంటారు. హై వోల్టేజ్ మ్యాచ్ చూసేందుకు ఫ్యాన్స్​ ఎంతో ఆతృతగా ఉంటారు. అయితే ఐసీసీ తాజాగా విడుదల చేసిన ఓ టోర్నమెంట్ షెడ్యూల్​లో భారత్- పాకిస్థాన్ మ్యాచ్ లేకుండానే గ్రూప్ స్టేజ్ ముగుస్తుంది. మరి ఆ టోర్నీ ఏదంటే?

మహిళల అండర్ 19 వరల్డ్​కప్ రెండో ఎడిషన్ టోర్నీ 2025లో జరగనుంది. ఈ టోర్నమెంట్​కు మలేసియా ఆతిథ్యం ఇవ్వనుంది. 16 జట్లు పాల్గొననున్న ఈ టోర్నీ షెడ్యూల్​ను ఐసీసీ ఆదివారం రిలీజ్ చేసింది. అయితే ఇందులో గ్రూప్ స్టేజ్​లో మాత్రం భారత్- పాకిస్థాన్ మ్యాచ్ లేదు.

16 జట్లను నాలుగు గ్రూపులు (A, B,C, D) గా విభజించారు. ఒక్కో జట్టు తమ గ్రూప్​లోని మిగిలిన మూడు టీమ్స్​తో ఒక్కో మ్యాచ్ ఆడాల్సి ఉంటుంది. ఇక నాలుగు గ్రూప్​ల్లో టాప్-3లో నిలిచిన 12జట్లు సూపర్ 6కు అర్హత సాధిస్తాయి. అందులో A, D గ్రూప్​ల్లోని ఆరు జట్లను మళ్లీ గ్రూప్-1, B, Cలోని టీమ్స్​ను గ్రూప్- 2గా విభజించి సూపర్ 6 మ్యాచ్​లు నిర్వహిస్తారు.

ఇక సూపర్​ 6లోనూ గ్రూప్-1, గ్రూప్-2 జట్లే పోటీపడతాయి. ఈ రెండు గ్రూపుల్లో టాప్- 2లో నిలిచిన జట్లు సెమీస్​లో తలపడుతాయి. సెమీస్​లో నెగ్గిన జట్లు ఫైనల్​ ఆడే ఛాన్స్ ఉంటుంది. అయితే ఈ టోర్నీలో భారత్ గ్రూప్ Aలో, పాకిస్థాన్ Bలో ఉన్నాయి. దీంతో గ్రూప్ స్టేజ్​లో, సూపర్ 6లోనూ ఇండియా- పాకిస్థాన్ మ్యాచ్ జరిగే ఛాన్స్ లేదు. ఈ నేపథ్యంలో టోర్నమెంట్​లో దాయాది మ్యాచ్ చూడాలంటే భారత్- పాకిస్థాన్ ఫైనల్​కు రావాల్సిందే!

Tournament format for the ICC U19 Women's T20 World Cup 2025 explained 📜#U19WorldCup | Fixtures ➡️ https://t.co/N5xqg2mCPZ pic.twitter.com/q8WsEzYrPa

— ICC (@ICC) August 18, 2024

టోర్నీలో ఆడనున్న జట్లు

గ్రూప్ A	గ్రూప్ B	గ్రూప్ C	గ్రూప్ D
భారత్	ఇంగ్లాండ్	న్యూజిలాండ్	ఆస్ట్రేలియా
వెస్టిండీస్	పాకిస్థాన్	సౌతాఫ్రికా	బంగ్లాదేశ్
శ్రీలంక	ఐర్లాండ్	ఆఫ్రికా క్వాలిఫైయర్	ఆసియా క్వాలిఫయర్
మలేసియా	అమెరికా	సమోవా	స్కాట్లాండ్

• ఈ టోర్నీ 2025 జనవరి 18 నుంచి ఫిబ్రవరి 02 వరకు జరగనుంది.
• సెమీఫైనల్- 1, సెమీఫైనల్- 2 రెండు మ్యాచ్​లు కూడా జనవరి 31న జరగనున్నాయి. (ఫిబ్రవరి 1 రిజర్వ్ డే)
• ఫైనల్ మ్యాచ్ ఫిబ్రవరి 02న జరగనుంది (ఫిబ్రవరి 03 రిజర్వ్ డే)

టీమ్ఇండియా గ్రూప్ స్టేజ్ మ్యాచ్​లు

జనవరి 19	భారత్ - వెస్టిండీస్
జనవరి 21	భారత్ - మలేసియా
జనవరి 23	భారత్ - శ్రీలంక