Paris Olympics 2024 India Hockey Team Broze Medal : భారత్ ఖాతాలో మరో కాంస్య పతకం వచ్చి చేరింది. టోక్యోలో కంచు పతకం నెగ్గిన భారత హాకీ జట్టు ప్రస్తుతం పారిస్ ఒలింపిక్స్లో బ్రాంజ్ మెడల్ను సాధించింది. స్పెయిన్తో జరిగిన పోరులో 2-1తేడాతో గెలిచింది. ఈ విజయంతో భారత్ ఖాతాలో నాలుగు కాంస్య పతకాలు వచ్చి చేరాయి. దీంతో భారత క్రీడాభిమానులు సంతోషం వ్యక్తం చేస్తు హాకీ జట్టుపై ప్రశంసలు కురిపిస్తున్నారు.
ఈ మ్యాచ్లో కెప్టెన్‌ హర్మన్‌ప్రీత్‌ సింగ్ (30వ నిమిషం, 33వ నిమిషం) రెండు గోల్స్‌ కొట్టి భారత్ విజయంలో కీలకంగా వ్యవహరించాడు. తొలి క్వార్టర్స్‌లో ఇరు జట్లు కూడా గోల్‌ చేయలేక పోయాయి. రెండో క్వార్టర్‌ ఆరంభంలో మాత్రం 18వ నిమిషంలో స్పెయిన్ ప్లేయర్ మార్క్ మిరల్లెస్ పెనాల్టీ స్ట్రోక్‌ను గోల్‌గా మలిచాడు. దీంతో ఆ జట్టు ఆధిక్యంలోకి దూసుకెళ్లింది. అనంతరం 29వ నిమిషంలో భారత్‌కు పెనాల్టీ కార్నర్‌ దక్కింది. దానిని హర్మన్‌ ప్రీత్‌ గోల్‌గా మలిచేందుకు ప్రయత్నించినా కుదరలేదు. స్పెయిన్ గోల్‌ కీపర్‌ దాన్ని అడ్డుకున్నాడు.
అయితే ఆ వెంటనే మరో పెనాల్టీ కార్నర్‌ లభించింది. దీనిని భారత్ సద్వినియోగం చేసుకుంది. అలానే ఈ సారి హర్మన్‌ ప్రీత్‌ ఎలాంటి పొరపాటు చేయకుండా బంతి గోల్‌ పోస్ట్‌లోకి పంపాడు. దీంతో స్కోరు 1-1తో సమంగా నిలిచింది. అనంతరం మూడో క్వార్టర్‌ ప్రారంభమైన కాసేపటికే పెనాల్టీ కార్నర్‌తో హర్మన్‌ ప్రీత్‌ మరో గోల్‌ చేశాడు. దీంతో భారత్ 2-1తో ఆధిక్యంలోకి దూసుకెళ్లింది. తర్వాత మూడు పెనాల్టీ కార్నర్‌లు సాధించిన భారత జట్టు వాటిని గోల్స్‌గా మలచ లేకపోయింది. అయితే మ్యాచ్ మరో నిమిషంలో ముగుస్తుంది అనగా స్పెయిన్‌కు ఓ పెనాల్టీ కార్నర్‌ దక్కింది. భారత్ దాన్ని సమర్థంగా అడ్డుకుంది.
వరుసగా రెండోది, మొత్తంగా 13వది - ఈ విజయంతో భారత్‌కు వరుసగా రెండో ఒలింపిక్స్ పతకం రావడం విశేషం. టోక్యో ఒలింపిక్స్‌లోనూ భారత్‌కు కాంస్య పతకం దక్కిన సంగతి తెలిసిందే. దాదాపు 52 ఏళ్ల తర్వాత భారత హాకీ జట్టు వరుసగా 2 ఒలింపిక్స్లో పతకాలను దక్కించుకుంది. మొత్తంగా ఒలింపిక్స్లో హాకీ జట్టుకు ఇది 13వ పతకం కావడం విశేషం.
𝐓𝐡𝐢𝐬 𝐁𝐫𝐨𝐧𝐳𝐞 𝐌𝐞𝐝𝐚𝐥 𝐢𝐬 𝐟𝐨𝐫 𝐈𝐧𝐝𝐢𝐚!
— Hockey India (@TheHockeyIndia) August 8, 2024
Consecutive bronze medals for team India, we defeat Spain in the Bronze Medal match.
Full-Time:
India 🇮🇳 2️⃣ - 1️⃣ 🇪🇸 Spain#Hockey #HockeyIndia #IndiaKaGame #WinItForSreejesh #Paris2024 #INDvsESP@CMO_Odisha… pic.twitter.com/WlpzrZu4jh
