MI VS SRH IPL 2024 : ఐపీఎల్ 17వ సీజన్లో భాగంగా తాజాగా హోం గ్రౌండ్లో జరిగిన మ్యాచ్లో ముంబయి ఇండియన్స్పై సన్రైజర్స్ హైదరాబాద్ పూనకం వచ్చినట్లు ఊగిపోయింది. హైదరాబాద్లోని ఉప్పల్ వేదికగా ఆడిన మ్యాచ్లో అద్వితీయమైన బ్యాటింగ్‌తో అదరగొట్టేసింది. బ్యాటర్లు మెషీన్‌ గన్నుల్లా పేలి ఐపీఎల్ చరిత్రలోనే నిలిచిపోయే ఇన్నింగ్స్ ఆడారు. హార్దిక్ సేనను 31 పరుగుల తేడాతో ఓడించారు.
ట్రావిస్‌ హెడ్ (24 బంతుల్లో 9×4, 3×6 సాయంతో 62 పరుగులు), అభిషేక్‌శర్మ (23 బంతుల్లో 3×4, 7×6 సాయంతో 63 పరుగులు), మార్‌క్రమ్‌ (28 బంతుల్లో 2×4, 1×6 సాయంతో 42 నాటౌట్‌), హెన్రిచ్ క్లాసెన్ (34 బంతుల్లో 4×4, 7×6 సాయంతో 80 నాటౌట్‌) ఆకాశమే హద్దుగా చెలరేగిపోయారు. దీంతో ఒక్క సెంచరీ కూడా నమోదు చేయకుండానే సన్రైజర్స్ 20 ఓవర్లలో 3 వికెట్లకు 277 పరుగుల రికార్డు స్కోరును చేసింది. ముంబయి బౌలర్లలో కెప్టెన్‌ హార్దిక్ పాండ్యా, కోయెట్జీ, పీయూష్ చావ్లా ఒక్కో వికెట్‌ తీశారు.
అనంతరం భారీ లక్ష్య ఛేదనకు దిగిన ముంబయి ఇండియన్స్ చివర్లో కాస్త తడబడింది. 20 ఓవర్లలో 5 వికెట్లు కోల్పోయి 246 రన్స్ చేసింది. హైదరాబాదీ ప్లేయర్ తిలక్‌వర్మ (34 బంతుల్లో 2×4, 6×6 పరుగులు సాయంతో 64), టిమ్ డేవిడ్ ( 22 బంతుల్లో 2×4, 3×6 సాయంతో 42 నాటౌట్‌), ఇషాన్ కిషన్ (13 బంతుల్లో 2×4, 3×6 సాయంతో 34) పోరాడినప్పటికీ ఫలితం దక్కలేదు. సన్రైజర్స్ బౌలింగ్లో ఉనద్కత్ 2, కమిన్స్ 2, షాబాజ్ అహ్మద్ 1 వికెట్లు తీశారు.
ముంబయి తుది జట్టు : ఇషాన్ కిషన్, రోహిత్ శర్మ, నమన్ ధీర్‌, తిలక్ వర్మ, పీయూష్ చావ్లా, హార్దిక్ పాండ్యా (కెప్టెన్‌), టిమ్ డేవిడ్, కోయెట్జీ, షామ్స్ ములానీ, జస్ప్రీత్ బుమ్రా, క్వెనా మఫాకా
సబ్‌స్టిట్యూట్స్‌: డెవాల్డ్‌ బ్రెవిస్, నెహాల్ వధేరా, రొమారియో షెఫర్డ్, నబీ, విష్ణు వినోద్.
సన్రైజర్స్ హైదరాబాద్ తుది జట్టు : ట్రావిస్‌ హెడ్, మయాంక్ అగర్వాల్, అభిషేక్‌ శర్మ, ఏడన్ మార్‌క్రమ్‌, హెన్రిచ్ క్లాసెన్, మయాంక్ మార్కండే, అబ్దుల్‌ సమద్, షాబాజ్ అహ్మద్, కమిన్స్ (కెప్టెన్‌), భువీ, జయదేవ్ ఉనద్కత్
సబ్‌స్టిట్యూట్స్‌: వాషింగ్టన్‌ సుందర్, నితీశ్‌ రెడ్డి, ఉమ్రాన్‌ మాలిక్, గ్లెన్‌ ఫిలిప్స్‌, ఉపేంద్ర యాదవ్
విరాట్ ఫ్యాన్కు సెక్యూరిటీ షాక్- గతంలోనూ ఇలా చాలా సార్లు! - Virat Fan Beaten by Security
