Ind vs Pak T20 World Cup 2024: 2024 టీ20 వరల్డ్కప్లో పాకిస్థాన్పై భారత్ చారిత్రక విజయం అందుకుంది. పేస్ బౌలర్ జస్ప్రీత్ బుమ్రా అద్భుత ప్రదర్శన (3/14)తో ఆకట్టుకున్న వేళ టీమ్ఇండియా చిరస్మణీయ విజయాన్ని నమోదు చేసింది. న్యూయార్క్ వేదికగా ఆదివారం జరిగిన మ్యాచ్లో టీమ్ఇండియా 6 పరుగుల తేడాతో విక్టరీ కొట్టింది. ఉత్కంఠగా సాగిన మ్యాచ్ క్రికెట్ ప్రేమికులను మునివేళ్లపై నిలబెట్టింది. ఇంతటి అద్భుతమైన విజయాన్ని అందుకున్న తర్వాత టీమ్ఇండియా కెప్టెన్ రోహిత్ శర్మ మాట్లాడాడు.
'మేం సరిగా బ్యాటింగ్ చేయలేదు. ఇన్నింగ్స్ సగం వరకు మేము మెరుగైన స్థితిలోనే ఉన్నాము. కానీ, భాగస్వామ్యాలు నెలకొల్పడంలో విఫలమయ్యాం. ఇలాంటి పిచ్లో ప్రతీ పరుగు ముఖ్యమే. గత మ్యాచ్తో పోలిస్తే పిచ్ బాగుంది. మాకు ఉన్న బౌలింగ్ లైనప్తో మేం సాధించగలమన్న నమ్మకంతో ఉన్నాం. వాళ్ల ఇన్నింగ్స్ సగం పూర్తి అయ్యాక అందర్నీ పిలిచి ఒకే మాట చెప్పాను. 'మనకు జరిగినట్లే, వాళ్లకు కూడా జరగవచ్చు (అంటే మనం వికెట్లు కోల్పోయినట్లు, వాళ్ల బ్యాటింగ్ ఆర్డర్ కూడా కుప్పకూలవచ్చు!). ప్రతి ఒక్కరి నుంచి కాస్తంత సహకారం భారీ ఇంపాక్ట్ చూపిస్తుంది' అని చెప్పాను. ఇక బుమ్రా సామర్థ్యం గురించి అందరికీ తెలుసు. అతడి గురించి ఎక్కువగా మాట్లాడను. అతడు జీనియస్. ఈ వరల్డ్కప్ మొత్తం అతడు ఇలాంటి మైండ్సెట్తోనే ఉండాలని ఆశిస్తున్నా. ప్రేక్షకుల మద్దతు కూడా అద్భుతం. వాళ్లు మమ్మల్ని ఎప్పుడూ నిరాశ పర్చరు. కచ్చితంగా చెబుతున్నా వాళ్లందరూ మొహంపై చిరునవ్వుతోనే వెళ్తారు. టోర్నీలో ఇది ఆరంభం మాత్రమే. మేం సాధించాల్సింది చాలా ఉంది' అని రోహిత్ అన్నాడు.
అయితే పూర్తిగా బౌలింగ్కు అనుకూలిస్తున్న న్యూయార్క్ పిచ్పై భారీ స్కోర్లపై ఎవరికీ పెద్దగా ఆశల్లేవ్. కానీ, టీమ్ఇండియా 150+ స్కోరైనా చేస్తుందనుకున్నారు. కానీ, భారత్ 19 ఓవర్లకు 119 పరుగులకే ఆలౌటైంది. రిషభ్ పంత్ (42 పరుగులు) మినహా పెద్దగా రాణించలేదు. ఇక స్వల్ప లక్ష్య ఛేదనలో పాకిస్థాన్ 12 ఓవర్లకు 72-2తో మెరుగైన స్థితిలో ఉంది. అప్పటికి పాక్ గెలుపునకు 48 బంతుల్లో 48 పరుగులు కావాలి. దీంతో టీమ్ఇండియాకు ఓటమి తప్పదు అనుకున్నారంతా.
ఆ తర్వాత అసలు కథ మొదలైంది. కెప్టెన్ రోహిత్ మోటివేషన్తో భారత బౌలర్లు పుంజుకున్నారు. కట్టుదిడ్డంగా బంతులేస్తూ పరుగులు కట్టడి చేశారు. వీలైనప్పుడల్లా వికెట్లు పడగొట్టి పాక్ను ఒత్తిడిలోకి నెట్టారు. ముఖ్యంగా బుమ్రా 15, 19 ఓవర్లలో 3, 3 పరుగులిచ్చి ఒక్కో వికెట్ పడగొట్టాడు. అంతే మ్యాచ్ భారత్ చేతుల్లోకి వచ్చింది. అందరూ సమష్టిగా రాణించి టీమ్ఇండియాకు చారిత్రక విజయాన్ని కట్టబెట్టారు. టీమ్ఇండియా బౌలర్లలో బుమ్రా 3, హార్దిక్ పాండ్య 2, అక్షర్ పటేల్, అర్షదీప్ సింగ్ తలో 1 వికెట్ దక్కించుకున్నారు.
స్కోర్లు
- భారత్- 119-10 (19 ఓవర్లు)
- పాకిస్థాన్- 113-7 (20 ఓవర్లు)
హై వోల్టేజ్ మ్యాచ్కు పిచ్ కష్టాలు- భారీ స్కోర్లు సాధ్యమేనా? - T20 World Cup 2024
ఉత్కంఠ పోరులో 'భారత్'దే పైచేయి- బుమ్రా దెబ్బకు పాక్ విలవిల - T20 World Cup 2024
