లఖ్​నవూకు షాక్!- టోర్నీ మొత్తానికి స్టార్ పేసర్ దూరం - SHIVAM MAVI LUCKNOW SUPER GIANTS

Shivam Mavi Lucknow Super Giants : ఐపీఎల్ లఖ్​నవూ సూపర్ జెయింట్స్​ జట్టుకు వరుస షాక్ తగులుతోంది. ఇప్పటికే ఇద్దరు ప్లేయర్లు దూరం కాగా, ఇప్పుడు శివమ్​ మావీ కూడా జట్టును వీడనున్నాడు. ఇంతకీ ఏమైందంటేవ ?

Shivam Mavi Lucknow Super Giants : వ‌రుస‌గా రెండు మ్యాచుల్లో గెలిచి మంచి జోష్​లో ఉన్న లఖ్​నవూ సూప‌ర్ జెయింట్స్‌ జట్టుకు ఊహించ‌ని షాక్ త‌గిలింది. గాయం కారణంగా ఆ టీమ్ స్టార్ పేస‌ర్ శివ‌మ్ మావీ ఈ సీజ‌న్ మొత్తానికి దూరమయ్యాడు. ఈ విషయాన్ని వెల్లడిస్తూ లఖ్​నవూ ఫ్రాంచైజీ ట్విట్టర్​ వేదికగా ఓ వీడియో షేర్ చేసింది. అందులో శిమమ్​ మాట్లాడిన క్లిప్ ఉంది.

"ఐపీఎల్​ను నేను ఎంతో మిస్ అవుతున్నాను. గాయం నుంచి కోలుకుని వ‌చ్చాను. అద్భుతమైన పెర్ఫామెన్స్​తో జ‌ట్టు విజ‌యాల్లో నేనూ ఓ భాగం కావాల‌నుకున్నాను. కానీ దుర‌దృష్ట‌వ‌శాత్తు నా గాయం తిర‌గ‌బెట్టింది. దీంతో త‌ప్ప‌నిస‌రి ప‌రిస్థితుల్లో ఈ లీగ్‌కు దూరం అవ్వాల్సి వ‌చ్చింది. మాకు ఓ అద్భుత‌మైన జ‌ట్టు ఉంది. మేం ఖ‌చ్చితంగా గెలుస్తామని నాకు నమ్మకం ఉంది. నేను ఎక్క‌డ ఉన్నా కూడా జ‌ట్టును ఎంకరేజ్ చేస్తూనే ఉంటాను." అంటూ ఎమోషనలయ్యాడు. అయితే ఐపీఎల్ మినీ వేలంలో లఖ్​నవూ సూపర్​ జెయింట్స్ జట్టు శివమ్​ మావీని రూ. 6.4 కోట్లు వెచ్చించి మ‌రీ ద‌క్కించుకుంది. అయితే, ఈ సీజ‌న్‌లో అత‌డు ఒక్క మ్యాచ్ కూడా ఆడ‌లేదు.

• You'll come back stronger, Shivam. And we're with you all the way. 💙 pic.twitter.com/zYSs3URV1p

  — Lucknow Super Giants (@LucknowIPL) April 3, 2024

మరోవైపు ఇప్పటికే ఈ జట్టు నుంచి ఇద్దరు ప్లేయర్స్ దూరమయ్యారు. పనిభారం కారణంగా మార్క్‌వుడ్ తప్పుకోగా, డేవిడ్ విల్లీ కూడా అందుబాటులో ఉండట్లేదంటూ తెలిపాడు. దీంతో మార్క్ వుడ్ ప్లేస్​లో వెస్టిండీస్ యంగ్ స్టార్ షామర్ జోసెఫ్‌, విల్లీ స్థానంలోకి న్యూజిలాండ్ పేసర్ మ్యాట్ హెన్రీ రానున్నారు. ఇక పాయింట్ల ప‌ట్టిక‌లో ప్రస్తుతం ల‌ఖ్​నవూ జట్టు నాలుగో స్థానం కైవసం చేసుకుంది. ఇప్పుడు త‌న త‌దుప‌రి మ్యాచ్‌ను ఏప్రిల్ 7న గుజ‌రాత్ టైటాన్స్‌తో ఆడ‌నుంది. ల‌ఖ్​నవూలోని ఎకానా స్పోర్ట్స్​ స్టేడియం ఈ మ్యాచ్‌కు వేదిక కానుంది.

లఖ్​నవూ తుది జట్టు (అంచనా) : కేఎల్ రాహుల్, దేవదత్ పడిక్కల్, క్వింటన్ డికాక్, యశ్ ఠాకూర్, నవీనుల్ హక్, నికోలస్ పూరన్, ఆయుష్ బదోని, కైల్ మేయర్స్, మార్కస్ స్టొయినిస్, దీపక్ హుడా, రవి బిష్ణోయ్, కృనాల్ పాండ్య, యుధ్వీర్ సింగ్, ప్రేరక్ మన్కడ్, అమిత్ ఠాకూర్, షామర్ జోసెఫ్, మయాంక్ యాదవ్, మోహ్సిన్ ఖాన్, కే.గౌతమ్, అర్షిన్ కులకర్ణి, సిద్ధార్థ్, అస్టన్ టర్నర్, అర్షద్ ఖాన్, మ్యాట్ హెన్రీ.