SRH రిటెన్షన్ లిస్ట్ రెడీ - ఆ ప్లేయర్ కోసం ఏకంగా రూ.23 కోట్లు!

SRH Retained Players 2025 : 2025 ఐపీఎల్ మెగా వేలం త్వరలో మొదలు కానుంది. ఈ నేపథ్యంలో సన్​రైజర్స్​ తాము అట్టిపెట్టుకునే ఆటగాళ్ల లిస్ట్​ను రెడీ చేసుకుందని తెలిసింది.

SRH Retained Players 2025 : 2025 ఇండియన్ ప్రీమియర్ లీగ్ (IPL) మెగా వేలానికి ముందు సన్‌రైజర్స్ హైదరాబాద్ (SRH) రిటైన్‌ చేసుకొనే ఆటగాళ్ల జాబితాను సిద్ధం చేసినట్లు సమాచారం. ఐపీఎల్‌ వేలానికి సంబంధించిన రిటెన్షన్‌ నిబంధనలను ఇటీవల బీసీసీఐ ఖరారు చేసింది. మొత్తంగా ఒక్కో ఫ్రాంచైజీ గరిష్ఠంగా ఆరుగురు ప్లేయర్లను అట్టిపెట్టుకోవడానికి అనుమతి ఇచ్చింది. మరి సన్​రైజర్స్ ఫ్రాంచైజీ ఎవరెవరిని అట్టిపెట్టుకునే ఛాన్స్ ఉందంటే?

రూ.23 కోట్లకు హెన్రిచ్ క్లాసెన్‌?
దక్షిణాఫ్రికా వికెట్ కీపర్- బ్యాటర్ హెన్రిచ్ క్లాసెన్‌ను రాబోయే సీజన్‌కి తొలి ఆప్షన్‌గా తీసుకోవాలని భావిస్తోంది. తొలి ఆప్షన్‌గా రిటైన్ చేసిన ఆటగాడికి బీసీసీఐ రూ.18 కోట్ల ధరను నిర్ణయించింది. అయినా క్లాసెన్‌ కోసం రూ.23 కోట్లు చెల్లించడానికి ఫ్రాంచైజీ సిద్ధంగా ఉందని సమాచారం. 2024లో క్లాసెన్ అత్యుత్తమ ప్రదర్శన చేశాడు. 15 ఇన్నింగ్స్‌ల్లో 171.07 స్ట్రైక్ రేట్‌తో 479 పరుగులు చేశాడు.

మిగతా ఇద్దరు వాళ్లే!
ఆస్ట్రేలియా ఫాస్ట్ బౌలర్ పాట్ కమిన్స్, యంగ్ బ్యాటర్ అభిషేక్ శర్మను కూడా రిటైన్ చేయాలని SRH నిర్ణయించుకుందట. జట్టుకు కెప్టెన్‌గా వ్యవహరించిన కమిన్స్‌ను రూ.18 కోట్లకు అట్టిపెట్టుకొని, అభిషేక్ కోసం రూ.14 కోట్లు వెచ్చించడానికి రెడీ అయిపోయిందని తెలుస్తోంది. గత సీజన్‌లో కమిన్స్‌ 18 వికెట్లతో సత్తా చాటగా, 2024 సీజన్‌లో అత్యధిక పరుగులు చేసిన ప్లేయర్లలో అభిషేక్‌ ఒకడు. ఏకంగా 204.21 స్ట్రైక్ రేట్‌తో 484 పరుగులు చేశాడు. ఓపెనర్‌గా జట్టుకి కళ్లు చెదిరే ఆరంభాలు అందించాడు.

Records etched in orange ✨🧡 pic.twitter.com/Np749gfw7h

— SunRisers Hyderabad (@SunRisers) May 28, 2024

వాళ్లూ SRHతోనే?
ఆస్ట్రేలియన్ డాషింగ్ బ్యాటర్ ట్రావిస్ హెడ్, టీమ్​ఇండియా యంగ్‌ ఆల్‌రౌండర్‌ నితీష్ కుమార్ రెడ్డిని కూడా తిరిగి జట్టులోకి సిద్ధంగా ఉంది. ట్రావిస్ హెడ్ 2024లో అత్యుత్తమంగా రాణించాడు. ఓపెనర్‌గా 191.55 స్ట్రైక్ రేట్‌తో 567 పరుగులు చేశాడు. అటు ఎమర్జింగ్ ప్లేయర్ ఆఫ్ ది సీజన్‌గా ఎంపికైన నితీష్ కుమార్ రెడ్డి బ్యాట్‌తో పాటు బంతితోనూ ఆకట్టుకున్నాడు. 11 మ్యాచ్‌లలో 142.92 స్ట్రైక్ రేట్‌తో 303 పరుగులు చేసి, మూడు వికెట్లు తీశాడు.

ఈ ఆటగాళ్లను రిటైన్ చేయాలని సన్‌రైజర్స్‌ దాదాపు సిద్ధమైపోయినట్లు సమాచారం. తర్వాత మెగా వేలంలో SRH జాగ్రత్తగా వ్యవహరించాల్సి ఉంటుంది. ఎందుకంటే మిగిలిన స్క్వాడ్‌ను కొనుగోలు చేయడంలో తెలివిగా వ్యవహరించాలి. అప్పుడే బలమైన జట్టుతో 2025 ఐపీఎల్‌ టైటిల్‌ వేటలో దిగవచ్చు.