Olympics 2036 In India : విశ్వ క్రీడలైన ఒలింపిక్స్ నిర్వహణకు భారత్ రెండీ అవుతోంది!. ఈ మేరకు 2036లో ఒలింపిక్స్, పారాలింపిక్స్‌ నిర్వహణకు ఆసక్తి వ్యక్తీకరణ తెలియజేస్తూ భారత ఒలింపిక్ అసోసియేషన్‌(ఐఓఏ)- అంతర్జాతీయ ఒలింపిక్ సంఘానికి(ఐఓసీ) ఫ్యూచర్ హోస్ట్ కమిషన్కు అధికారికంగా లేఖ పంపినట్లు తెలుస్తోంది. ఈ లెటర్ ఆఫ్ ఇంటెంట్ను ఐఓఏ అక్టోబర్ 1న పంపించినట్లు క్రీడా మంత్రిత్వ శాఖ వర్గాలు సమాచారం. దీంతో ఒలింపిక్స్ నిర్వహణ కోరికను నెరవేర్చుకునేందుకు తొలి అడుగుపడినట్లు అయింది. దీనికంటే ముందు ఐఓసీతో 2036 ఒలింపిక్స్ నిర్వహించే అంశంపై భారత్ అనధికార చర్చలు జరిపింది. తాజాగా పరిణామంతో ఇక దీనిపై నిరంతర చర్చలు జరుగుతాయి.
అయితే వచ్చే ఏడాది జరిగే ఐఓసీ ఎన్నికలు జరిగేంత వరకు హోస్ట్పై నిర్ణయం తీసుకోరు. మరోవైపు, 2036 ఒలింక్స్ నిర్వహణ కోసం చాలా దేశాలతో భారత్ పోటీ పడాల్సి ఉంటుంది. సౌదీ అరేబియా, ఖతార్, తుర్కియే, వంటి అనేక దేశాలు ఒలింపిక్స్ నిర్వహణపై ఆసక్తి చూపిస్తున్నాయి. భారత్ మొదటి 2032 ఒలింపిక్స్ నిర్వహించేందుకు ఆసక్తి చూపించింది. కానీ కొన్ని కారణాల వల్ల 2036లో నిర్వహించాలని నిర్ణయించుకుంది.
అయితే విస్తృత స్థాయిలో బిడ్డింగ్‌ కాకుండా ఆసక్తి ఉన్న దేశాల నుంచి వచ్చే అప్లికేషన్లను పరిశీలించి ఐఓసీ నాయకత్వ విభాగం ఈ హోస్టింగ్ రైట్స్ను కట్టబెట్టే ఆస్కారం ఉంది. స్పాన్సర్లు, బ్రాడ్కాస్టింగ్ హక్కులు, ప్రభుత్వ మద్దతు, ప్రజల ఆదరణ, ఇలా ఏ రకంగా చూసుకున్నా భారత్‌లో ఒలింపిక్స్ నిర్వహించడం వల్ల ఐఓసీకి లాభం చేకూరే అవకాశం ఉంది. అందుకే ఐఓసీ కూడా భారత్ వైపు మొగ్గు చూపేందుకు ఆసక్తితో ఉందనే అభిప్రాయాలు వ్యక్తమవుతున్నాయి. ఒకవేళ ఇండియా బిడ్ ఓకే అయితే గుజరాత్లోని అహ్మదాబాద్లో ఒలింపింక్స్ క్రీడలు జరుగుతాయి.
2036 ఒలింపిక్స్‌కు భారత్ ఆతిథ్యమిచ్చేందుకు అవసరమైన అన్ని ప్రయత్నాలు చేస్తామని, ఈ విషయంలో వెనక్కి తగ్గేదే లేదని గతంలో ప్రధాని నరేంద్ర మోదీ వెల్లడించారు. "ఒలింపిక్స్ నిర్వహణ కోసం భారతీయులు ఉత్సాహంగా ఉన్నారు. 2036 ఒలింపిక్స్‌ను హోస్ట్ చేసేందుకు అవసరమైన అన్ని ప్రయత్నాలనూ చేస్తాం. ఏ విషయంలోనూ వెనక్కి తగ్గం. ఇది 140 కోట్ల మంది భారతీయుల కల. అలాగే 2029 యూత్‌ ఒలింపిక్స్‌ను నిర్వహించేందుకు రెడీగా ఉన్నాం" అని ఆయన అన్నారు.
