మను భాకర్ ఇంట విషాదం- రోడ్డు ప్రమాదంలో ఇద్దరు కుటుంబ సభ్యులు మృతి

మను భాకర్ ఇంట విషాదం - బైక్​ను ఢీ కొట్టిన కారు - ప్రమాదంలో ఫ్యామిలీ మెంబర్స్​ మృతి

Manu Bhaker Grand Mother Died : భారత స్టార్ షూటర్ మను భాకర్ ఇంట విషాదం నెలకొంది. హరియాణాలోని చర్​ఖీ దాదరీలో జరిగిన ఓ రోడ్డు ప్రమాదంలో ఆమె అమ్మమ్మ అలాగే మేనమామ దుర్మరణం పాలయ్యారు. విషయం తెలుసుకున్న పోలీసులు ఘటన స్థలానికి చేరుకుని దర్యాప్తు ప్రారంభించారు. వారు వెళ్తున్న బైక్​ను ఓ కారు ఢీ కొట్టడం వల్ల ఈ ప్రమాదం జరిగనట్లు తెలుస్తోంది. ప్రస్తుతానికి కారు నడిపిన డ్రైవర్ పరారీలో ఉన్నట్లు సమాచారం.

ఇదీ జరిగింది :
పోలీసులు తెలిపిన వివరాల ప్రకారం చర్​ఖీ దాదరీలోని మహేంద్రగఢ్ బైపాస్ రోడ్డులో మను భాకర్ మామయ్య, అమ్మమ్మ స్కూటర్‌పై వెళ్తున్నారు. అప్పుడు అకస్మాత్తుగా ఒక వాహనం వాళ్ల స్కూటర్‌ను వేగంగా వచ్చి ఢీకొట్టింది. దీంతో ఆ ఇద్దరూ అక్కడికక్కడే మరణించారు. ప్రమాదం జరిగిన వెంటనే కారులో ఉన్న వ్యక్తి అక్కడి నుంచి పరారయ్యాడు. సమాచారం తెలుసుకున్న పోలీసులు ఘటనా స్థలానికి చేరుకుని ఇద్దరి మృతదేహాలను పోస్ట్‌మార్టం కోసం తరలించారు. తదుపరి విచారణ చేపడుతున్నారు.

VIDEO | Haryana: International shooting star Manu Bhaker's maternal grandmother and maternal uncle die in a accident in Charkhi Dadri.

ASI Suresh Kumar informs, " we got the information about the accident about a collision of a car and a scooty. both the persons on the scooty… pic.twitter.com/U6wFpgiVaz

— Press Trust of India (@PTI_News) January 19, 2025

ఇంతలోనే ఇలా!
రెండు రోజుల క్రితమే మను భాకర్​ రాష్ట్రపతి ద్రౌపదీ ముర్ము చేతుల మీదగా ప్రతిష్టాత్మక ఖేల్ రత్న అవార్డు అందుకుంది. ఇంతలోనే ఈ ఘటన జరగడం బాధకు గురిచేస్తోందని మను అభిమానులు అంటున్నారు. ఆమె కుటుంబానికి ప్రగాఢ సానుభూతి తెలుపుతున్నారు. బీ స్ట్రాంగ్ మను అంటూ సోషల్ మీడియాలో కామెంట్లు పెడుతున్నారు.

2024 పారిస్​ ఒలింపిక్స్​లో మను బాకర్ 10 మీటర్ల ఎయిర్ పిస్టల్, 10 మీటర్ల మిక్స్​డ్​ డబుల్స్​లో కాంస్య పతకాన్ని సాధించి చరిత్ర సృష్టించింది. ఒకే ఒలింపిక్స్​లో రెండు పతకాలు సాధించిన క్రీడాకారిణిగా రికార్డు సృష్టించింది. 1900 ఒలింపిక్స్​లో నార్మన్ ప్రిచర్డ్‌ రెండు రజతాలను గెలిచారు. ఇప్పుడు నార్మన్‌ తర్వాత రెండు పతకాలను సాధించిన అథ్లెట్​గా బాకర్‌ నిలిచింది. 25 మీటర్ల పిస్టల్‌ విభాగంలో నాలుగో స్థానంలో నిలిచి తృటిలో మరో కాంస్య పతకాన్ని కోల్పోయింది మను బాకర్. లేకపోతే మూడు పతకాలు సాధించిన ఏకైక భారత్ క్రీడాకారిణిగా అవతరించేది.